តើ លោក សម រង្ស៊ី នឹងអាចមានឈ្មោះ ក្នុងបញ្ជីឈ្មោះអ្នកបោះឆ្នោត និងឈរជាតំណាងរាស្ត្របាន ឬទេ?
ការសម្របសម្រួលនយោបាយមួយ រវាងគណបក្សនយោបាយធំៗ នៅកម្ពុជា បានអនុញ្ញាត្តិ ឱ្យលោក សម រង្ស៊ី ប្រធានគណបក្សសង្គ្រោះជាតិត្រឡប់ចូលស្រុកវិញដោយស្របច្បាប់។ ហើយមានសាធារណៈមតិចោទសួរថា ឈរលើគោលនយោបាយបង្រួមបង្រួមជាតិ នឹងអាចអនុញ្ញាត្តឱ្យ លោក សម រង្ស៊ី មានឈ្មោះបោះឆ្នោត និងអាចឈរឈ្មោះជាតំណាងរាស្ត្របានដែរឬទេ?
ចុះផ្សាយនៅថ្ងៃ៖
ស្តាប់ - ០២:២៣
លោកសម រង្ស៊ីនឹងធ្វើមាតុភូមិនិវត្តន៍ មកកម្ពុជាវិញដោយស្របច្បាប់ នៅថ្ងៃទី១៩ កក្កដាខាងមុខ។ តែបើគិតតាមផ្លូវច្បាប់របស់ គណកម្មាធិការជាតិរៀបចំការបោះឆ្នោត ដែលហៅកាត់ថា គ ជ ប លោកសម រង្ស៊ីនឹងមិនមានសិទ្ធិចូលរួមក្នុងការបោះឆ្នោត និងឈរឈ្មោះជាតំណាងរាស្ត្របានឡើយ។ នេះបើតាមការអះអាងរបស់លោកទេព នីថាអគ្គលេខាធិការ គ ជ ប។
លោកបន្ថែមថា បើទោះជាមានការស្មើសុំរបស់ គណបក្សសង្គ្រោះជាតិ និងមានការសម្រួលនយោបាយ ណាមួយក៏ដោយ ក៏មិនអាចបើកផ្លូវឱ្យលោក សម រង្ស៊ី ចុះឈ្មោះក្នុងបញ្ជីឈ្មោះ អ្នកបោះឆ្នោតបានដែរ ដោយសារតែមកដល់ពេលនេះ វាហួសនីតិវិធី។ ហើយលោក ទេព នីថា បន្ថែមថា គ ជ ប ជាស្ថាប័នមួយឯករាជ ដោយមិនចំណុះឱ្យស្ថាប័ន ឬបក្សនយោបាយណាមួយឡើយ។
សូមបញ្ជាក់ថា កន្លងមកលោកសមរង្ស៊ី ត្រូវបាន គ ជប លុបឈ្មោះចេញ បញ្ជីឈ្មោះអ្នកបោះឆ្នោត ដោយសារតែតុលារកម្ពុជា បានកាត់ទោសលោក ឱ្យជាប់ពន្ធនាគាចំនួន១១ឆ្នាំ ពីបទខ្លែងបន្លំឯកសារសាធារណៈ និងដកបង្គោលព្រំដែនកម្ពុជា វៀតណាម។ តែកាលពីថ្ងៃទី១២ កក្កដាកន្លងទៅ លោក ត្រូវបាន ព្រះមហាក្សត្យព្រះរាជទាន លើកលែងទោស។
លោក យឹម សុវណ្ណ អ្នកនាំពាក្យ របស់គណបក្សសង្គ្រោះជាតិអះអាងថា មិនមានការសម្រេចជាផ្លូវការណាមួយឡើយ លើការស្មើសុំដើម្បី ឱ្យលោក សម រង្ស៊ី អាចមានឈ្មោះបោះឆ្នោត និងឈរឈ្មោះជាតំណាងរាស្ត្រឡើយ នៅពេលបច្ចុប្បន្ន។
“ ឥឡូវយើងកំពុងរៀបចំការការទទួលលោកប្រធាន សម រង្ស៊ី វិលត្រឡប់មកមាតុប្រទេសវិញ។ ពេលដែលលោកមកដល់យើងនឹងគិតមួយជំហ៊ានទៀត ឥឡូវអត់ទាន់មានសេចក្តីសម្រេចអ្វីទាំងអស់ រង់ចាំពេលមានវត្តរបស់លោក ប្រធាននៅក្នុងប្រទេស នៅថ្ងៃទី១៩ កក្កដា។ រឿងទាំងអស់សុទ្ធតែរឿងនយោបាយទាំងអស់។ ដូច្នេះរឿងនយោបាយត្រូវដោះស្រាយតាមផ្លូវនយោបាយ។ ហើយនឹងដោះស្រាយឱ្យទាល់តែបាន។ ខ្ញុំមិនទាន់ជម្រាមជូនបាន តើវិធានការណ៍ណាទេ? ក៏ប៉ុន្តែ ពេលលោកប្រធានអញ្ជើញមកដល់ យើងនឹងធ្វើសេចក្ដីសម្រេចថាយើងគួរធ្វើយ៉ាងម៉េច។ “
គេបានដឹងហើយថា កន្លងទៅគណបក្សសង្គ្រោះជាតិបានប្រកាសគាំទ្រ លោក សម រង្ស៊ី ជាបេក្ខភាពនាយករដ្ឋមន្ត្រី បើសិនជាករណីដែលគណបក្សខាងលើជាប់ឆ្នោត សម្រាប់ការបោះឆ្នោតអណត្តទី៥ ដែលប្រព្រឹត្តទៅនៅថ្ងៃទី ២៨ កក្កដាខាងមុខ។
នៅពេលនេះ គេមិនទាន់ដឹងអំពី លទ្ធភាពណាមួយ ដែលអាចឱ្យលោក សម រង្ស៊ី នឹងមានឈ្មោះក្នុងបញ្ជីឈ្មោះ អ្នកបោះឆ្នោតបានឡើយ។ លោក កែវ ផល្លា ប្រធាននាយកដ្ឋានច្បាប់ និងវិវាទកម្មរបស់ គ ជ ប បានពន្យល់ថា៖ “ យើងប្រាកដហើយយថា ក្នុងច្បាប់បើធ្វើនាយករដ្ឋមន្ត្រីបាន លុះត្រាតែបេក្ខជន ហើយបេក្ខជនហ្នឹងជាប់ឆ្នោតទៀត។ ប៉ុន្តែ ដោយឡែក គាត់អត់មានជាបេក្ខជន ត្រូវឈរឈ្មោះ នៅខេត្តណា នៅមណ្ឌលណាមួយអញ្ចឹងផង គាត់អត់មានឈ្មោះក្នុងបញ្ជីឈ្មោះបោះឆ្នោត គាត់ម្ដេចនឹងអាចទៅធ្វើនាយករដ្ឋមន្ត្រីបានទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ