ពិព័រណ៍ផលិតផលថៃដែលមានការចូលរួមពីពាណិជ្ជករខ្មែរនឹងរៀបចំឡើងចាប់ពីថ្ងៃទី១៩ ខែឧសភានៅភ្នំពេញ
ពិព័រណ៍ផលិតផលថៃដែលមានការចូលរួមពីពាណិជ្ជករខ្មែរគ្រោងនឹងរៀបចំឡើងចាប់ពីថ្ងៃទី១៩ខែឧសភាដល់ថ្ងៃទី២២នៅមជ្ឈមណ្ឌលកោះពេជ្រទីក្រុងភ្នំពេញ។ គម្រោងរៀបចំពិព័រណ៍ផលិតផលថៃនេះបានធ្វើឡើងក្រោយពេលដែលប្រទេសកម្ពុជានិងប្រទេសថៃបានបោះសម្ដីដាក់គ្នាពីរឿងលទ្ធភាពបិទការចរាចរណ៍ទំនិញរវាងប្រទេសទាំងពីរដោយសារទំនាស់ព្រំដែន។
ចុះផ្សាយនៅថ្ងៃ៖
ស្តាប់ - ០២:៣៩
បើទោះបីជាប្រទេសកម្ពុជានិងប្រទេសថៃនៅមិនទាន់រកឃើញដំណោះស្រាយជម្លោះព្រំដែនក៏ដោយក៏ពិព័រណ៍ផលិតផលថៃនៅក្នុងទីក្រុងភ្នំពេញនៅតែដំណើរការដូចការគ្រោងទុក។
ពិព័រណ៍ទំនិញថៃគ្រោងនឹងរៀបចំឡើងចាប់ពីថ្ងៃទី១៩ដល់ថ្ងៃទី២២ខែឧសភាខាងមុខនេះនៅមជ្ឈមណ្ឌលកោះពេជ្រទីក្រុងភ្នំពេញ។ សម្រាប់ពិព័រណ៍ថៃលើកនេះនឹងមានការចូលរួមពីពាណិជ្ជករខ្មែរផងដែរ។ បើយោងតាមគម្រោង ប្រទេសថៃមានស្តង់លក់ផលិតផលថៃចំនួនប្រមាណជា២០០ស្តង់រីឯប្រទេសកម្ពុជាវិញ អាចមានស្តង់ចំនួន២៤ដែលលក់ផលិតផលមកពី២៤ខេត្តក្រុងនៃប្រទេសកម្ពុជា។
មន្ត្រីជំនាញនៃនាយកដ្ឋានជំរុញពាណិជ្ជកម្មក្រសួងពាណិជ្ជកម្មខ្មែរដែលសុំមិនបញ្ចេញឈ្មោះបានបញ្ជាក់ប្រាប់នៅថ្ងៃសៅរ៍នេះថា រហូតមកដល់ពេលនេះ គម្រោងរៀបចំពិព័រណ៍ផលិតផលថៃនៅរក្សាដដែលពោលគឺមិនមានសញ្ញាលុបចោលណាមួយដោយសារតែភាពតានតឹងនៅតំបន់ព្រំដែននាពេលកន្លងមកថ្មីៗនោះទេ។ មិនត្រឹមតែប៉ុណ្ណោះ ប្រទេសកម្ពុជាគ្រោងបើកស្តង់ចំនួន២៤របស់ខ្លួននៅក្នុងពិព័រណ៍ថៃនេះដែរ។
ទាក់ទងទៅនឹងការរៀបចំពិព័រណ៍ថៃនៅក្នុងប្រទេសកម្ពុជានេះមន្ត្រីថៃបានប្រាប់កាសែតក្នុងស្រុកកាលពីដើមខែឧសភានេះថា ភាគីថៃនឹងប្រកាន់ជំហររៀបចំពិព័រណ៍ផលិតផលថៃដដែលនៅចុងខែឧសភានេះ។ ជាធម្មតា ប្រទេសថៃតែងតែរៀបចំពិព័រណ៍ផលិតផលរបស់ខ្លួនជារៀងរាល់ឆ្នាំនៅក្នុងប្រទេសកម្ពុជាប៉ុន្តែចាប់តាំងពីប្រទេសទាំងពីរមានជម្លោះព្រំដែននឹងគ្នាមក គេតែងតែលេចឮដំណឹងលុបចោលនៃការរៀបចំពិព័រណ៍ផលិតផល។
គម្រោងរៀបចំពិព័រណ៍នៅចុងខែនេះបានធ្វើឡើងបន្ទាប់ពីព្រះរាជាណាចក្រជិតខាងទាំងពីរបានដំឡើងសំឡេងដាក់គ្នាពីលទ្ធភាពបិទច្រកព្រំដែននិងការធ្វើពហិការមិនប្រើប្រាស់ទំនិញទៅវិញទៅមក។ កាលពីចុងខែមេសាកន្លងមកនេះ ដោយសារការបាញ់ប្រយុទ្ធគ្នា អ្នកនយោបាយថៃមានចេតនាចង់ប្រកាសបិទព្រំដែនប៉ុន្តែរំពេចភ្លាមនោះលោកនាយករដ្ឋមន្ត្រីខ្មែរ ហ៊ុន សែន បានព្រមានវិញថា ប្រសិនបើថៃបិទព្រំដែន ប្រជាជនខ្មែរនឹងឈប់ទិញផលិតផលរបស់ថៃ។
កាលពី១០ឆ្នាំមុន ប្រទេសកម្ពុជាប្រើប្រាស់ផលិតផលថៃស្ទើរទាំងស្រុងប៉ុន្តែក្នុងរយៈពេលចុងក្រោយនេះ ប្រទេសកម្ពុជាមានជម្រើសរវាងផលិតផលថៃនិងផលិតផលវៀតណាមនិងផលិតផលចិន។
តួលេខមួយចំនួនបានបង្ហាញថា កាលពីឆ្នាំ២០១០កន្លងមក ការផ្លាស់ប្ដូរពាណិជ្ជកម្មនៃប្រទេសទាំងពីរមានទំហំទឹកប្រាក់ជាង២៥០០លានដុល្លារអាមេរិកក្នុងនោះប្រទេសថៃនាំចេញមកកម្ពុជាជាង២៣០០លានដុល្លាររីឯកម្ពុជានាំចេញទៅប្រទេសថៃវិញតែក្នុងទឹកប្រាក់ជាង២០០លានដុល្លារអាមេរិកប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ