រដ្ឋាភិបាលបកស្រាយរឿងបក្សកាន់អំណាចមិនចុះហត្ថលេខាប្រឆាំងអំពើពុករលួយ
អវត្តមានរបស់គណបក្សកាន់អំណាចនៅក្នុងពិធីចុះហត្ថលេខាលើកិច្ចសន្យាប្រឆាំងអំពើពុករលួយកាលពីថ្ងៃពុធ បានធ្វើឲ្យមានការរិះគន់ថា គណបក្សនេះគ្មានឆន្ទៈក្នុងការប្រយុទ្ធប្រឆាំងអំពើពុករលួយ។ ប៉ុន្តែ អ្នកនាំពាក្យរដ្ឋាភិបាលបានច្រានចោលការរិះគន់នេះ។
ចុះផ្សាយនៅថ្ងៃ៖
ស្តាប់ - ០២:០៤
ឆ្លើយតបទៅនឹងសំណួរអ្នកសារព័ត៌មាន និងការផ្សាយរបស់កាសែត Cambodia Daily និង កាសែតភ្នំពេញប៉ុស្តិ៍ចេញផ្សាយកាលពីថ្ងៃព្រហស្បតិ៍ កន្លងទៅនេះ ហេតុអ្វីគណបក្សប្រជាជនកម្ពុជាមិនបានចុះហត្ថលេខាប្រឆាំងនឹងអំពើពុករលួយ លោក ខៀវ កាញារិទ្ធិ រដ្ឋមន្ត្រីក្រសួងព័ត៌មាន មកពីគណបក្សប្រជាជនកម្ពុជា និងជាអ្នកនាំពាក្យរាជរដ្ឋាភិបាលបានបំភ្លឺថា ការផ្សាយនោះ គឺជាការភ័ន្តច្រលំ។
លោករដ្ឋមន្ត្រី ខៀវ កាញារិទ្ធ ពន្យល់ថា ការផ្សាយរបស់កាសែត Cambodia Daily គ្រាន់តែនិយាយថាគណបក្សប្រជាជនមិនបានចុះហត្ថលេខា ដោយសារមិនមានវត្តមាន ក៏ប៉ុន្តែកាសែតភ្នំពេញប៉ុស្តិ៍បានផ្សាយថាគណបក្សប្រជាជនកម្ពុជាមិនចុះហត្ថលេខា គឺមានន័យថាមិនព្រមចុះហត្ថលេខាតែម្តង។
លោក ខៀវ កាញារិទ្ធ បានបញ្ជាក់ថា រដ្ឋាភិបាលអាណត្តិនេះ បានដើរតាមគោលនយោបាយគណបក្សប្រជាជនកម្ពុជាដែលឈ្នះឆ្នោត នៅក្នុងគោលនយោបាយរបស់គណបក្សបានបញ្ជាក់រួចហើយពីការប្រយុទ្ធប្រឆាំងនឹងអំពើពុករលួយ ហេតុដូច្នេះពេលដែលបោះឆ្នោតហើយ រដ្ឋាភិបាលបានបង្កើតច្បាប់ប្រឆាំងនឹងអំពើពុករលួយនៅឆ្នាំ ២០១០ ច្បាប់លាងលុយកខ្វក់នៅឆ្នាំ ២០០៧ ការត្រួតពិនិត្យអភិបាលកិច្ចល្អ ការបង្កើតអង្គភាពប្រឆាំងអំពើពុករលួយ។
លើសពីនេះលោក ខៀវ កាញារិទ្ធ បន្ថែមថា គណបក្សប្រជាជនកម្ពុជាបានចុះអនុស្សារណៈជាមួយអង្គភាពប្រឆាំងអំពើពុករលួយរួចហើយ ព្រមទាំងចុះហត្ថលេខាជាច្រើនទៀត ក្នុងនោះជាមួយនឹងយុទ្ធនាការក្រោមជំនួយប្រទេស ស៊ុយអែដ ប្រទេសកម្ពុជាក៏បានចូលជា អនុសញ្ញា អង្គការសហប្រជាជាតិ ស្តីពីការប្រយុទ្ធប្រឆាំងនឹងអំពើពុករលួយ។ល។និង។ល។ដោយយល់ឃើញថា គណបក្សប្រជាជនបានចុះហត្ថលេខាស្តីពីការប្រឆាំងអំពើពុករលួយច្រើនជាងអ្វីដែល អង្គការសង្គមស៊ីវិលបានធ្វើ ហេតុនេះហើយទើបគណបក្សប្រជាជនមិនបញ្ជូនមនុស្សឲ្យចូលរួម។
លោក ព្រាប កុល នាយកប្រតិបត្តិអង្គការតម្លាភាពកម្ពុជាដែលបានរៀបចំកម្មវិធីចុះហត្ថលេខាសម្រាប់គណបក្សនយោបាយទាំងអស់ មុននឹងការបោះឆ្នោតមកដល់នោះ មិនមានប្រតិកម្មអ្វីតបតនឹងការថ្លែងរបស់មន្ត្រីជាន់ខ្ពស់គណបក្សប្រជាជនទេ គ្រាន់តែនិយាយថា ការចុះហត្ថលេខានេះគឺជាប្រវត្តិសាស្ត្រ ហើយអវត្តមានរបស់គណបក្សប្រជាជនក៏ជាប្រវត្តិសាស្ត្រដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ