កម្ពុជានិងកូរ៉េខាងត្បូងបានចុះហត្ថលេខាលើ ឥណទាន ២០០លានដុល្លារអាមេរិក
ព្រឹកថ្ងៃពុធនេះ ដ្ឋាភិបាលកម្ពុជា និង រដ្ឋាភិបាលសាធារណរដ្ឋកូរ៉េបានចុះហត្ថលេខាលើកិច្ចព្រមព្រៀងក្របខ័ណ្ឌនៃការសន្យាផ្តល់ឥណទាន ចំនួន២០០លានដុល្លារអាមេរិកដើម្បីសាងសង់ហេដ្ឋារចនាសម្ព័ន្ធរួមមានផ្លូវនិងទំនប់ នៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នៅក្រសួងការបរទេស ម៉ោង៩ព្រឹកថ្ងៃពុធនេះ ពិធីចុះហត្ថលេខាផ្តល់ឥណទាន២០០លានដុល្លារសំរាប់ការសាងសង់ហេដ្ឋារចនាសម្ព័ន្ធ រួមមាន ផ្លូវនិងប្រព័ន្ធប្រឡាយទឹក បានធ្វើឡើងរវាងអគ្គរដ្ឋទូតសាធារណរដ្ឋកូរ៉េ លោក គីម ហាន ស៊ូ និងឯកឧត្តមឧបនាយករដ្ឋមន្ត្រីហោ ណាំ ហុង រដ្ឋមន្ត្រីក្រសួងការបរទេស។ ក្នុងពិធីនោះក៏រួមមានលោកនាយករដ្ឋមន្ត្រី ហ៊ុន សែនផងដែរ។
ប្រាក់ឥណទាន២០០លានដុល្លារនេះនឹងយកទៅអនុវត្តក្នុងគម្រោង ធ្វើអោយប្រសើរឡើងវិញនូវផ្លូវជាតិលេខ២ ផ្លូវជាតិលេខ២២ និងកំណាត់ផ្លូវជាតិលេខ៤៨ ព្រមទាំងអនុវត្តលើគម្រោងអភិវឌ្ឍន៍ទំនប់ពហុបំណងស្ទឹងដូនទ្រី និង ការកែលំអផ្លូវជំហានទី២នៅខេត្តចំនួន៩។ យោងតាមសេចក្តីជូនពត៌មានរបស់ស្ថានទូតកូរ៉េប្រចាំនៅកម្ពុជា ឥណទានចំនួន២០០លានដុល្លារនេះ នឹងធ្វើអោយគម្រោងអភិវឌ្ឍន៍នៅកម្ពុជាដំណើរការទៅក្នុងផ្លូវដ៏មានប្រសិទ្ធិភាព ដែលលើកស្ទួយដល់សហប្រតិបត្តិការផ្នែកសេដ្ឋកិច្ចរវាងប្រទេសទាំងពីរ។
បន្ថែមលើការផ្តល់ឥណទាន សាធារណរដ្ឋកូរ៉េក៏បានផ្តល់ជំនួយឥតសំណងដើម្បីការអភិវឌ្ឍនៅកម្ពុជាដែរ។ លោក កុយ គួង អ្នកនាំពាក្យក្រសួងការបរទេស បាននិយាយប្រាប់ថា រដ្ឋាភិបាលទាំងពីរក៏បានចុះហត្ថលេខាលើជំនួយឥតសំណងសំរាប់ការអភិវឌ្ឍនៅកម្ពុជា ឆ្នាំ២០១៣។ លោកក៏បានបន្តថាប្រាក់ឥណទាន និង ជំនួយឥតសំណងរបស់រដ្ឋាភិបាលសាធារណរដ្ឋកូរ៉េពិតជាឆ្លើយតបទៅនឹងតំរូវការចាំបាច់របស់ប្រទេសកម្ពុជាក្នុងពេលបច្ចុប្បន្ន។
ក្រៅពីនេះលោកក៏បាននិយាយថា ការផ្តល់ជំនួយនេះ គឺឆ្លុះបញ្ចាំងពីភាពជឿជាក់របស់រដ្ឋាភិបាលកូរ៉េខាងត្បូង មកលើស្ថានភាពនយោបាយនៅកម្ពុជា ថានឹងគ្មានការប្រែប្រួលច្របូកច្របល់ឡើយ ក្នុងឱកាសដែលកម្ពុជាធ្វើដំណើរទៅរកការបោះឆ្នោតតំណាងរាស្ត្រនៅថ្ងៃទី២៨កក្កដានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ