លោកនាយករដ្ឋមន្ត្រី ហ៊ុន សែន ទៅទស្សនកិច្ចនៅប្រទេសជប៉ុន
លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូមួយក្រុមចាកចេញពីប្រទេសនៅព្រឹកថ្ងៃព្រហស្បតិ៍នេះដើម្បីទៅបំពេញទស្សនកិច្ចនៅប្រទេសជប៉ុន។ តាមការគ្រោងទុក ប្រមុខរដ្ឋាភិបាលកម្ពុជាត្រូវចូលរួមកិច្ចប្រជុំកំពូលអាស៊ានជប៉ុនលើកទី៤០ និងកិច្ចប្រជុំកំពូលមេគង្គជប៉ុនលើកទី៥ ដែលនឹងប្រព្រឹត្តទៅចាប់ពីថ្ងៃទី១២ ដល់១៤ធ្នូ នៅទីក្រុងតូក្យូ។ បន្ទាប់មក គឺជាដំណើរបំពេញទស្សនកិច្ចផ្លូវការនៅក្នុងប្រទេសជប៉ុន ចាប់ពីថ្ងៃទី១៥ដល់១៧ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ដំណើរទៅកាន់ប្រទេសជប៉ុនរបស់លោកនាយករដ្ឋមន្ត្រី ហ៊ុន សែន និងប្រតិភូជាន់ខ្ពស់កម្ពុជានៅពេលនេះមានរយៈពេលដល់ទៅ៦ថ្ងៃ។ មុនផ្តើមទស្សនកិច្ចផ្លូវការ លោកនាយករដ្ឋមន្ត្រីនឹងត្រូវចូលរួមក្នុងកិច្ចប្រជុំកំពូលធំៗពីរ គឺកិច្ចប្រជុំកំពូលអាស៊ាន-ជប៉ុនលើកទី៤០ និងកិច្ចប្រជុំកំពូលមេគង្គ-ជប៉ុនលើកទី៥ នៅទីក្រុងតូក្យូ ចាប់ពីថ្ងៃទី១២ដល់១៤ធ្នូ។
កិច្ចប្រជុំកំពូលអាស៊ាន-ជប៉ុន គ្រោងនឹងអនុម័តសេចក្តីថ្លែងការណ៍ស្តីពីចក្ខុវិស័យមិត្តភាព និងកិច្ចសហប្រតិបត្តិការអាស៊ាន-ជប៉ុន និងសេចក្តីថ្លែងការណ៍រួម ស្តីពី «រួមដៃគ្នាដោះស្រាយបញ្ហាប្រឈមនានានៅក្នុងតំបន់និងសកលលោក»។ ចំណែកកិច្ចប្រជុំកំពូលមេគង្គ-ជប៉ុនក៏គ្រោងនឹងអនុម័តឯកសារស្តីពីការត្រួតពិនិត្យឡើងវិញនូវ «យុទ្ធសាស្ត្រក្រុងតូក្យូ ២០១២ សម្រាប់កិច្ចសហប្រតិបត្តិការមេគង្គ-ជប៉ុន» ផងដែរ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស។
បន្ទាប់ពីកិច្ចប្រជុំកំពូលទាំងពីរនេះ លោកនាយក្រដ្ឋមន្ត្រី ហ៊ុន សែន និងប្រតិភូជាន់ខ្ពស់កម្ពុជានឹងផ្តើមទស្សនកិច្ចផ្លូវការនៅក្នុងប្រទេសជប៉ុន ចាប់ពីថ្ងៃទី១៥ដល់១៧ធ្នូ។ ប្រមុខរដ្ឋាភិបាលកម្ពុជាគ្រោងជួបពិភាក្សាការងារជាមួយនាយករដ្ឋមន្ត្រីជប៉ុន គឺលោក ស៊ីនហ្សូ អាបេ និងចូលថ្វាយបង្គំគាល់ព្រះចៅអធិរាជជប៉ុន នៅក្នុងព្រះបរមរាជវាំងផងដែរ។
នៅក្នុងអំឡុងពេលទស្សនកិច្ចនេះ ឯកសារចំនួន ៤នឹងត្រូវចុះហត្ថលេខា រវាងភាគីទាំងពីរ។ ឯកសារទាំងនោះរួមមាន៖ លិខិតប្តូរសារចំនួនបី ទាក់ទងនឹងគម្រោងកែលំអរផ្លូវជាតិលេខ១, គម្រោងធ្វើឲ្យប្រសើរឡើងនូវមន្ទីរពេទ្យបង្អែកខេត្តព្រះសីហនុ, គម្រោងកែលំអសម្ភារៈសម្រាប់ការជួសជុលស្ពានហាលខាងលិចនៃប្រាសាទអង្គរវត្ត និងអនុស្សារណៈមួយស្តីពីការផ្លាស់ប្តូរ និងកិច្ចសហប្រតិបត្តិការយោធារវាងប្រទេសទាំងពីរ។
គួរកត់សម្គាល់ថា ជប៉ុនគឺជាប្រទេសផ្តល់ជំនួយដ៏ធំមួយរបស់កម្ពុជា។ តាំងពីឆ្នាំ១៩៩២រហូតមកទល់សព្វថ្ងៃ ជប៉ុនផ្តល់ជំនួយឲ្យកម្ពុជាជាមធ្យមប្រមាណ១០០លានដុល្លារ ក្នុងមួយឆ្នាំ។ ទំនាក់ទំនងរវាងប្រទេសទាំងពីរដែលមានតាំងពី៦០ឆ្នាំមកហើយនោះ បានរីកធំធាត់ជាលំដាប់បន្ទាប់ពី«មហាមិត្ត»ចិន។ នាយករដ្ឋមន្ត្រីជប៉ុន លោក ស៊ីនហ្សូ អាបេ ទើបតែបានមកបំពេញទស្សនកិច្ចនៅកម្ពុជា កាលពីថ្ងៃទី១៦ ខែវិច្ឆិកាថ្មីៗ កន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ