ជំងឺផ្តាសាយបក្សីផ្តាច់ជីវិតជនជាតិខ្មែរទី១៦
ក្រសួងសុខាភិបាលនិងអង្គការសុខភាពពិភពលោកបានប្រកាសអោយដឹងកាលពីម្សិលមិញថា ជំងឺផ្តាសាយបក្សីបានផ្តាច់ជីវិតជនជាតិខ្មែរទី១៦ហើយកាលពីសប្តាហ៍មុន។ អ្នកស្លាប់ចុងក្រោយនេះគឺជាកុមារីមានអាយុ៦ឆ្នាំរស់នៅស្រុកជើងព្រៃខេត្តកំពង់ចាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ជំងឺផ្តាសាយបក្សីបានសម្លាប់ប្រជាជនខ្មែរម្នាក់ទៀតហើយនៅពេលនេះបន្ទាប់ពីអ្នកជំងឺស្នាក់នៅក្នុងមន្ទីរពេទ្យអស់រយៈពេលពីរថ្ងៃរួចមក។
កុមារីអាយុ៦ឆ្នាំនៅក្នុងខេត្តកំពង់ចាមត្រូវបានជំងឺផ្តាសាយបក្សីH5N1 ផ្តាច់ជីវិតកាលពីថ្ងៃទី១៤ខែសីហាកន្លងមក។ កុមារីនេះគឺជាមនុស្សខ្មែរទី១៦ហើយដែលជំងឺផ្តាសាយបក្សីបានឆក់យកជីវិតតាំងពីមានការសាយភាយជំងឺនេះនៅក្នុងប្រទេសកម្ពុជាមក។ លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានថ្លែងប្រាប់នៅល្ងាចថ្ងៃសៅរ៍នេះថា កុមារីនោះបានឆ្លងជំងឺដោយសាររូបគេបានប៉ះពាល់សត្វមាន់ផ្ទុកជំងឺផ្តាសាយបក្សី។
លោក សុខ ទូច ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានបញ្ជាក់បន្ថែមទៀតថា ក្រុមការងាររបស់លោកបាននិងកំពុងតាមដានមនុស្សមួយចំនួនដែលបានប៉ះពាល់សត្វមាន់ឈឺនៅក្នុងតំបន់កើតជំងឺផ្តាយសាយបក្សី។ ប៉ុន្តែបន្ទាប់ពីធ្វើតេស្តជាមួយមនុស្ស១៥នាក់រួចមក គេពុំឃើញមានសញ្ញាជំងឺអ្វីទេ។ ទោះជាយ៉ាងណាក៏ដោយ ក៏មន្រ្តីសុខាភិបាលរូបនេះបានបញ្ជាក់ទៀតថា ការតាមដានត្រូវតែធ្វើបន្តក្នុងរយ
ៈពេល២ឬ៣សប្តាហ៍ទៀត។
ប្រសិនបើគេនិយាយពីករណីជំងឺផ្តាសាយបក្សីកើតឡើងនៅក្នុងប្រទេសកម្ពុជាវិញ គេកត់សម្គាល់ឃើញថា នេះគឺជាករណីទី១៨ហើយដែលមានមនុស្សឆ្លងជំងឺផ្តាសាយបក្សី ក្នុងនោះ៨ករណីបានកើតឡើងនៅក្នុងឆ្នាំ ២០១១នេះ។ ក្នុងចំណោម៨ករណីនេះ មនុស្សទាំងអស់បានបាត់បង់ជីវិត។
សេចក្តីប្រកាសព័ត៌មានរួមគ្នារវាងក្រសួងសុខាភិបាលនិងអង្គការសុខភាពពិភពលោកដែលបានចេញផ្សាយកាលពីថ្ងៃម្សិលមិញបានលម្អិតប្រាប់ថា កុមារីអាយុ៦ឆ្នាំរូបនេះមានសញ្ញាឆ្លងជំងឺផ្តាសាយបក្សីតាំងពីថ្ងៃទី៧ខែសីហាមកម្ល៉េះ បន្ទាប់មករូបគេត្រូវបានព្យាបាលដោយគ្រូពេទ្យនៅក្នុងខេត្តនិងបន្ទាប់មកទៀតត្រូវបានបញ្ជូនមកមន្ទីរពេទ្យគន្ធបុប្ជានៅទីក្រុងភ្នំពេញ។ ប៉ុន្តែជាអកុសល កុមារីនោះបានបាត់បង់ជីវិតនៅថ្ងៃទី១៤ខែសីហាបន្ទាប់ពីទទួលការព្យាបាលបានរយៈពេលពីរថ្ងៃរួចមក។
សូមបញ្ជាក់ថា រហូតដល់ពេលនេះមានមនុស្សជាង៣០០នាក់ហើយបានស្លាប់ដោយសារមេរោគផ្តាសាយបក្សីនៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ