លោក ជុំ ម៉ី ចូលបំភ្លឺនៅតុលាការ ក្នុងនាមជាដើមបណ្តឹង រឿងបរិហាកេរ្តិ៍
លោក ជុំ ម៉ី ជាដើមបណ្តឹងព្រហ្មទណ្ឌពីបទបរិហារកេរ្តិ៍ ត្រូវតុលាការសាលាដំបូងរាជធានីភ្នំពេញកោះហៅទៅសាកសួរ នៅថ្ងៃចន្ទ ទី២៤ មិថុនានេះ។ រីឯលោក កឹម សុខា ប្រធានស្តីទីគណបក្សសង្គ្រោះជាតិ នឹងត្រូវតុលាការកោះហៅដើម្បីសាកសួរនៅថ្ងៃទី២៧ ក្នុងសប្តាហ៍នេះដែរ។
ចុះផ្សាយនៅថ្ងៃ៖
ស្តាប់ - ០២:០៤
ដើមបណ្តឹងព្រហ្មទណ្ឌ បទបរិហាកេរ្តិ៍ ខាងលើជា ជនរងគ្រោះក្នុងរបបខ្មែរក្រហម បានចូលខ្លួនបំភ្លឺនៅតុលាការក្រុងភ្នំពេញហើយ។ លោក ជុំ ម៉ីប្តឹងប្រធានស្តីទីគណបក្សសង្គ្រោះជាតិលោក កឹម សុខា ដែលបាននិយាយថាគុកទួលស្លែងជាគុកសិប្បនិម្មិត្ត។ តែចំពោះលោក កឹម សុខា វិញថានោះជាសំឡេងដែលគេបានកាត់ត។
ក្រោយពីបំភ្លឺនៅតុលាកា នៅព្រឹកមិញនេះ លោក គួយ ធុនណា មេធាវីរបស់លោកជុំ មី បានប្រាប់អ្នកយកព័ត៌មាននៅក្រៅរបងសាលាដំបូងថា លោក មានភស្តុតាងក្នុងដៃហើយ សម្រាប់ដាក់បន្ទុកដល់ជនជាប់ចោទ។
ហើយកាលពីល្ងាចថ្ងៃអាទិត្យ ២៣មិថុនា លោកមេធាវី បានបញ្ជាក់ប្រាប់ វិទ្យុបារាំង ម្សិលមិញថាភស្ដុតាងរួមមាន ខ្សែអាត់សំឡេងរបស់លោកឹម សុខា កាសែតភ្នំពេញប៉ុស្តិ៍ និងកាសែតខេមបូឌាដេលី ដែលស្រង់ប្រសាសន៍លោក កឹម សុខា និយាយថា ខ្សែអាត់សំឡេងជាការកាត់ត។ យោងតាមការបញ្ជាក់របស់មេធាវី ការដែលលោកកឹម សុខា បាននិយាយថា ខ្សែអាត់សំឡេងជាការកាត់តនោះ គឺជាការបរិហារកេរ្តិ៍កូនក្តីរបស់លោក។
លោក ជុំ មីបានបញ្ជាក់ថា បណ្តឹងរបស់លោក គឺទាមទារឱ្យលោក កឹម សុខា ផ្តល់សំណងជាប្រាក់ ១ពាន់ដុល្លារ ប្រមាណជា៤លានរៀល ដើម្បីធ្វើបុណ្យបង្សុកូលដល់ជនរងគ្រោះក្នុងគុកទួលស្លែង។
គួររម្លឹកថា ក្នុងខណៈដែលកម្ដៅនយោបាយកំពុងតែឡើង មុនការបោះឆ្នោតនាពេលខាងមុខដ៏ខ្លីនេះ ប្រធានស្តីទីគណបក្សសង្គ្រោះជាតិ កំពុងតែញាំញីដោយសាររឿងអាស្រូវជាច្រើន ដូចជារឿងក្តីក្តាំ ដែលគេអះអាងថាជា”ស្រីកំណាន់”របស់លោក រួមទាំងសំណុំរឿងគុកទួលស្លែងជាដើម។
ទាក់ទិនបណ្តឹងដោយលោក ជុំ ម៉ី អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានអះអាងថាបណ្តឹងនេះមិនមានទំងន់ សំខាន់ដែលឱ្យគណបក្សសង្គ្រោះជាតិយកចិត្តទុកដាក់នោះទេ ព្រោះសំណុំរឿងជាតិជាច្រើនដូចជា ជនអន្តោប្រវេសន៍ ការកាប់ព្រៃបំផ្លាញព្រៃឈើ ទើបជារឿងដែលគណបក្សសង្គ្រោះជាតិយកចិត្តទុកដាក់។
តុលាការសាលាដំបូងក្រុងភ្នំពេញ នឹងកោះហៅលោក កឹម សុខា ឱ្យចូលខ្លួនមកបំភ្លឺនៅថ្ងៃទី២៧ មិថុនាខាងមុខនេះ។ ហើយលោក កឹម សុខាដែលបានយល់ថា ការប្តឹងរបស់លោក ជុំ មី មានគណបក្សប្រជាជននៅពីក្រោយខ្នង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ