កម្ពុជាស្វែងរកការយល់ព្រមពីសភា លើអនុសញ្ញាស្តីពីការកំណត់ចំណុចប្រសព្វខ្សែព្រំដែនកម្ពុជា ឡាវ និងវៀតណាម
ក្នុងពេលបន្ទាត់ព្រំដែនកម្ពុជា ថៃកំពុងមានជម្លោះ រដ្ឋាភិបាលកម្ពុជាជិតបញ្ចប់ការបោះបង្គោលព្រំដែន និងការកំណត់បន្ទាត់ព្រំដែនជាមួយប្រទេសឡាវ និងប្រទេសវៀតណាមហើយ ទោះបីជាពេលកន្លងមក អនុសញ្ញា ឬកិច្ចព្រមព្រៀង នានា រវាងរដ្ឋាភិបាលកម្ពុជាជាមួយប្រទេសទំាងពីរទទួលរងការរិៈគន់ និងចោទប្រកាន់ថា បានធ្វើអោយបាត់បង់ទឹកដីកម្ពុជាយ៉ាងណាក្តី។ រដ្ឋាភិបាលកម្ពុជាកំពុងស្វែងរកការគំាទ្រពីស្ថាប័ននីតិបញ្ញត្តិបន្តទៀត លើអនុសញ្ញារបស់ខ្លួនដែលបានធ្វើជាមួយប្រទេសឡាវ និងវៀតណាម។ អនុញ្ញាស្តីពីចំណុចប្រសព្វខ្សែបន្ទាត់ព្រំដែនកម្ពុជា វៀតណាម និងឡាវ គឺជាចំណុចសំខាន់នៅពេលប្រទេសទំាងបីជិតបញ្ចប់ការបោះបង្គោលព្រំដែន និងការឯកភាពគ្នាលើបន្ទាត់ព្រំដែន។ មិនខុសពីលើកមុនៗ គណបក្សប្រឆំាងប្រកាសមិនគំាទ្រអនុសញ្ញានេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
កាលពីឆ្នាំ២០០៨ លោកវ៉ា គឹមហុង ប្រធានគណៈកម្មាធិការចម្រុះកិច្ចការព្រំដែន តំណាងអោយរដ្ឋាភិបាលកម្ពុជា បានចុះហត្ថលេខាជាមួយសមភាគីរបស់លោក តំណាងអោយរដ្ឋាភិបាលឡាវ និងវៀតណាមលើអនុសញ្ញាកំណត់ចំណុចប្រសព្វនៃខ្សែព្រំដែនរវាងប្រទេសទំាងបី នៅក្នុងទីក្រុងហាណូយ ប្រទេសវៀតណាម។ ខ្លឹមសារនៃអនុសញ្ញាប្រទេសទំាងបីបានកំណត់ថា ប្រទេសកម្ពុជា ឡាវ និងវៀតណាមត្រូវបោះបង្គោលព្រំដែនមួយ ត្រង់ចំណុចពិតប្រាកដនៃចំណុចប្រសព្វនៃខ្សែព្រំដែនទំាងបីប្រទេស។ ប្រទេសទំាងបីមិនអាចបង្ខិត ឬផ្លាស់ប្តូរទម្រង់បង្គោលព្រំដែននោះជាឯកតោភាគីបានឡើយ។
ថ្មីៗនេះ រដ្ឋាភិបាលកម្ពុជាបានដាក់អនុសញ្ញានេះទៅអោយសភាអនុម័តយល់ព្រម ដើម្បីអោយដំណើរការបោះបង្គោលព្រំដែនរវាងប្រទេសកម្ពុជា ឡាវ និងវៀតណាមឈានដល់ចំណុចបញ្ចប់។ លោកនាយករដ្ឋមន្រ្តីហ៊ុន សែនបានសរសេរលិខិតផ្ញើជូនប្រធានរដ្ឋសភាស្នើសុំអោយសភាអនុម័តអនុសញ្ញានេះជាប្រញាប់ ពីព្រោះប្រទេសឡាវ និងវៀតណាមបានផ្តល់សច្ចាប័នលើអនុសញ្ញានេះរួចហើយ នៅសល់តែកម្ពុជាមួយប៉ុណ្ណោះ។ ភ្លាមៗបន្ទាប់ពីទទួលលិខិតអញ្ជើញរបស់ប្រធានរដ្ឋសភាអោយចូលរួមប្រជុំអនុម័តអនុសញ្ញានេះ តំណាងរាស្រ្តគណបក្សសិទ្ឋិមនុស្ស និងគណបក្សសម រង្ស៊ីបានបដិសេធមិនចូលរួមប្រជុំសភា ហើយបើចូលរួមប្រជុំក៏មិនលើកដៃគំាទ្រអនុសញ្ញានេះដែរ។ គណបក្សប្រឆំាងទំាងពីរអះអាងជាសម្តី និងជាលិខិតក្នុងន័យស្រដៀងគ្នាថា អនុសញ្ញានេះនឹងធ្វើអោយបាត់បង់ទឹកដីកម្ពុជា ទៅខាងប្រទេសឡាវ និងវៀតណាម។ ប្រទេសកម្ពុជាមានបន្ទាត់ព្រំដែនជាមួយប្រទេសវៀតណាម ចំនួន ១២៧០គីឡូម៉ែត្រ។ កម្ពុជា វៀតណាមគ្រោងបោះបង្គោលព្រំដែនអោយចប់សព្វគ្រប់ក្នុងឆ្នាំ២០១២ខាងមុខនេះ។ ចំណែកបន្ទាត់ព្រំដែនកម្ពុជាជាមួយប្រទេសឡាវ មានប្រវែង៥៤០គីឡូម៉ែត្រ។ ប្រទេសទំាងពីរបានឯកភាពគ្នាលើបន្ទាត់ព្រំដែនបានចំនួន៨៦% រួចហើយដែរ។ កម្ពុជា ឡាវក៏កំពុងបន្តពិភាក្សាគ្នាទៀត លើចំណុចនៅសេសសល់។
រដ្ឋសភានឹងបើកកិច្ចប្រជុំដើម្បីអនុម័តលើអនុសញ្ញាចំណុចប្រសព្វខ្សែបន្ទាត់ព្រំដែនកម្ពុជា វៀតណាម និងឡាវក្នុងសប្តាហ៍ក្រោយនេះ ទោះបីជាគណបក្សសម រង្ស៊ី និងសិទ្ធិមនុស្សមិនលើកដៃគំាទ្រអនុសញ្ញានេះយ៉ាងណាក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ