របាយការណ៍៖ ក្រុមគ្រួសារអ្នកផ្ទុកមេរោគអេដស៍នៅកម្ពុជា ប៉ះពាល់សេដ្ឋកិច្ច ពិសេសស្ត្រី
របាយការណ៍ដែលសិក្សារួមគ្នារវាងអាជ្ញាធរជាតិប្រយុទ្ធនឹងជំងឺអេដស៍ និងអង្គការសហប្រជាជាតិ ត្រូវបានផ្សព្វផ្សាយជាផ្លូវការ នៅព្រឹកថ្ងៃទី២៥សីហានេះ បានរំលេចឡើងអំពីបញ្ហាប្រឈមនានា ខាងផ្នែកសេដ្ឋកិច្ចនិងសង្គម ដែលគ្រួសារអ្នកផ្ទុកមេរោគអេដស៍ជួបប្រទះនៅកម្ពុជា។ របាយការណ៍ដែលប្រមូលទិន្នន័យពីគ្រួសារជាង ៤០០០ ក៏បានទាញការចាប់អារម្មណ៍ និងយកចិត្តទុកដាក់ទៅលើតម្រូវការក្នុងការរៀបចំបង្កើតយន្ដការជាតិ ដើម្បីការពារសង្គម សម្រាប់អ្នកផ្ទុកមេរោគអេដស៍ផងដែរ។
ចុះផ្សាយនៅថ្ងៃ៖
ស្តាប់ - ០៣:០៧
អាជ្ញាធរជាតិប្រយុទ្ធនឹងជំងឺអេដស៍ និងអង្គការសហប្រជាជាតិ ប្រចាំនៅកម្ពុជា បានផ្សព្វផ្សាយរបាយការណ៍រួម ស្តីពី ផលប៉ះពាល់ខាងសេដ្ឋកិច្ចសង្គមនៃមេរោគអេដស៍ មកលើក្រុមគ្រួសារនៅប្រទេសកម្ពុជា នៅថ្ងៃ២៥សីហា ឆ្នាំ២០១១។
របាយការណ៍បង្ហាញថា កម្ពុជាបានធ្វើឲ្យមានការរីកចម្រើនគួរឲ្យកត់សម្គាល់ក្នុងការទប់ស្កាត់ និងកាត់បន្ថយការឆ្លងរីករាលដាលនៃមេរោគអេដស៍នៅទូទាំងប្រទេស។ កម្ពុជាក៏បានពង្រីកសេវាផ្ដល់ថ្នាំព្យាបាលប្រឆាំងនឹងមេរោគអេដស៍ ព្រមទាំងសេវាព្យាបាលជម្ងឺឱកាសនិយមនោះ។ ក៏ប៉ុន្តែរបាយការណ៍ដដែលក៏បានរកឃើញថា មេរោគអេដស៍នៅតែបន្តធ្វើឲ្យប៉ះពាល់យ៉ាងខ្លាំង ទៅលើក្រុមគ្រួសារនៅកម្ពុជា។
លោក ទា ផល្លា អនុប្រធានអាជ្ញាធរជាតិប្រយុទ្ធនឹងជំងឺអេដស៍ បានលើកឡើងថា តាមការសិក្សារកឃើញថា ស្ត្រីខ្មែរភាគច្រើន ជាអ្នករងគ្រោះដោយការឆ្លងមេរោគអេដស៍ពីប្តី និងក្លាយជាស្ត្រីមេម៉ាយ នៅថែរក្សាកូន ដែលផ្ទុកមេរោគអេដស៍។ ម្យ៉ាងទៀតក្រុមគ្រួសារអ្នកផ្ទុកមេរោគអេដស៍ ក៏ត្រូវអស់ដីអស់ផ្ទះ ដោយសារតែលក់មើលជំងឺផងដែរ។
ចំណែកលោក ឌូក្លាស ប្រូដឺរិក ( Douglas Broderick ) ប្រធានសម្របសម្រួលអង្គការសហប្រជាជាតិ ប្រចាំនៅកម្ពុជា បានលើកឡើងថា ការសិក្សារួមគ្នានោះ បានបង្ហាញអំពីភាពងាយរងគ្រោះបំផុតនៃគ្រួសារអ្នកផ្ទុកមេរោគអេដស៍ ដែលប្រឈមនឹងវិបត្តិសេដ្ឋកិច្ច។
តាមមន្ត្រីអង្គការសហប្រជាជាតិ លទ្ធផលរកឃើញបង្ហាញថា គ្រួសារអ្នកផ្ទុកមេរោគអេដស៍ជួបប្រទះការថយចុះនូវប្រាក់ចំណូល រួមផ្សំជាមួយនឹងការកើតឡើងនៃចំណាយខាងផ្នែកវេជ្ជសាស្ដ្រ ដែលបញ្ហាទាំងអស់នេះ ធ្វើឲ្យគ្រួសារ ងាកទៅប្រើប្រាស់យន្ដការដោះស្រាយដែលនាំទៅរកភាពក្រីក្រ ដូចជា ការថយចុះប្រាក់សន្សំ និងទ្រព្យសម្បត្តិ ព្រមទាំងកើតឡើងនូវការជំពាក់បំណុលជាដើម។ ទាំងនេះជាផលប៉ះពាល់ជាអវិជ្ជមានមកលើសន្ដិសុខស្បៀង និងសុខមាលភាព ចិត្តសង្គម ក៏ដូចជាប៉ះពាល់ដល់ស្ថានភាពស្ដ្រី និងការសិក្សារបស់កុមារ ។
លោក ប្រូដឺរិក បន្ថែមទៀតថា លទ្ធផលរកឃើញក្នុងរបាយការណ៍ គូសបញ្ជាក់អំពី សារៈសំខាន់នៃការពង្រីកកម្មវិធីជាតិ ការពារសង្គមសម្រាប់អ្នកផ្ទុកមេរោគអេដស៍ និងការធានាថា កិច្ចអន្តរាគមន៍កាត់បន្ថយភាពក្រីក្រ នឹងបានទៅដល់ជនក្រីក្របំផុត និងសមាជិកដែលងាយរងគ្រោះបំផុតនៅក្នុងសហគមន៍។
លទ្ធផលនៃការសិក្សាលើផលប៉ះពាល់នៃមេរោគអេដស៍ មកលើបុគ្គល និងក្រុមគ្រួសារនៅកម្ពុជាខាងលើនេះ បានមកពីទិន្នន័យ ដែលប្រមូលបានតាមរយៈការអង្កេតថ្នាក់ជាតិលើគ្រួសារចំនួន ៤១៧២ គ្រួសារ ក្នុងនោះគ្រួសារអ្នកផ្ទុកមេរោគអេដស៍ចំនួន ២៦២៣គ្រួសារ និង
គ្រួសារអ្នកគ្មានផ្ទុកមេរោគអេដស៍ចំនួន ១៥៤៩គ្រួសារ។ លទ្ធផលរកឃើញនេះ នឹងត្រូវប្រើប្រាស់ ដើម្បីពង្រឹងយុទ្ធសាស្ត្រ ដែលមានស្រាប់នៃការការពារ ព្យាបាល និងកាត់បន្ថយផលប៉ះពាល់ ដែលបណ្តាលមកពីមេរោគអេដស៍។
នៅកម្ពុជាមិនមានចំនួនអ្នកផ្ទុកមេរោគអេដស៍ជាក់លាក់ទេ។ តែតាមអាជ្ញាធរជាតិប្រយុទ្ធនឹងជំងឺអេដស៍ អ្នកឆ្លងមេរោគអេដស៍ នៅកម្ពុជា មានអត្រា ០,៨% ។ ចំណែកក្នុងឆ្នាំ២០១០ មានអ្នកឆ្លងមេរោគអេដស៍ចំនួន ៥៣០ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ