តំណាងរាស្រ្តបក្សកាន់អំណាចបដិសេធមិនចុះមើលបន្ទាត់ព្រំដែន
សមាជិកសភាគណបក្សប្រជាជនកម្ពុជាដែលមានសំឡេងភាគច្រើនក្នុងសភាបាន អះអាងថា ពួកគេមិនចាំបាច់ចុះពិនិត្យបង្គោលព្រំដែនតាមការស្នើរបស់បក្ស ប្រឆាំងទេ ពីព្រោះតែគេជឿជាក់លើរដ្ឋាភិបាល។ ការអះអាងនេះបានធ្វើឡើង បន្ទាប់ពីសមាជិកសភាគណបក្សសម រង្ស៊ីបានស្នើឲ្យតំណាងរាស្ត្រទាំងអស់ រាប់ទាំងគណបក្សកាន់អំណាចផង ចុះទៅពិនិត្យមើលការបោះបង្គោលព្រំដែនដើម្បីឲ្យឃើញបញ្ហាជាក់នឹង ភ្នែក។ ប៉ុន្តែសេចក្តីស្នើនេះត្រូវបានបដិសេធពីសំណាក់បក្សកាន់អំណាច និងត្រូវបានចាត់ទុកជាសំណើដែលមានចរិតកេងចំណេញនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា ពីទីក្រុងភ្នំពេញ
លោក ជាម យៀប តំណាងរាស្រ្តមណ្ឌលព្រៃវែងមកពីគណបក្សប្រជាជនកម្ពុជាបានបដិសេធនៅចុងសប្តាហ៍នេះថា តំណាងរាស្ត្រគណបក្សកាន់អំណាចដែលមាន៩០កៅអីក្នុងរដ្ឋសភា មិនចាំបាច់ចុះមើលការបោះបង្គោលព្រំដែនតាមការស្នើរបស់គណបក្សប្រឆាំងទេ ពីព្រោះតែពួកគេជឿជាក់លើរដ្ឋាភិបាល។ លោកជាម យៀប ពន្យល់ថា រដ្ឋសភាបានបោះឆ្នោតផ្តល់ការទុកចិត្តលើរដ្ឋាភិបាលក្នុងការដឹកនាំប្រទេស។ ដូច្នេះរដ្ឋាភិបាលមានការទទួលខុសត្រូវចំពោះមុខរដ្ឋសភា និងចំពោះប្រជាពលរដ្ឋខ្មែរទាំងមូល។ ម្យ៉ាងទៀត រដ្ឋាភិបាលមានអ្នកជំនាញច្បាស់លាស់សម្រាប់ធ្វើកិច្ចការព្រំដែន។
ប្រតិកម្មនេះបានធ្វើឡើង នៅក្រោយពេលដែលតំណាងរាស្ត្របក្សប្រឆាំងបានស្នើទៅកាន់សមាជិកសភាទាំងអស់ រាប់ទាំងតំណាងរាស្ត្រមកពីគណបក្សកាន់អំណាចផង ឲ្យចុះទៅពិនិត្យមើលការបោះបង្គោលព្រំដែនជាមួយប្រទេសវៀតណាម ដើម្បីឲ្យឃើញបញ្ហាផ្ទាល់នឹងភ្នែក។ ប៉ុន្តែ សម្រាប់លោក ជាម យៀប អ្នកតំណាងរាស្រ្តគ្មានជំនាញផ្នែកកិច្ចការព្រំដែនឡើយ។ ដូច្នេះពួកគេនឹងគ្មានមូលដ្ឋានអ្វីទាំងអស់ក្នុងការវាយតម្លៃលើការងារបោះបង្គោលព្រំដែន។
សំណុំរឿងព្រំដែននៅតែជាអធិករណ៍មួយរវាងរដ្ឋាភិបាល និងគណបក្សប្រឆាំង និងសង្គមស៊ីវិលមួយចំនួនផង។ គណបក្សសម រង្ស៊ីគ្រោងនឹងចុះទៅពិនិត្យបង្គោលព្រំដែនមួយកន្លែងនៅក្នុងឃុំដារ ស្រុកមេមត់ ខេត្តកំពង់ចាមនៅចុងខែវិច្ឆិកានេះ។ ការចុះពិនិត្យបង្គោលព្រំដែននៅទីនោះ គឺបន្ទាប់ពីមានការតវ៉ាពីសំណាក់អ្នកភូមិជាង២០០នាក់ថា ពួកគេបានបាត់បង់ដីស្រែចម្ការរបស់ខ្លួន ដោយសារតែការបោះបង្គោលព្រំដែន។
ប៉ុន្តែលោក វ៉ា គឹមហុង ប្រធានគណៈកម្មាធិការព្រំដែនរបស់រដ្ឋាភិបាលបានចាត់ទុកការតវ៉ានោះថា បានធ្វើឡើងតាមការញុះញង់របស់គណបក្សសម រង្ស៊ី។ អ្នកជំនាញកិច្ចការព្រំដែនរូបនេះអះអាងថា ការបោះបង្គោលព្រំដែនលេខ១០៩នៅក្នុងឃុំដារស្រុកមេមត់បានធ្វើឡើងដោយមានការចូលរួមពីអាជ្ញាធរដែនដី និងប្រជាពលរដ្ឋផងដែរ ហើយដំណើរការនេះមិនបានធ្វើឲ្យបាត់ដីកសិករណាម្នាក់ទេ។
យ៉ាងណាក៏ដោយ ក្រុមរបស់លោក រ៉ុង ឈុន ក្នុងនាមក្រុមប្រឹក្សាឃ្លាំមើល ក៏គ្រោងនឹងចុះទៅពិនិត្យបង្គោលព្រំដែនក្នុងស្រុកមេមត់ដែរ នៅថ្ងៃទី២៤វិច្ឆិកានេះ។ ប៉ុន្តែសមាជិកសភាគណបក្សកាន់អំណាច លោក ជាម យៀប បានចាត់ទុកការលើកឡើងពីបញ្ហាព្រំដែនពីសំណាក់បក្សប្រឆាំង និងសង្គមស៊ីវិលមួយចំនួននោះថា គ្រាន់តែជាការចង់បានប្រជាប្រិយភាពនយោបាយតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ