កម្ពុជាត្រូវត្រៀមចំណាយថវិកាខ្លួនឯងដើម្បីធ្វើការងារអេដស៍
ក្រុមគ្រូពេទ្យជំនាញរបស់កម្ពុជា ដោយសហការជាមួយវិទ្យាស្ថានលទ្ធផលដើម្បីការអភិវឌ្ឍន៍ដែលមានមូលដ្ឋាននៅសហរដ្ឋអាមេរិកបានធ្វើការស្រាវជ្រាវស្តីពី ការចំណាយ និងបញ្ហាហិរញ្ញវត្ថុសម្រាប់ការងារប្រយុទ្ធប្រឆាំងមេរោគអេដស៍នាពេលអនាគតនៅកម្ពុជា។ កម្ពុជាសព្វថ្ងៃចំណាយថវិកាប្រមាណ៥០លានដុល្លារក្នុងមួយឆ្នាំ ហើយ៩០ភាគរយនៃថវិកាទាំងនោះ បានមកពីដៃគូអភិវឌ្ឍន៍។ ការស្រាវជ្រាវរកឃើញថា នៅពេលដែលនិន្នាការនៃការផ្តល់ជំនួយបានធ្លាក់ចុះ រដ្ឋាភិបាលកម្ពុជាត្រូវត្រៀមខ្លួនប្រើប្រាស់ថវិកាផ្ទាល់ខ្លួនក្នុងកិច្ចការងារទប់ស្កាត់ជំងឺឆ្លងរាតត្បាតមេរោគអេដស៏។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
ឆ្នាំ២០៣១ខាងមុខ គឺជាខួបឆ្នាំទី៥០នៃវត្តមានមេរោគអេដស៍ ដែលត្រូវបានរកឃើញនៅលើពិភពលោកនេះ។ កម្ពុជាដែលបានរកឃើញមានករណីមេរោគអេដស៍ លើកដំបូងនៅឆ្នាំ១៩៩១នោះ បានជាប់ឈ្មោះថា ជាប្រទេសមានការខិតខំប្រឹងប្រែងខ្លាំង ហើយទទួលបានជោគជ័យក្នុងយុទ្ធនាការទប់ស្កាត់ការឆ្លងរាលមេរោគអេដស៍នេះ។ ប៉ុន្តែ ឆ្លងតាមការស្រាវជ្រាវថ្មីមួយដែលធ្វើដោយក្រុមអ្នកជំនាញរបស់កម្ពុជា ដែលសហការជាមួយអ្នកជំនាញរបស់សហរដ្ឋអាមេរិកមកពីវិទ្យាស្ថានលទ្ធផលសម្រាប់ការអភិវឌ្ឍន៍នោះ កម្ពុជាបានដើរមកដល់ផ្លូវបំបែកមួយទាក់ទងនឹងការប្រើប្រាស់ថវិកា។
ការចំណាយសម្រាប់ការងារប្រយុទ្ធនឹងជំងឺអេដស៍បានកើនឡើងពី ២១លានដុល្លារក្នុងឆ្នាំ២០០៣ ដល់៥១,៨លានដុល្លារក្នុងឆ្នាំ២០០៨។ ក្នុងចំណោមថវិកាទាំងនេះ ៩០ភាគរយ គឺជាជំនួយរបស់ដៃគូអភិវឌ្ឍន៍។
នៅក្នុងបរិបទនៃវិបត្តិសេដ្ឋកិច្ច ដែលដៃគូអភិវឌ្ឍន៍នឹងកាត់បន្ថយជំនួយរបស់ខ្លួននោះ របាយការណ៍ថ្មីនេះ បានប្រាប់រដ្ឋាភិបាលកម្ពុជាអោយត្រៀមខ្លួនបម្រុងថវិកាផ្ទាល់ខ្លួនសម្រាប់ប្រើប្រាស់ក្នុងកម្មវិធីទប់ស្កាត់ការឆ្លងរាលដាលមេរោគអេដស៍នៅពេលខាងមុខ។ របាយការណ៍ក៏បានប្រាប់ផងដែរអំពីទំហំថវិកាដែលកម្ពុជាត្រូវមានក្នុងដៃសម្រាប់ការងារនេះ។ នោះគឺប្រមាណ៦៨លានដុល្លារក្នុងមួយឆ្នាំ។
អ្នកជំនាញរបស់កម្ពុជា និងអាមេរិកបានសរសេរនៅក្នុងរបាយការណ៍ថា បើទោះជាកម្ពុជានៅអនុវត្តសកម្មភាពទប់ស្កាត់ល្អបំផុតក៏ដោយនោះ កម្ពុជានៅតែមានករណីឆ្លងមេរោគអេដស៍នេះប្រមាណ១០០០នាក់ក្នុងមួយឆ្នាំ នៅឆ្នាំ២០៣១។ កាលពី១០ឆ្នាំមុន អត្រាឆ្លងខ្ពស់បំផុតមានចំនួន១៥០០០នាក់។ កាលពីឆ្នាំកន្លងទៅនេះ អត្រាឆ្លងមាន២១០០នាក់។
គួរបញ្ជាក់ថា ក្រុមអ្នកសរសេររបាយការណ៍នេះ នឹងត្រូវធ្វើបទបង្ហាញចំពោះរដ្ឋាភិបាល និងស្ថាប័នរដ្ឋសភា ដើម្បីអោយអ្នកសម្រេចចិត្តខាងនយោបាយគាំទ្រអនុសាសន៍នានាដែលត្រូវបានរកឃើញក្នុងរបាយការណ៍នេះ។
គួរបញ្ជាក់ថា កម្ពុជាកំពុងព្រួយបារម្ភអំពីរលកនៃការផ្ទុះ ការឆ្លងរាលដាលមេរោគអេដស៍នៅក្នុងក្រុមគោលដៅចំនួន៣ នោះគឺក្រុមស្រ្តីធ្វើការនៅមណ្ឌលកំសាន្ត ក្រុមបុរសស្រលាញ់ភេទដូចគ្នា និងក្រុមអ្នកប្រើប្រាស់គ្រឿងញៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ