ហ៊ុន សែន៖ គ្មានការដោះដូរអ្នកទោស ជាមួយថៃដាច់ខាត
នាយករដ្ឋមន្ត្រីកម្ពុជាលោកហ៊ុន សែនបានចេញមុខនៅថ្ងៃពុធ ទី១៥ មិថុនា ប្រកាសច្រានចោលការចោទប្រកាន់ដដែលៗរបស់មេដឹកនាំថៃ មកលើបុរសជនជាតិខ្មែរដែលថៃបានចាប់ឃុំខ្លួន។ ក្រៅពីប្រកាសបដិសេធការចោទប្រកាន់ថា ជនជាតិខ្មែរជាអ្នកធ្វើ ចារកម្មនោះ ប្រមុខរដ្ឋាភិបាលភ្នំពេញអះអាងនៅថ្ងៃនេះថា គ្មានឡើយការដោះដូរអ្នកទោសថៃ ជាមួយជនជាតិខ្មែរដែលថៃចាប់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
សេចក្តីថ្លែងការណ៍របស់លោកហ៊ុន សែននៅថ្ងៃពុធ ល្មមអាចបិទបញ្ចប់ការអត្ថាធិប្បាយរបស់មេដឹកនាំថៃបាន។ មេដឹកនាំរដ្ឋាភិបាលក្រុងបាងកក ដែលក្រោយពីមានការចាប់ខ្លួនជនជាតិខ្មែរម្នាក់ រួមជាមួយជនជាតិថៃនិងជនជាតិវៀតណាមនោះ ហើយសង្ស័យពួកគេថា ធ្វើចារកម្មនោះ ស្រាប់តែបង្ហើបពីបំណងរបស់ខ្លួនចង់ដោះដូរជនសង្ស័យទាំងនោះ ជាមួយពិរុទ្ធជនថៃពីរនាក់ដែលកំពុងជាប់ឃុំឃាំងនៅកម្ពុជា។
ទំនងជាមិនទាន់បានឮជំហររបស់លោកនាយករដ្ឋមន្ត្រីខ្មែរ ហ៊ុន សែន ផ្ទាល់ត្រចៀក ទើបកន្លងមកនេះ នាយករដ្ឋមន្ត្រីថៃ រដ្ឋមន្ត្រីការបរទេសថៃ និងឧបនាយករដ្ឋមន្ត្រីថៃទទួលបន្ទុកសន្តិសុខ នៅតែនិយាយឆ្លងឆ្លើយម្តងហើយម្តងទៀត ជាមួយមន្ត្រីអ្នកនាំពាក្យរបស់កម្ពុជា អំពីបំណងចង់ប្តូរអ្នកទោស។
មេដឹកនាំថៃនិយាយភាសាប្តូរអ្នកទោសជាមួយកម្ពុជាមានតែធ្វើអោយលោកនាយករដ្ឋមន្ត្រីហ៊ុន សែន ស្តីបន្ទោសអោយតែប៉ុណ្ណោះ។ លោកហ៊ុន សែនបានមានប្រសាសន៍ថា បុរសខ្មែរនៅមិនទាន់ត្រូវបានតុលាការថៃកាត់ទោសនិងចោទប្រកាន់ជាផ្លូវការអំពីបទល្មើសអ្វីផង មេដឹកនាំថៃនិយាយរឿងប្តូរអ្នកទោសទៅហើយ។ ប៉ុន្តែនិយាយយ៉ាងដូច្នេះ ក៏មិនប្រាកដថា កម្ពុជានឹងអាចនិយាយអំពីការប្តូរអ្នកទោសនៅពេលខាងមុខនោះឡើយ។ ប្រមុខរដ្ឋាភិបាលកម្ពុជាបានថ្លែងអោយអាជ្ញាធរថៃអនុវត្តតាមច្បាប់របស់ខ្លួនចុះ។
ប្រហែលជាចង់ចំអកអោយថៃផង ប្រមុខរដ្ឋាភិបាលកម្ពុជាបានថ្លែងផ្តាំដល់មន្ត្រីរបស់ខ្លួន អោយប្រុងប្រយ័ត្ននៅពេលធ្វើដំណើរទៅប្រទេសថៃ។ ប្រុងប្រយ័ត្នក្រែងអាជ្ញាធរថៃចាប់ខ្លួន ដើម្បីយកមកប្តូរជាមួយអ្នកទោសថៃនៅកម្ពុជា។
កាលពីថ្ងៃទី១កុម្ភៈតុលាការកម្ពុជាបានសម្រេចផ្តន្ទាទោស សកម្មជនថៃអាវលឿង២នាក់ គឺវីរៈស៊ុមខ្វាមឃីតអោយជាប់ពន្ធនាគារ៨ឆ្នាំ និងបង់ពិន័យ១លាន៨សែនរៀល និងនាងរ៉ាត់ទ្រីអោយជាប់ឃុំឃាំង៦ឆ្នាំ និងបង់ពិន័យ១លាន២សែនរៀល ក្រោមបទល្មើសចារកម្ម ឆ្លងដែនខុសច្បាប់ចូលទឹកដីកម្ពុជា និងចូលក្នុងតំបន់យោធា។ អង្គហេតុនេះបានកើតឡើងនៅក្នុងភូមិជោគជ័យ ស្រុកអូរជ្រៅ ខេត្តបន្ទាយមានជ័យ កាលពីថ្ងៃទី២៩ខែធ្នូឆ្នាំ២០១០។ នៅពេលនោះមានមនុស្សទាំងអស់៧នាក់ ដែលក្នុងនោះមានតំណាងរាស្ត្រថៃគណបក្សប្រជាធិបតេយ្យរបស់លោកអាប់ភីស៊ីតមួយរូបផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ