គ.ជ.ប ប្រកាសពីសុវត្ថិភាពនៃការបោះពុម្ពសន្លឹកឆ្នោត
គណៈកម្មាធិការជាតិរៀបចំការបោះឆ្នោតបានចេញសេចក្តីប្រកាសមួយនៅថ្ងៃព្រហស្បតិ៍នេះ ស្តីអំពីការផលិតសន្លឹកឆ្នោតប្រកបដោយសុវត្ថិភាព និង ការការពារសន្តិសុខយ៉ាងតឹងរ៉ឹង។ ប៉ុន្តែមន្ត្រីអង្គការសង្កេតការណ៍បោះឆ្នោតនៅតែសម្តែងការមិនទុកចិត្តចំពោះសុវត្តិភាពនៃសន្លឹកឆ្នោតនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
គណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប បានចេញសេចក្តីប្រកាសមួយនៅថ្ងៃព្រហស្បតិ៍ទី២០ មិថុនានេះដោយប្រាប់ឱ្យដឹងថា ការផលិតសន្លឹកឆ្នោតមានសុវត្ថិភាព និងមានការការពារសន្តិសុខយ៉ាងតឹងរ៉ឹង។ សេចក្តីប្រកាសរបស់គ.ជ.ប បានអោយដឹងថា តំណាងគណបក្សនយោបាយអ្នកសង្កេតការណ៍បោះឆ្នោត និងអ្នកសារព៍ត៌មានបានវាស់ស្ទង់ពីកម្រិតសុវត្ថិភាពខ្ពស់នៃដំណើរការបោះពុម្ព ក្នុងឱកាសដែលពួកគេបានធ្វើទស្សនៈកិច្ចទៅកាន់រោងពុម្ព លី វ៉ាន់ហុង ដែលបោះពុម្ពសន្លឹកឆ្នោតស្ថិតនៅខណ្ឌទួលគោករាជធានីភ្នំពេញកាលពីពេលថ្មីៗនេះ។
គ.ជ.ប ឱ្យដឹងទៀតថា នៅក្នុងរោងពុម្ពមានពលករសរុបប្រមាណ ១៥០នាក់ ធ្វើការទាំងថ្ងៃទាំងយប់ ហើយពួកគេត្រូវបានបំពាក់ស្រោមដៃស ក្នុងខណៈពេលកំពុងធ្វើការ។ ទូរសព្ទ័ដៃ ម៉ាស៊ីនថត និងឧបករណ៍សម្រាប់ថតរូបដទៃៗទៀត ត្រូវបានហាមឃាត់។ នៅខាងក្រៅរោងពុម្ព មានប៉ូលីសចំនួន១៥០នាក់ ផ្លាស់ប្តូរវេនគ្នា២៤ម៉ោង ដើម្បីយាមកាម ហើយមានសន្តិសុខ៥នាក់ផ្សេងទៀត យាមនៅខាងក្នុង។ ក្រៅពីនេះ មានមន្រ្តី គ.ជ.ប ជាច្រើនអ្នកទទួលខុសត្រូវត្រួតពិនិត្យលើ ពលករទាំងនោះ។
បន្ថែមលើនោះ បរិវេណទាំងអស់ ស្ថិតក្រោមការត្រួតពិនិត្យដោយម៉ាស៊ីនថតសុវត្ថិភាពចំនួន ២០គ្រឿង ដែលកំពុងថតយករាល់សកម្មភាពជាបន្តរបន្ទាប់។ សន្លឹកឆ្នោតនីមួយៗសុទ្ធតែមានលេខកូដសុវត្ថិភាពមួយ ដើម្បីផ្ទៀងផ្ទាត់ជាមួយនឹងលេខកូដខេត្ត ឆ្នាំបោះឆ្នោត និងលេខរៀងទាំង៨ខ្ទង់។
ឆ្លើយតបនឹងសេចក្តីប្រកាសនេះ លោកគល់ បញ្ញា នាយកប្រតិបត្តអង្គការ COMFREL បានប្រាប់វិទ្យុបារាំងអន្តរជាតិថា លោកពុំបានចូលរួមឱ្យស៊ីជម្រៅទេ ក្នុងកិច្ចការផលិតសន្លឹកឆ្នោត ពីព្រោះថា លោកមិនត្រូវបានអនុញ្ញាតអោយចូលឆែកប្រពន្ធ័វិសយ័សង្វាក់ផលិតកម្មនោះឡើយ។ លើសពីនេះ លោកពុំបានទទួលព័ត៌មានលំអិតអំពីការត្រួតពិនិត្យប្រពន្ធ័សន្តិសុខនោះដែរ។
បើតាម លោក គល់ បញ្ញា បណ្តាគណបក្សនានាបានស្នើអោយមានការដេញថ្លៃដោយបើកចំហរដើម្បីជ្រើសយកក្រុមហ៊ុនណាមួយដែលអាចធានាជាក់លាក់លើសន្តិសុខនៃការផលិតសន្លឹកឆ្នោត។ ម្យ៉ាងទៀត គ.ជ.ប បោះពុម្ពសន្លឹកឆ្នោតច្រើនហួសកំណត់ពេករហូតដល់ទៅជាង២០% ជិត៣០% ដូច្នេះវាអាចបណ្តាលអោយមានហានិភ័យខ្ពស់ក្នុងការបន្លំសន្លឹកឆ្នោត និងធ្វើ ឱ្យមានការខ្ជះខ្ជាយថិវិការរដ្ឋ។
លោក គល់ បញ្ញា សំណូមពរថា ម៉ាស៊ីនសុវត្ថិភាពដែលបានដាក់ថតតាមដានលើសង្វាក់ផលិតកម្ម គ.ជ.ប គួរតែអនុញ្ញាតឱ្យគណបក្ស និង អង្គការនានាពិនិត្យមើលដើម្បីធានាអំពីតម្លាភាពនៃការបោះពុម្ពសន្លឹកឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ