ក្រុមប្រឹក្សាធម្មនុញ្ញព្រមានអ្នកមិនគោរពសេចក្តីសម្រេចរបស់ខ្លួន
ក្រុមប្រឹក្សាធម្មនុញ្ញបានចេញសេចក្តីប្រកាសព័ត៌មានមួយនៅថ្ងៃព្រហស្បតិ៍ទី ១២ កញ្ញានេះដោយព្រមានដល់ជនណា ដែលមិនគោរពសេចក្តីសម្រេចរបស់ស្ថាប័នកំពូលនេះថា អាចនឹងត្រូវផ្តន្ទាទោសដាក់ពន្ធនាគារពីមួយខែដល់មួយឆ្នាំ និងត្រូវពិន័យប្រាក់ជាច្រើនទៀត។ ការព្រមាននេះបានធ្វើឡើងបន្ទាប់ពីអង្គការខុមហ្វ្រែល បានចេញរបាយការណ៍រិះគន់សេចក្តីសម្រេចរបស់ក្រុមប្រឹក្សាធម្មនុញ្ញថាមានភាពមិនប្រក្រតីជាច្រើននៅពេលដោះស្រាយបណ្តឹងគណបក្សសង្គ្រោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សេចក្តីសម្រេចរបស់ក្រុមប្រឹក្សាធម្មនុញ្ញគឺជាសេចក្តីសម្រេចស្ថាពរ បិទផ្លូវតវ៉ា និងមានអានុភាពអនុវត្តទៅលើអំណាចទាំងអស់ដែលមានចែងក្នុងរដ្ឋធម្មនុញ្ញ។ នេះគឺជាការគូសបញ្ជាក់របស់ក្រុមប្រឹក្សាធម្មនុញ្ញនៅក្នុងសេចក្តីថ្លែងការណ៍មួយដែលចេញផ្សាយនៅថ្ងៃព្រហស្បតិ៍ ១២ កញ្ញានេះ។
ក្រុមប្រឹក្សាធម្មនុញ្ញបានប្រកាសឲ្យដឹងថា ខ្លួនបានទទួលពាក្យបណ្តឹងតវ៉ាចំនួន ១៥ ករណីរបស់គណបក្សសង្គ្រោះជាតិ ទាក់ទងនឹងការបោះឆ្នោតជ្រើសរើសតំណាងរាស្ត្រអាណត្តិទី៥នេះ។ បណ្តឹងទាំងនោះត្រូវបានដោះស្រាយរួចរាល់ដោយឈរលើមូលដ្ឋានគតិយុត្តិទាំងស្រុង និងប្រកបដោយភាពឯករាជ។
ក្រុមប្រឹក្សាធម្មនុញ្ញបានព្រមានទៀតថា ជនណាដែលមិនគោរពសេចក្តីសម្រេចរបស់ស្ថាប័នកំពូលនេះ ឬក៏រារាំងប្រតិបត្តិការរបស់ក្រុមប្រឹក្សាធម្មនុញ្ញអាចនឹងត្រូវផ្តន្ទាទោសដាក់ពន្ធនាគារពី១ខែដល់មួយឆ្នាំ និងពិន័យជាប្រាក់ពី១០ម៉ឺន ទៅ ៦០ ម៉ឺនរៀល ឬទោសណាមួយក្នុងចំណោមទោសទាំងពីរ។
ការព្រមានបែបនេះបានធ្វើឡើងបន្ទាប់ពីមានការរិះគន់ជាច្រើនថា ស្ថាប័នកំពូដោះស្រាយបណ្តឹងការបោះឆ្នោតមួយនេះបានលម្អៀងទៅរកគណបក្សកាន់អំណាច និងមិនបានផ្តល់យុត្តិធម៌ដល់គណបក្សសង្គ្រោះជាតិ។ កាលពីថ្ងៃទី ១១ កញ្ញា អង្គការសង្កេតការណ៍បោះឆ្នោត ខុមហ្វ្រែល បានចេញរបាយការណ៍អង្កេតមួយស្តីពីការដោះស្រាយបណ្តឹងរបស់ក្រុមប្រឹក្សាធម្មនុញ្ញ។
របាយការណ៍របស់អង្គការខុមហ្វ្រែលបង្ហាញថា មានភាពមិនប្រក្រតីជាច្រើននៅក្នុងនីតិវិធីដោះស្រាយបណ្តឹងរបស់គណបក្សសង្គ្រោះជាតិ។ បើយោងតាមខុមហ្វ្រែល ក្រុមប្រឹក្សាធម្មនុញ្ញគ្មាននីតិវិធីច្បាស់លាស់ សម្រាប់ការដោះស្រាយបណ្តឹង និងដំណើរការនៃសវនការរបស់ខ្លួននោះទេ។
អង្គការសង្កេតការណ៍បោះឆ្នោតមួយនេះ បានកត់សម្គាល់ទៀតថា សមាសភាពភាគច្រើនរបស់ក្រុមប្រឹក្សាធម្មនុញ្ញ ជាពិសេសប្រធានក្រុមប្រឹក្សាធម្មនុញ្ញ គឺជាមន្ត្រីរបស់គណបក្សប្រជាជនកម្ពុជា ដែលផ្ទុយពីប្រការ៤ នៃបទបញ្ជាផ្ទៃក្នុងរបស់ស្ថាប័ននេះ ដែលចែងថា សមាជិកក្រុមប្រឹក្សាធម្មនុញ្ញមិនត្រូវកាន់កាប់ក្នុងគណបក្សនយោបាយណាមួយនោះឡើយ។
យ៉ាងណាក៏ដោយ គេមិនដឹងថា ការរិះគន់បែបនេះអាចចាត់ទុកថាជាការមិនគោរព ឬក៏ជាការារាំងសេចក្តីសម្រេចរបស់ក្រុមប្រឹក្សាធម្មនុញ្ញដែលត្រូវដាក់ទោសដែរឬក៏យ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ