កម្ពុជានឹងមានរោងចក្រចម្រាញ់ប្រេងតម្លៃ ១៦០០លានដុល្លារ
កន្លងទៅថ្មីៗនេះ អាជ្ញាធរប្រេងកាតជាតិកម្ពុជាបានចុះហត្ថលេខាអនុញ្ញាតអោយក្រុមហ៊ុន Cambodian Petrochemical សិក្សាលទ្ធភាពសាងសង់រោងចក្រចម្រាញ់ប្រេងកាត។ ឧកញ៉ាហាន់ ឃៀងតំណាងក្រុមហ៊ុន Cambodian Petrochemicalបានអះអាងថា ក្រុមហ៊ុនរបស់លោកបានចាប់ផ្តើមការសិក្សាលើការសាងសង់រោចក្រនេះហើយ រោងចក្រនេះដែលមានតម្លៃ១៦០០លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
រោងចក្រចម្រាញ់ប្រេងកាតនៅកម្ពុជាអាចនឹងមានរូបរាងនៅក្នុងអំឡុង៣ឆ្នាំខាងមុខនេះ។ រោងចក្រនេះមានតម្លៃ១៦០០លានដុល្លារជារោងចក្រដែលនឹងត្រូវសាងសង់ដោយក្រុមហ៊ុនCambodian Petrochemicalដែលមានភាគហ៊ុនកម្ពុជានិងចិន។ ឧកញ៉ាហាន់ ឃៀង តំណាងក្រុមហ៊ុនCambodian Petrochemicalបានថ្លែងប្រាប់វិទ្យុបារាំងអន្តរជាតិថា រោងចក្រនេះនឹងបោះទីតាំងនៅព្រំប្រទល់ខេត្តកំពត និងខេត្តព្រះសីហនុលើផ្ទៃដីជាង៣ ០០០ហិចតា។
សមត្ថភាពរបស់ម៉ាស៊ីនចម្រាញ់ប្រេងនៃរោងចក្រនេះ យោងតាមការបញ្ជាក់របស់ឧកញ៉ាហាន់ ឃៀង អាចផលិតប្រេងបាន៥លានតោនក្នុងមួយឆ្នាំ ដែលក្នុងនោះមានប្រេងសាំង ប្រេងម៉ាស៊ូតនិងប្រេងយន្តហោះផងដែរ។ រោងចក្រនេះនឹងត្រូវតំឡើងមិនត្រឹមតែរង់ចាំចម្រាញ់ប្រេងឆៅរបស់កម្ពុជាតែមួយប៉ុណ្ណោះទេ ប៉ុន្តែរោងចក្រនេះនឹងត្រៀមចម្រាញ់ប្រេងឆៅដែលនាំយកពីប្រទេសអារ៉ាប់ដូចគ្នា។
កម្ពុជាសង្ឃឹមថាខ្លួននឹងបានឃើញតំណក់ប្រេងរបស់ខ្លួនជាលើកដំបូងនៅក្នុងឆ្នាំ២០១២ខាងមុខ ហើយថាធនធានរ៉ែក្រោមដីបាតសមុទ្រមួយនេះនឹងជួយសេដ្ឋកិច្ចកម្ពុជាអោយងើបស្ទុះទៅមុខយ៉ាងលឿន។ ថ្លែងប្រាប់អ្នកកាសែតកាលពីថ្ងៃព្រហស្បតិ៍ម្សិលមិញលោកគាត ឈន់រដ្ឋមន្ត្រីសេដ្ឋកិច្ចបានអះអាងថាការនាំចូលប្រេងសព្វថ្ងៃគឺជាកត្តាមួយដែលធ្វើអោយមានអតិផរណាតម្លៃទំនិញនៅក្នុងទីផ្សារកម្ពុជា។
រោងចក្រចម្រាញ់ប្រេងកាតខាងមុខនេះអាចផ្តល់ឱកាសការងារប្រមាណ៤០០០កន្លែង ហើយអត្ថិភាពនៃរោងចក្រនេះនឹងនាំអោយមានការកាត់បន្ថយការហូរចេញរូបិយបណ្ណរបស់កម្ពុជាទៅបរទេសព្រោះតែការនាំចូលប្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ