កម្ពុជា-អាមេរិកធ្វើសមយុទ្ធរួមគ្នានៅខេត្តព្រះសីហនុ
កងទ័ពជើងទឹកកម្ពុជានិងអាមេរិកកំពុងធ្វើសមយុទ្ធយោធារួមគ្នានៅក្នុងទឹកដីខេត្តព្រះសីហនុ។ សម យុទ្ធយោធាជើងទឹករួមគ្នា ត្រូវក្រុមមន្ត្រីថ្លែងឲ្យដឹងថាធ្វើឡើងដើម្បីរឹតចំណងកិច្ចសហប្រតិបត្តិការរវាងប្រទេស ទាំងពីរ។ សមយុទ្ធរយៈពេល ៦ថ្ងៃនេះត្រូវបានធ្វើឡើងស្របពេលដែលរដ្ឋមន្ត្រីក្រសួងការបរទេសអាមេរិក លោកស្រី ហ៊ីឡារី គ្លីនតុន នឹងធ្វើទស្សនកិច្ចនៅកម្ពុជានៅចុងសបា្តហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្រ្តា
ទាហានជើងទឹកសហរដ្ឋអាមេរិកប្រហែល ៦០០ នាក់ រួមនឹងកងនាវិកខេមរភូមិន្ទជាច្រើនរយនាក់ទៀត បានចាប់ផ្តើមការហ្វឹកហាត់រួមគ្នាស្តីពីសន្តិសុខ និងសុវត្ថិភាពជើងទឹកក្នុងខេត្តព្រះសីហនុ សម្រាប់រយៈពេល ៦ ថ្ងៃ។
ចាប់ផ្តើមពីថ្ងៃម្សិលមិញ ការហ្វឹកហាត់រួមគ្នានេះនឹងត្រូវបញ្ចប់នៅដំណាច់ខែតុលានេះ។ មន្ត្រីកងទ័ពជើងទឹកអាមេរិកបានថ្លែងក្នុងសេចក្តីថ្លែងការណ៍ថា សន្តិសុខ និងសុវត្ថិភាពជើងទឹកជាចំណុចសំខាន់នៃវគ្គកិច្ចសហប្រតិបត្តិការហ្វឹកហាត់និងការត្រៀមជាច្រើនលើផ្ទៃទឹកនៅកម្ពុជា ឆ្នាំ២០១០ ដែលហៅកាត់ថា CARAT។ លោក David Welch ឧត្តមនាវីត្រីរងនៃក្រុមកងពលចម្រុះអាមេរិកក្នុងវគ្គ CARAT បានថ្លែងថានេះ គឺជាកិច្ចសហប្រតិបតិ្តការដ៏ល្អរវាងកងកម្លាំងជើងទឹកកម្ពុជា និងកងកម្លាំងជើងទឹកសហរដ្ឋអាមេរិក។
នេះគឺជាឆ្នាំទី១ ហើយដែលកម្ពុជា បាន ចូលរួមហ្វឹកហាត់ក្នុងវគ្គ CARAT ជាមួយនឹងកងកម្លាំងជើងទឹកអាមេរិក ហើយមន្ត្រីកងទ័ពកម្ពុជា និងអាមេរិកបានមើលឃើញលទ្ធផលរួចហើយទាក់ទងទៅនឹងវិធីដែលកងទ័ពទាំងពីរអាចប្រាស្រ័យទាក់ទងកាន់តែល្អប្រសើរ និងធ្វើការរួមគ្នា។ យោងតាមសេចក្តីប្រកាសព័ត៌មាន ដែលចេញផ្សាយដោយផ្នែកកិច្ចការសាធារណៈនៃវគ្គ CARAT បានឲ្យដឹងថា វគ្គ CARAT ក៏ផ្តោតលើផ្នែកសន្តិសុខផ្ទៃសមុទ្រជាច្រើន ក្នុងនោះរួមមានប្រតិបតិ្តការមុជទឹក និងជួយសង្គ្រោះ សន្តិសុខកំពង់ផែ ការចាត់ចែង និងថែទាំងទូកតូចៗ ការបង្អាក់លើផ្ទៃសមុទ្រ ការឡើងឆែកឆេរ និងចាប់យក ប្រតិបតិ្តការយន្តហោះលើផ្ទៃសមុទ្រ និងកម្មវិធីវិស្វកម្ម និងព្យាបាលជំងឺឬរបួស។
ការហ្វឹកហ្វឺនរួមគ្នារវាងកងទ័ពជើងទឹកកម្ពុជា និងអាមេរិក ត្រូវបានធ្វើឡើងគាប់ជួននឹងគម្រោងនៃដំណើរទស្សនកិច្ចរបស់រដ្ឋមន្រ្តីក្រសួងការបរទេសអាមេរិក លោកស្រីហ៊ីឡារី គ្លីនតុន មកទស្សនកិច្ចនៅកម្ពុជានៅថ្ងៃទី ៣០ និង ៣១ ខែតុលាខាងមុខ។ នៅក្នុងសេចក្តីថ្លែងការណ៍មួយ ក្រសួងការបរទេសអាមេរិកបានថ្លែងថា លោកស្រី Hillary Clinton នឹងមកដល់ប្រទេសកម្ពុជានៅថ្ងៃទី៣០ តុលា ហើយនឹងជួបជាមួយរដ្ឋាភិបាលនិងមេដឹកនាំក្រុមស៊ីវិលនៅរាជធានីភ្នំពេញ។
លោកស្រីនឹងធ្វើដំណើរទស្សនកិច្ចទៅប្រាសាទអង្គវត្តផងដែរមុនពេលចេញទៅប្រទេសម៉ាឡេស៊ី។ដំណើរទស្សនកិច្ចរបស់លោកស្រី ក្លីនតុន មកកាន់កម្ពុជាគឺជាផ្នែកមួយនៃដំណើរទស្សនកិច្ចធំមួយដែលមានគោលបំណងលើកកម្ពស់ទំនាក់ទំនងរបស់សហរដ្ឋអាមេរិកជាមួយនឹងប្រទេសសម្ព័ន្ធមិត្តសំខាន់ៗ នៅតំបន់ប៉ាស៊ីហ្វិក ដែលរាប់បញ្ចូលប្រទេសវៀតណាម ម៉ាឡេស៊ី ប្រទេស Papau New Guinea អូស្រ្តាលី និងនូវែលសេឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ