កិច្ចប្រជុំលើកទី៦នៃគណៈកម្មការអន្តររដ្ឋាភិបាលកម្ពុជា-រុស្ស៊ី
ជាលទ្ធផលនៃកិច្ចប្រជុំនេះដែលបានធ្វើការងារខ្លួនអស់២ថ្ងៃ គឺថ្ងៃ១៤និង១៥វិច្ឆិកា រសៀលម្សិលមិញនៅទីក្រុងម៉ូស្គូមានប្រព្រឹត្តទៅ ការចុះហត្ថលេខាលើពិធីសារទំហំ៤ទំព័រជាភាសាអង់គ្លេសនិងភាសារុស្ស៊ីដែលមានតម្លៃច្បាប់ស្មើគ្នា ស្តីអំពីសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិទ្យាសាស្ត្រ និងបច្ចេកទេស។កិច្ចប្រជុំលើកក្រោយលើកទី៧ត្រូវបានគូភាគីឯកភាពគ្នាថា នឹងប្រព្រឹត្តទៅ ក្នុងឆ្នាំ២០១២គឺនៅរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
តំណាងឲ្យភាគីកម្ពុជា ហត្ថលេខាបានត្រូវចុះដោយ លោកស្រី ស៊ុន សាភឿនរដ្ឋលេខាធិការក្រសួងការបរទេស ដែលជាប្រធានគណៈប្រតិភូកម្ពុជាមានមន្ត្រី៧នាក់បានចូលរួមក្នុងកិច្ចចរចា ជាមួយភាគីរុស្ស៊ី ទៅតាមការផ្ទុកផ្តាក់នៃ សហប្រធានគណៈកម្មការអន្តររដ្ឋាភិបាលកម្ពុជា-រុស្ស៊ី គឺលោក ហោ ណាំហុង ឧបនាយករដ្ឋមន្ត្រីការបរទេសនិងសហប្រតិបត្តិការអន្តរជាតិនៃរាជាណាចក្រកម្ពុជា។ ដោយស្ថិតក្នុងគណៈប្រតិភូកម្ពុជាបានវត្តមាននាកិច្ចចរចានោះ គឺ លោក ថៃ វណ្ណា ឯកអគ្គរាជទូតវិសាមញ្ញនិងពេញសមត្ថភាពនៃរាជាណាចក្រកម្ពុជាប្រចាំសហព័ន្ធរុស្ស៊ី។
ចំណែកតំណាងឲ្យភាគីរុស្ស៊ី ហត្ថលេខាបានត្រូវចុះដោយ លោក Alexandre Radkov ប្រធានទីភ្នាក់ងារទេសចរណ៍នៃសហព័ន្ធរុស្ស៊ី ក្នុងឋានៈជាសហប្រធានខាងភាគីរុស្ស៊ី របស់គណៈកម្មការអន្តររដ្ឋាភិបាលរុស្ស៊ី-កម្ពុជា។ គាត់បានចូលរួមក្នុងកិច្ចចរចា គឺដោយដឹកនាំគណៈប្រតិភូរុស្ស៊ីមានគ្នាដល់៤០នាក់ ដែលជំនួសមុខឲ្យក្រសួង មន្ទីរ និង ស្ថាប័នជាច្រើន ដែលពាក់ព័ន្ធនឹងទំនាក់ទំនងជាមួយកម្ពុជា។ បានស្ថិតក្នុងគណៈប្រតិភូរុស្ស៊ី ក៏ទាំងលោក Alexandre Ignatov ឯកអគ្គរដ្ឋទូតវិសាមញ្ញនិងពេញសមត្ថភាព របស់សហព័ន្ធរុស្ស៊ី ប្រចាំរាជាណាចក្រកម្ពុជា។
តាមពត៌មានទទួលបានដោយវិទ្យុបារាំងអន្តរជាតិ ពីលោកស្រី ស៊ុន សាភឿនរដ្ឋលេខាធិការ ក្រសួងការបរទេស ដែលជាប្រធានគណៈប្រតិភូកម្ពុជា ពិធីសារដែលមានចុះនោះ ឆ្លុះឲ្យឃើញពីការអភិវឌ្ឍន៍និងការពង្រឹងតទៅទៀត ទំនាក់ទំនងមិត្តភាព និងសហប្រតិបត្តិការរវាងប្រទេសកម្ពុជានិងរុស្ស៊ី។
តាមប្រសាសន៍លោកស្រី ដោយហេតុថាវិស័យកសិកម្ម ជាអាទិភាពមួយនៃនយោបាយរាជរដ្ឋាភិបាលកម្ពុជា បានជានាកិច្ចចរចាដែលបានប្រព្រឹត្តទៅភាគីកម្ពុជាបានលើកឡើង អំពីសំណូមពរ សុំឲ្យភាគីរុស្ស៊ីជួយធ្វើទំនើបកម្មដល់វិស័យនេះរបស់កម្ពុជា។ ដ្បិត កម្ពុជា ដែលជាប្រទេសនាំអង្ករចេញទៅក្រៅ ក្នុង១ឆ្នាំដល់៣លានតោន បែរទៅជានៅខ្វះនៅឡើយ រោងចក្រកិនស្រូវ តាមស្តង់ដារអន្តរជាតិ។ ក្នុងកិច្ចការនេះ ក៏ដូចជាខាងពង្រីកបណ្តាញ ធារាសាស្ត្ររបស់កម្ពុជា ភាគីរុស្ស៊ី ត្រៀមផ្តល់ការជួយជ្រោមជ្រែងរបស់ខ្លួន។
ភាគីរុស្ស៊ីបានសំដែងនូវការយកចិត្តទុកដាក់ទៅលើការអភិវឌ្ឍន៍វិស័យវារីអគ្គិសនី វិស័យរ៉ែ និងបង្កើនវិនិយោគថែមទៀត ទៅក្នុងវិស័យទូរគមនាគមន៍កម្ពុជា។
ភាគីរុស្ស៊ីក៏សន្យាជួយផ្សព្វផ្សាយ អំពីវិស័យទេសចរណ៍របស់កម្ពុជា និងបង្កើនថែមទៀត ចំនួនអ្នកទេសចរខ្លួនដែលទៅទស្សនាប្រទេសកម្ពុជាក្នុងឆ្នាំនេះឡើងដល់៣ម៉ឺននាក់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ