រដ្ឋសភាត្រៀមលក្ខណៈរួចរាល់សម្រាប់បើកការប្រជុំថ្ងៃដំបូង
សម័យប្រជុំដំបូងនៃរដ្ឋសភានឹងដំណើរការតាមការគ្រោងទុក នៅថ្ងៃចន្ទទី២៣ខែកញ្ញាស្អែកនេះ ក្រោមព្រះរាជអធិបតីភាពរបស់ព្រះមហាក្សត្រព្រះបាទនរោត្តមសីហមុនី នោះបើទោះជាមិនមានវត្តមានរបស់តំណាងរាស្ត្រគណបក្សសង្គ្រោះជាតិ។ តំណាងរាស្ត្របក្សប្រឆាំងមួយនេះបានបញ្ជាក់ជំហរចុងក្រោយរបស់ខ្លួន នៅល្ងាចថ្ងៃអាទិត្យទី ២២ កញ្ញាថា នឹងមិនចូលរួមប្រជុំសភាថ្ងៃដំបូងនោះទេ ហើយបន្តស្នាក់នៅក្នុងខេត្តសៀមរាបរហូតដល់ថ្ងៃបើកប្រជុំសភាលើកដំបូង។
ចុះផ្សាយនៅថ្ងៃ៖
ស្តាប់ - ០២:៤៥
រដ្ឋសភាជាតិបានត្រៀមលក្ខណៈរួចរាល់ជាស្រេចហើយ នៅថ្ងៃអាទិត្យទី ២២ កញ្ញា សម្រាប់បើកសម័យប្រជុំលើកដំបូងនៃរដ្ឋសភានីតិកាលទីប្រាំ បើទោះបីជាតំណាងរាស្ត្រមកពីគណបក្សសង្គ្រោះជាតិរបស់លោកសម រង្ស៊ីប្រកាសមិនចូលរួមប្រជុំក៏ដោយ។
លោកឈាង វុន តំណាងរាស្ត្រគណបក្សប្រជាជនកម្ពុជាបានប្រាប់វិទ្យុបារាំងថា គ្មានការប្រែប្រួល គ្មានការលើកពេល និងគ្មានឧបសគ្គអ្វីទាំងអស់មក រារាំងដល់កិច្ចដំណើរការនៃការបើកសម័យប្រជុំសភា ក្រោមព្រះរាជអធិបតីភាពរបស់ព្រះមហាក្សត្រ នៅព្រឹកថ្ងៃចន្ទនេះ។ សាលប្រជុំពេញអង្គ វេទិកាសម្រាប់អ្នកតំណាងរាស្ត្រឈរថតជុំគ្នា នៅពីមុខរដ្ឋសភា របៀបវារៈសម្រាប់ប្រជុំ និងកិច្ចដំណើរការផ្សេងៗទៀតត្រូវបានរៀបចំរួចជាស្រេច។ នេះបើតាមលោកឈាងវុន។
បើតាមការបញ្ជាក់របស់ លោកឈាង វុនដដែល តំណាងរាស្ត្រគណបក្សប្រជាជនកម្ពុជាដែលជាប់ឆ្នោតនៅតែប្រកាន់ជំហរចូលប្រជុំ ជាដាច់ខាត ដោយគោរពតាមរដ្ឋធម្មនុញ្ញ និងព្រះរាជតម្រិះរបស់ព្រះមហាក្សត្រ។ លោកបន្តថា បើទោះបីជាតំណាងរាស្ត្រគណបក្សសង្គ្រោះជាតិមិនចូលរួមប្រជុំក្តី ក៏កិច្ចប្រជុំនេះនឹងនៅតែបន្តដំណើរទៅដោយរលូន និងស្របតាមច្បាប់។
អគ្គលេខាធិការដ្ឋានរដ្ឋសភាប្រកាសឲ្យដឹងថា លោកហេង សំរិន ជាព្រឹទ្ធសមាជិករដ្ឋសភា នឹងធ្វើជាអធិបតីភាពក្នុងការចាប់ផ្តើមការងារសម័យប្រជុំរដ្ឋសភាលើកទី១នីតិកាលទី៥ បន្ទាប់ពីព្រះមហាក្សត្រព្រះបាទនរោត្តមសីហមុនីបើកសម័យប្រជុំជាផ្លូវការ។ មានរបៀបវារៈពីរដែលនឹងត្រូវសម្រេច គឺទី១សម្រេចអំពីសុពលភាពនៃអាណត្តិរបស់សមាជិកនីមួយៗ និងទី២ ការអនុម័តបទបញ្ជាផ្ទៃក្នុងនៃរដ្ឋសភានីតិកាលទី៥នេះ។
ក្នុងឱកាសប្រកាសបើកសម័យប្រជុំសភាជាឱឡារឹក និងជាប្រវត្តិសាស្ត្រនេះ ឥស្សរជនជាន់ខ្ពស់អង្គទូតប្រចាំកម្ពុជា និងតំណាងអង្គការក្រៅរដ្ឋាភិបាលមួយចំនួន ក៏ត្រូវបានអញ្ជើញឲ្យចូលរួមផងដែរ ហើយនិងមានការផ្សាយផ្ទាល់តាមទូរទស្សន៍ជាតិកម្ពុជា និងវិទ្យុជាតិថែមទៀតផង។
ដោយឡែក តំណាងរាស្ត្រគណបក្សសង្គ្រោះជាតិទាំងអស់កំពុងបន្តស្នាក់នៅឯខេត្តសៀមរាប និងមានគម្រោងវិលត្រឡប់មករាជធានីភ្នំពេញវិញ ក្រោយការប្រជុំសភាដំបូងរួច។ បើតាមលោកយឹម សុវណ្ណ បើទោះបីជាតំណាងរាស្ត្របក្សសង្គ្រោះជាតិទាំងអស់បានធ្វើពិធីសច្ចាប្រណិធាននៅមុខប្រាសាទអង្គវត្តរួចហើយក៏ដោយ ក៏សមាជិកតំណាងរាស្ត្រទាំងអស់នោះ នៅបន្តជួបប្រជុំគ្នា នៅទីរួមខេត្តសៀមរាបដដែល ដើម្បីពិភាក្សាការងារកំណែទម្រង់ជាតិសំខាន់។ លោកយឹម សុវណ្ណបញ្ជាក់ថា តំណាងរាស្ត្រគណបក្សសង្គ្រោះជាតិទាំងអស់មិនផ្លាស់ប្តូរជំហររបស់ខ្លួននោះទេ។ ជាជំហរដែលមិនចូលរួមប្រជុំសភាថ្ងៃដំបូង។
គួរបញ្ជាក់ថាកាលពីព្រឹកថ្ងៃអាទិត្យនេះប្រធានគណបក្សប្រឆាំងលោកសមរង្ស៊ីបានបញ្ជាក់យ៉ាងច្បាស់ថាបេក្ខជនតំណាងរាស្ត្រទាំងអស់មកពីគណបក្សសង្គ្រោះជាតិបានស្បថនៅមុខបារមីព្រះមហាក្សត្រដែលបានកសាងប្រាសាទអង្គរថានឹងគោរពឆន្ទៈប្រជារាស្ត្រនឹងមិនចូលប្រជុំសភាថ្ងៃទី២៣ខែកញ្ញាខាងមុខនេះជាដាច់ខាត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ