បុគ្គលិកកាស៊ីណូណាហ្គាធ្វើកូដកម្មទាមទារឲ្យក្រុមហ៊ុនគោរពការសម្រេចក្រុមប្រឹក្សាអាជ្ញាកណ្តាល
កាលពីថ្ងៃទី ១៣ មិថុនា កន្លង មកបុគ្គលិក ផ្នែកសណ្ឋាគារនិងកាស៊ីណូណាហ្គា បាននាំគ្នា ធ្វើកូដកម្ម មិនចូលធ្វើការ។ ពួកបានប្រមូលម្តុំគ្នានៅលើសួនច្បារ នៅមុខកាស៊ីណូ ដោយទាមទារឲ្យមានការតំឡើងប្រាក់ខែ និង ចំណុចចំនួនទៀតដែលទាក់ទងនឹងការសម្រេចរបស់ក្រុមប្រឹក្សាអជ្ញាកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
បុគ្គលិកដែលបម្រើការងារជាច្រើនផ្នែក នៅសណ្ឋាគារនិងកាស៊ីណូណាហ្គា បាននាំគ្នាធ្វើកូដកម្ម អស់រយៈពេល ២ថ្ងៃមកហើយ នៅលើសួនច្បារពីមុខកន្លែងធ្វើការរបស់ពួកគេដើម្បីទាមទារ ឲ្យក្រុមហ៊ុន គោរពនូវសេចក្តីបង្គាប់របស់ក្រុមប្រឹក្សាអាជ្ញាកណ្តាល ដោយភ្ជាប់នូវលក្ខខ័ណ្ឌការងារមួយចំនួន។ ការតវ៉ានេះបានចាប់ផ្តើមឡើងកាលពីថ្ងៃ ១៣ មិថុនា ឆ្នាំ ២០១៣ និងបន្តនៅថ្ងៃនេះទៀត ដោយក្រុមកូដករ នាំគ្នាបោះតង់ធំៗ ឈរស្រែកមេក្រូក្រោមដំណក់ទឹកភ្លៀងធ្លាក់យ៉ាងសស្រិច។
លោក សុខ ណារិទ្ធ, ប្រធានសម្ព័ន្ធសហជីព កម្មករ និយោជិក វិស័យទេសចរណ៍ សេវាកម្មកម្ពុជា បានឲ្យដឹងថាក្រុមបុគ្គលិក បានទាមទារឲ្យក្រុមហ៊ុនគោរពការសម្រេចរបស់ក្រុមប្រឹក្សាអាជ្ញាកណ្តាល ចំនួន៣ចំណុចទាក់ទងទៅហ្នឹងសិទ្ធិក្នងការបំពេញការងារនិងការទទួលបានអត្ថប្រយោជន៍ ដែលបានបង្គាប់កាលពីខែ កុម្ភៈកន្លងទៅនេះ។
ភ្ជាប់ជាមួយនឹងការទាមទារឲ្យមានការស្តាប់ការបង្គាប់សេចក្តីសម្រេចរបស់អាជ្ញាកណ្តាលនេះ ក្រុមបុគ្គលិកក៏បានស្នើផងដែរដល់ក្រុមហ៊ុន ឲ្យមានការតម្លើងប្រាក់ឈ្នួលដល់ពួកគេឲ្យដល់ ១៥០ ដុល្លារ ចំពោះបុគ្គលិកណាដែលមានប្រាក់ឈ្នួលក្រោម១៥០ដុល្លារ។ ដោយឡែកចំពោះបុគ្គលិកដែលមានប្រាក់ឈ្នួលចាប់ពី ១៥០ដុល្លាអាមេរិក ឡើងទៅក្រុមហ៊ុនត្រូវតម្លើងឲ្យ ២០%។
មន្ត្រីសហជីពបន្តថាការទាមទារនេះ បានធ្វើឡើងបន្ទាប់ពីបុគ្គលិកទាំងអស់មិនត្រូវបានក្រុមហ៊ុនតម្លើងប្រាក់ឈ្នួលឲ្យចាប់តាំងពីឆ្នាំ ២០០៧ មកម្ល៉េះ ហើយការស្នើសុំនេះគឺស្របទៅនឹងស្ថានភាពអតិផរណានៃប្រទេសកម្ពុជាផងដែរ។
ទោះជាមានការតវ៉ា ក្រោមភ្លៀង ក្រោមថ្ងៃអស់យៈពេល ២ថ្ងៃក៏ដោយក៏ពុំមានដំណោះស្រាយណាមួយនៅឡើយទេ រហូតមកទល់ពេលនេះ។ ក៏ប៉ុន្តែកាលពីថ្ងៃត្រង់ ម្សិលមិញក្រុមហ៊ុនណាហ្គាហ្វើល បានចេញដីការរក្សាការពារមួយពីតុលាការ ដោយហៅកូដកម្ម របស់បុគ្គលិកថា ជាទង្វើខុសច្បាប់ ព្រមទាំងអំពាវនាវឲ្យបុគ្គលិកចូលធ្វើការវិញ ក្នុងរយៈពេល ៤៨ម៉ោង។
ដោយឡែក តាមរយៈមេធាវីរបស់ពួកគេក្រុមអ្នកតវ៉ា ក៏បានបដិសេធថា ដីការរបស់ក្រុមហ៊ុនមិនត្រូវតាមស្ថានភាពជាក់ស្តែង ព្រោះថាការទាមទារនេះទាក់ទងទៅហ្នឹងវិវាទការងារ។
ជាមួយគ្នានោះសាលាក្រុងភ្នំពេញ ក៏បានទទូចឲ្យអ្នកតវ៉ាចូលធ្វើការវិញដែរ ដោយស្នើសុំឲ្យផ្អាកការទាមទារសិនរង់ចាំការជួបចចាគ្នារកដំណោះស្រាយ នៅថ្ងៃច័ន្ទខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ