ស្ថានភាពនៅខេត្តឧត្តរមានជ័យ និងបន្ទាយមានជ័យ ក្រោយការផ្ទុះអាវុធនៅព្រះវិហារ
ក្រោយការផ្ទុះអាវុធនៅព្រំដែនប្រាសាទព្រះវិហារ តាមបណ្តោយព្រំដែនកម្ពុជា-ថៃ ក្នុងខេត្តឧត្តរមានជ័យ និងខេត្តបន្ទាយមានជ័យ មិនមានការផ្ទុះអាវុធដាក់គ្នាឡើយ។ ក៏ប៉ុន្តែកងទ័ពកម្ពុជា-ថៃ ស្ថិតក្នុងលក្ខណៈប្រុងជើងការ ចូលខ្សែត្រៀមជួរមុខ ដើម្បីត្រៀមការវាយបក និងការពារទីតាំងរៀងៗខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ ពីទីក្រុងភ្នំពេញ
តាមបណ្តោយព្រំដែនកម្ពុជា-ថៃ ពិសេសនៅច្រកព្រំដែនសំខាន់ៗ ក្នុងខេត្តបន្ទាយមានជ័យ និងខេត្តឧត្តរមានជ័យ មានការប្រុងជើងការ ត្រៀមប្រយុទ្ធរវាងភាគីកម្ពុជា និងថៃ តែមិនដល់ថ្នាក់ផ្ទុះអាវុធទេ កាលពីរសៀលថ្ងៃទី៤កុម្ភៈ ឆ្នាំ២០១១។
ស្ថានការណ៍តាមបណ្តោយព្រំដែនកម្ពុជា-ថៃ ក្នុងខេត្តបន្ទាយមានជ័យ នៅចំណុចបង្គោលព្រំដែនលេខ ៤៦ ក្នុងស្រុកអូរជ្រៅ និងចំណុចភ្នំប្រាក់ ក្នុងស្រុកថ្មពួក គឺជាចំណុចរសើប និងប្រឈមខ្លាំង។ កងកម្លាំងកម្ពុជា និងថៃ បានបង្កើតការប្រុងប្រយ័ត្ន និងចូលខ្សែត្រៀមនៅជួរមុខ។
នៅឯច្រកព្រំដែនអន្តរជាតិប៉ោយប៉ែត ពលរដ្ឋខ្មែរជាអ្នកលក់ដូរក្នុងផ្សារទឹកដីថៃ និងអ្នកទៅធ្វើការក្នុងទឹកដីថៃ បានសម្រុកវិលត្រឡប់មកពីទឹកដីថៃ ចូលក្នុងទឹកដីកម្ពុជាវិញ ដើម្បីសុវត្ថិភាព។ នៅពេលមានការផ្ទុះអាវុធនៅព្រំដែនប្រាសាទព្រះវិហារ នៅប៉ោយប៉ែត ទំនិញសព្វសារពើ ពិសេសប្រេងសាំង បានឡើងថ្លៃខ្ពស់លើសថ្ងៃធម្មតា ប៉ុន្តែអាជ្ញាធរសមត្ថកិច្ច បានអន្តរាគមន៍ភ្លាមៗ។
នៅព្រំដែនកម្ពុជា-ថៃ ក្នុងខេត្តឧត្តរមានជ័យ ចំណុចរសើប និងប្រឈមខ្លាំងនៅចំណុចប្រាសាទតាមាន់ និងប្រាសាទតាក្របី ក្នុងស្រុកបន្ទាយអំពិល។ ចំណុចព្រំដែនទាំងពីរនេះ កងកម្លាំងទាំងសងខាង បានចូលខ្សែត្រៀមជួរមុខ ប្រុងជើងការ ដើម្បីត្រៀមការវាយបក និងការពារទីតាំងយ៉ាងប្រុងប្រយ័ត្ន។
នៅឯច្រកព្រំដែនអន្តរជាតិអូរស្មាច់ ក្នុងខេត្តឧត្តរមានជ័យ ពលរដ្ឋខ្មែរដែលបានចូលទៅធ្វើការនៅប្រទេសថៃ បានសម្រុកវិលត្រឡប់មកវិញ។ ចំណែកនៅច្រកព្រំដែនអន្តរជាតិជ្រាំ សភាពការណ៍នៅស្ងាត់ធម្មតា តែខាងភាគីថៃ មានការប្រែប្រួលកម្លាំងខ្លះ។ រីឯកងទ័ពកម្ពុជា បានប្រុងជើងការជាប់ជានិច្ច។
ដោយឡែកនៅឯច្រកព្រំដែនត្រពាំងប្រាសាទ ប្រឈមនឹងខេត្តស៊ីសាកេត របស់ថៃ កងកម្លាំងទាហានថៃ ដែលបានដាក់ពង្រាយទប់ទល់នឹងពលរដ្ឋខ្មែរ ឆ្លងដែនចូលកាប់ឈើ ក៏ត្រូវបានបង្កើនកម្លាំងទ័ព នៅពេលដែលមានការផ្ទុះអាវុធនៅព្រំដែនប្រាសាទព្រះវិហារ។
ច្រកព្រំដែនជាំស្រង៉ាំ និងច្រកព្រំដែនត្រពាំងប្រាសាទ ជាច្រកយុទ្ធសាស្ត្រ ដែលភាគីថៃ អាចវាយបំបែកកងកម្លាំងកម្ពុជា និងចូលក្នុងបូរណភាពទឹកដីកម្ពុជា ដើម្បីឆ្ពោះទៅកាន់សមរភូមិព្រំដែនប្រាសាទព្រះវិហារ។
ជាសរុបទៅ ខណៈដែលកងទ័ពកម្ពុជា-ថៃ ផ្ទុះអាវុធដាក់គ្នា កាលពីរសៀលថ្ងៃទី៤កុម្ភៈ ពលរដ្ឋកម្ពុជានៅតាមបណ្តោយព្រំដែនថៃ ពិសេសនៅតំបន់ប៉ោយប៉ែត ពលរដ្ឋខ្មែរ មិនទាន់ចាកចេញពីផ្ទះសម្បែង ដូចព្រឹត្តិការណ៍ផ្ទុះអាវុធលើកដំបូង នៅព្រំដែនប្រាសាទព្រះវិហារ កាលពីថ្ងៃ១៥តុលា ឆ្នាំ២០០៨ ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ