ស្តូបរម្លឹកវិញ្ញាណក្ខន្ធអ្នកស្លាប់នៅកោះពេជ្រចាប់ផ្តើមសាងសង់ហើយ
ទីបំផុតទៅ ស្តូបរំលឹកវិញ្ញាណក្ខន្ធអ្នកស្លាប់នៅកោះពេជ្រ ត្រូវបានបញ្ចុះបឋមសិលា ដើម្បីផ្តើមការសាងសង់ នៅព្រឹកថ្ងៃព្រហស្បតិ៍ ទី១១សីហានេះ។ តាមលោក កែប ជុតិមា អភិបាលក្រុងភ្នំពេញ ស្តូបរម្លឹកវិញ្ញាណក្ខន្ធ ដែលត្រូវចំណាយថវិកាជាង ១២ ម៉ឺនដុល្លារ នៅគល់ស្ពានពេជ្រ ត្រើយខាងលិច ដើម្បីឧទ្ទិសដល់វិញ្ញាណក្ខន្ធមនុស្សយ៉ាងហោចណាស់ ៣៥៣ នាក់ ដែលបានស្លាប់ក្នុងឧបទ្ទវហេតុផ្អើលរត់ជាន់គ្នានៅលើស្ពានកោះពេជ្រ ក្នុងយប់ថ្ងៃបង្ហើយនៃពិធីបុណ្យអុំទូកថ្ងៃទី២២វិច្ឆិកាឆ្នាំ ២០១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ក្នុងពិធីបញ្ចុះបឋមសិលាដែលជាសញ្ញាចាប់ផ្តើមសាងសង់ស្តូបរម្លឹកវិញ្ញាណក្ខន្ធអ្នកស្លាប់ ៣៥៣ នាក់ លើស្ពានកោះពេជ្រ នៅព្រឹកថ្ងៃទី១១សីហាឆ្នាំ២០១១ចូលរួមដោយលោក កែប ជុតិមា អភិបាលក្រុងភ្នំពេញតំណាងម្ចាស់មូលនិធិវិទ្យុនិងទូរទស្សន៍បាយ័ន, មូលនិធិទូរទស្សន៍ស៊ីធីអិន និងលោកឧកញ៉ា ពុង ខៀវសែ ប្រធានក្រុមហ៊ុនអភិវឌ្ឍន៍កោះពេជ្រ។
តាមការបញ្ជាក់របស់លោក កែប ជុតិមា អភិបាលក្រុងភ្នំពេញ ការស្ថាបនាស្តូបនៅគល់ស្ពានពេជ្រ ដើម្បីឧទ្ទិសដល់វិញ្ញាណក្ខន្ធអ្នកស្លាប់ក្នុងឧបទ្ទវហេតុរត់ជាន់គ្នានៅលើស្ពានពេជ្រ កាលពីយប់ថ្ងៃទី២២វិច្ឆិកាឆ្នាំ២០១០ក្នុងថ្ងៃបង្ហើយនៃពិធីបុណ្យអុំទូក។ ជាឧបទ្ទវហេតុ ដែលលោកអភិបាលក្រុងគូសបញ្ជាក់ថា ត្រូវបានកត់ត្រាទុកជាប្រវត្តិសាស្ត្ររបស់ក្រុងភ្នំពេញ និងជាមេរៀនដ៏ឈឺចាប់មួយដែលគ្មាននរណាម្នាក់អាចបំភ្លេចបានទេ ពិសេសគឺអាជ្ញាធរសមត្ថកិច្ច ត្រូវគិតពីការធានាសុវត្ថិភាពមហាជននៅពេលបុណ្យទានធំៗឲ្យបានម៉ត់ចត់ទៅថ្ងៃខាងមុខ។
លោក កែប ជិតិមា បានបញ្ជាក់ថា ការសាងសង់ស្តូបនោះ ត្រូវចំណាយថវិកាជាង ១២ ម៉ឺនដុល្លារអាមេរិក បានមកពីមូលនិធិទូរទស្សន៍ និងវិទ្យុបាយ័ន, ទូរទស្សន៍ស៊ីធីអិន ក្រុមហ៊ុនអភិវឌ្ឍន៍កោះពេជ្រ និងសាលាក្រុងភ្នំពេញ។ ស្តូបរម្លឹកវិញ្ញាណក្ខន្ធនោះ នឹងត្រូវសាងសង់អោយរួចរាល់នៅមុនខួបមួយឆ្នាំនៃឧបទ្ទវហេតុលើស្ពានកោះពេជ្រកាលពីយប់ថ្ងៃទី២២វិច្ឆិកា។
តាមគម្រោងការសាងសង់ស្តូបរម្លឹកវិញ្ញាណក្ខន្ធនៅកោះពេជ្រ ត្រូវសាងសង់លើទីតាំងដីទំហំ ៣៣ម៉ែត្រ x ៣២ម៉ែត្រ ជាប់នឹងគល់ស្ពានពេជ្រត្រើយខាងលិច។ ស្តូបនោះ ត្រូវមានលក្ខណៈជាថ្មគោលព្រហ្មមុខ ៤ ដែលមានអត្ថន័យតំណាងនូវព្រហ្មវិហារធម៌ ៤ យ៉ាង ដែលជាលំនៅនៃចិត្តដ៏ប្រសើរបំផុត គឺ មេត្តា ករុណា មុទិតា ឧបេក្ខា។ នៅលើកំពូលនៃថ្មគោល មានរំលេចនូវរូបព្រហ្មមុខ៤ បែរទៅរកទិសធំទាំង៤ តំណាងឱ្យឋានជាទីសុខដ៏ប្រសើរ( ឋានស្ងប់ ) ដើម្បីដឹកនាំវិញ្ញាណក្ខន្ធនៃជនរងគ្រោះនៅលើស្ពានពេជ្រទៅកាន់សុគតិភព។
សាលាក្រុងក៏មានបំណងឲ្យកន្លែងមានការស្ថាបនាទីតាំងស្តូបរម្លឹកវិញ្ញាណក្ខន្ធអ្នកស្លាប់នៅកោះពេជ្រ ជាកន្លែងសម្រាប់ការរម្លឹកដល់ឧបទ្ទវហេតុផង ហើយក៏អាចជាទីរមណីយដ្ឋានមួយសម្រាប់ប្រជាពលរដ្ឋសម្រាកហែកំសាន្តបាន ដោយពុំមានអារម្មណ៍ភ័យខ្លាចឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ