ប្រធានរដ្ឋសភាជាតិ និងតំណាងរាស្ត្របក្សប្រឆាំងប៉ះសម្តីគ្នា រឿងបញ្ហាព្រំដែន
ក្រុមតំណាងរាស្ត្រគណបក្សកាន់អំណាច និងមន្ត្រីគណបក្សប្រឆាំងបានប៉ះសម្តីគ្នាកាលពីព្រឹកមិញលើដំណើរការបោះបង្គោលព្រំដែនកម្ពុជា-វៀតណាម។ មន្ត្រីបក្សប្រឆាំងបានលើកក្នុងរដ្ឋសភាថាការបោះបង្គោលព្រំដែនបានធ្វើឲ្យបាត់បង់ទឹកដី ប៉ុន្តែមន្ត្រីគណបក្សប្រជាជនបានច្រានចោល និងថាជាការលើកឡើង ដដែលៗ និងមិនមានការពិត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់នេត្រ ភក្រ្តាពីទីក្រុងភ្នំពេញ
ប្រធានរដ្ឋសភាជាតិ លោកហេង សំរិន រួមនឹងតំណាងរាស្ត្រគណបក្សប្រជាជនកម្ពុជាបានថ្លែងការពាររដ្ឋាភិបាលក្នុងការបោះបង្គោលព្រំដែនគោកជាមួយវៀតណាម។ ការថ្លែងការពារខ្លូននៅព្រឹកថ្ងៃនេះក្នុងរដ្ឋសភា គឺដើម្បីឆ្លើយតបទៅនឹងការចោទប្រកាន់របស់លោកយឹម សុវណ្ណ តំណាងរាស្ត្រគណបក្សសម រង្ស៊ី ដែលថាការបោះបង្គោលព្រំដែនបានធ្វើឲ្យកម្ពុជាបាត់បង់ទឹកដី។
លោក ហេង សំរិន ថ្លែងថា ការលើកឡើងពីបញ្ហាព្រំដែនរបស់លោកយឹម សុវណ្ណ គឺជារឿងដដែលៗ គ្មានការសិក្សាឲ្យបានច្បាស់លាស់។ លោកហេង សំរិន បានពន្យល់ថា នៅក្នុង ការបោះបង្គោលព្រំដែន រដ្ឋាភិបាលកម្ពុជា-វៀតណាម បានចុះហត្ថលេខា និងបានសុំសច្ចាប័នពីរដ្ឋសភា ហើយព្រះមហាក្សត្របានឡាយព្រះហស្តលេខារួចទៅហើយ។ លោកបានបន្តថា ប្រទេសទាំងពីរបានយល់ស្របគ្នាហើយ គឺមិនមានការឆ្លើយចោទប្រកាន់ថាអ្នកនេះឈ្លានពានអ្នកនោះឡើយ ហើយការងារបច្ចុប្បន្ននេះ គឺមានតែគណៈកម្មាធិការទេដែលគេត្រូវទៅវាស់វែងច្បាស់លាស់ និងត្រឹមត្រូវ។
បើតាមលោក ហេង សំរិន គណៈកម្មាធិការនៃប្រទេសទាំងពីរបានជជែកគ្នា តឹងតែងដើម្បីអាចឈានដល់ការបោះបង្គោល និងតម្រុយនីមួយៗ។ ប្រធានរដ្ឋសភាក៏បានថ្លែងផងដែរថា នៅក្នុងការបោះបង្គោលព្រំ ដែននេះគឺកន្លែងខ្លះ វៀតណាមចូលមកកម្ពុជា ហើយកន្លែងខ្លះកម្ពុជាចូលទៅក្នុងដីវៀតណាម ដោយសារតែពីមុនមកពុំមានកំណត់សម្គាល់ព្រំដែនច្បាស់លាស់។ ដោយរិះគន់ថា បក្សប្រឆាំងលើកឡើងតែពីការបាត់បង់ទឹកដីចូលទៅវៀតណាម និងមិនហ៊ានលើកឡើងពីកម្ពុជាចូលទៅដីវៀតណាមទេ លោកហេង សំរិន មានប្រសាសន៍ថា ប្រជាពលរដ្ឋវៀតណាមក៏បានស្រែកតវ៉ាជាមួយរដ្ឋាភិបាលខ្លួនពីការបាត់បង់ទឹកដីដែរ មិនមែនត្រឹមតែពលរដ្ឋខ្មែរទេ។
ទោះបីយ៉ាងណា លោកយឹម សុវណ្ណ តំណាងរាស្ត្រគណបក្សសម រង្ស៊ីថ្លែងថាអ្វីដែលជាការពិត គឺនៅតែជាការពិត ហើយប្រជាពលរដ្ឋបានលើកឡើងពីការបាត់បង់ទឹកដី។ បើទោះបីជាលោកហេង សំរិន លើកឡើងថា អ្វីដែលគណបក្សប្រឆាំងលើកឡើងមិនពិត លោកយឹម សុវណ្ណ បានថ្លែងថា គណបក្សសម រង្ស៊ីនឹងនៅ តែផ្ញើរបាយការណ៍ស្តីពីបញ្ហាព្រំដែនទៅរដ្ឋសភាជាតិ និងរដ្ឋាភិបាលដោយមានភ្ជាប់នូវសំណួរមួយចំនួនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ