ច្បាប់ប្រឆាំងការមិនទទួលស្គាល់ឧក្រិដ្ឋកម្មក្នុងរបបខ្មែរក្រហម
នៅព្រឹកថ្ងៃសុក្រនេះ សមាជិករដ្ឋសភា ពិសេសសមាជិកសភា មកពីគណបក្សប្រជាជនកម្ពុជានឹងចូលទៅអនុម័តសេចក្តីស្នើច្បាប់ស្តីពីការប្រឆាំងការមិនទទួលស្គាល់ ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ។ សេចក្តីស្នើច្បាប់ដែលតាក់តែងឡើងក្រោយ លោកពីនាយករដ្ឋមន្រ្តី ហ៊ុន សែន ប្រតិកម្មខ្លំាងៗ ទៅលើលោក កឹម សុខា ប្រធានស្តីទីគណបក្សសង្រ្គោះជាតិ។ លោក កឹម សុខា ដែលលោក ហ៊ុន សែន លើកឡើងថា បាននិយាយថា គុកទួលស្លែងជាគុកសិប្បនិមិ្មត របស់ពួកខ្មែរក្រហម។ តើអ្វីទៅជាខ្លឹមសារនៃច្បាប់នេះ?
ចុះផ្សាយនៅថ្ងៃ៖ កែប្រែថ្ងៃទី៖
ជាដំបូងគួរជម្រាបជូនថា សេចក្តីស្នើច្បាប់ ស្តីពីការប្រឆំាងការមិនទទួលស្គាល់ឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យនេះ មានចំនួន៥មាត្រា។ មាត្រាមួយនិយាយពី ការផ្តន្ទាទោសរាល់បុគ្គលណា ដែលមិនទទួលស្គាល់ ឬសម្រាល ឬបដិសេធ ឬជំទាស់អត្ថិភាពនៃឧក្រិដ្ឋកម្ម ឬលើកតម្កើងឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ។
មាត្រាពីរ ៖ ការកំណត់ថា រាល់អំពើខាងលើ ជាបទល្មើសព្រហ្មទណ្ឌដែលត្រូវផ្តន្ទាទោស តាមច្បាប់ព្រហ្មទណ្ឌ។ ទោសសម្រាប់ប្រឆំាងការមិនទទួលស្គាល់ឧក្រិដ្ឋកម្មក្នុងរបបខ្មែរក្រហម តាមច្បាប់នេះ ត្រូវជាប់ពន្ធនាគារពី៦ខែទៅ២ឆ្នាំ និងត្រូវពិន័យជាប្រាក់ ពីមួយលានរៀលទៅបួនលានរៀល។
ចំណែក មាត្រា៣នៃច្បាប់គឺនិយាយអំពីជនដែលត្រូវផ្តន្ទាទោសដោយច្បាប់នេះ អាចត្រូវផ្សព្វផ្សាយពីការផ្តន្ទាទោសជាសាធារណៈ ដូចជាការផ្សាយតាមសារព័ត៌មានជាដើម។
ចំណែកមាត្រាបួននៃច្បាប់ ចែងអំពីទោសបន្ថែមសម្រាប់នីតិបុគ្គល។ នីតិបុគ្គល អាចត្រូវទទួលខុសត្រូវព្រហ្មទណ្ឌ តាមលក្ខខណ្ឌដែលមានចែងក្នុងក្រមព្រហ្មទណ្ឌ ត្រូវពិន័យជា ប្រាក់ពី៥០លានរៀលទៅ ៥០០លានរៀលឯណោះ។ ហើយមាត្រា៥ នៃច្បាប់ គឺបានចែងថាច្បាប់នេះត្រូវប្រកាសជាការប្រញាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ