ជប៉ុននឹងផ្តល់ជំនួយ១៤ពាន់លានអឺរ៉ូដល់អាស៊ាន
ទីក្រុងតូក្យូនឹងផ្តល់ជំនួយ ជាទឹកប្រាក់ប្រមាណ ១៤ពាន់លានអឺរ៉ូ ដល់ប្រទេសសមាជិកអាស៊ាន។ យោងតាមការចុះផ្សាយនៅថ្ងៃនេះ របស់កាសែតក្នុងស្រុកជប៉ុន លោកនាយករដ្ឋមន្រ្តីជប៉ុន ស៊ីនហ្សូ អាបេ នឹងត្រូវប្រកាសកញ្ចប់ជំនួយនេះ នៅក្នុងឱកាសជំនួបកំពូលជប៉ុន អាស៊ាន ដែលត្រូវប្រព្រឹត្តទៅនៅថ្ងៃសៅរ៍ទី ១៤ ធ្នូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
កញ្ចប់ជំនួយដែលជប៉ុននឹងសន្យាផ្តល់ឲ្យអាស៊ានត្រូវធ្វើឡើងក្នុងរូបរាងជាជំនួយឥតសំណង និងជាកម្ចីក្នុងរយៈពេល៥ឆ្នាំ ដែលប្រទេសសមាជិកអាស៊ានទាំង១០ត្រូវយកទៅចែករំលែកចំណែកគ្នា។ តាមកាសែតជប៉ុន នៅក្នុងជំនួបកំពូលនៅថ្ងៃសៅរ៍ លោកនាយករដ្ឋមន្រ្តី ជប៉ុននឹងប្រកាសផងដែរកញ្ចប់ជំនួយប្រមាណ៧០លានអឺរ៉ូសម្រាប់មូលនិធិតំបន់ដែលទទួលបន្ទុកខាងអភិវឌ្ឍន៍សេដ្ឋកិច្ចតំបន់អាស៊ីអាគ្នេយ៍។
នៅលើក្រដាស ជំនួបកំពូលជប៉ុន អាស៊ានធ្វើឡើងដើម្បីប្រារព្ធខួប៤០ឆ្នាំនៃទំនាក់ទំនងជប៉ុនជាមួយអាស៊ាន។ ប៉ុន្តែ មើលទៅតាមកាលៈទេសៈបច្ចុប្បន្ននេះ ជប៉ុនកំពុងឆ្លៀតយកជំនួបកំពូលនៅចុងសប្តាហ៍នេះដើម្បីពង្រឹងចំណងមិត្តភាពកាន់តែខ្លាំង ជាមួយអាស៊ាន ដើម្បីទប់ទល់ជាមួយមហាអំណាចចិន។ ចិនដែលកំពុងពង្រីកវិសាលភាពឥទ្ធិពលរបស់ខ្លួននៅអាស៊ីកំពុងឈ្លោះដណ្តើមដីកោះជាមួយប្រទេសសមាជិកអាស៊ាន ដូចជា ហ្វីលីពីន វៀតណាម ម៉ាឡេស៊ី និងព្រុយណេ។ កាលពីចុងខែវិច្ឆិកា ជប៉ុនទើបតែចេញមុខឈ្លោះកាន់តែខ្លាំងជាមួយចិន បន្ទាប់ពីចិនបានបង្កើតតំបន់ការពារដែនអាកាសដែលរំលោភទៅលើដែនអាកាសរបស់ជប៉ុន។
លោកប្រធានាធិបតីឥណ្ឌូណេស៊ីដែលបានទៅដល់ទីក្រុងតូក្យូកាលពីថ្ងៃសុក្រនេះ បានអំពាវនាវឲ្យជប៉ុន និងចិនត្រលប់មកត្រូវរ៉ូវគ្នានេះ។ តាមលោកប្រធានាធិបតីឥណ្ឌូណេស៊ី បើទោះបីជាឥណ្ឌូណេស៊ីមិនមានចំណែកពាក់ព័ន្ធក្នុងជម្លោះដីកោះជាមួយចិន ប៉ុន្តែ ឥណ្ឌូណេស៊ីនៅតែព្រួយបារម្ភ ចំពោះរាល់ជម្លោះដែលអាចកើតឡើង ហើយដែលអាចគំរាមកំហែងសន្តិសុខនៅតំបន់អាស៊ីទាំងមូល។ ដូចជាអនុប្រធានាធិបតី អាមេរិក លោកប្រធានាធិបតី ឥណ្ឌូណេស៊ីបានទាមទារឲ្យប្រទេសចិន បង្កើតខ្សែទូរស័ព្ទក្រហមជាមួយប្រទេសផ្សេងទៀត ដែលចិនកំពុងមានជម្លោះដណ្តើមកោះជាមួយ ពោលគឺធ្វើយ៉ាងណាដើម្បីជៀសវាងការប្រឈមមុខដាក់គ្នាជាយថាហេតុណាមួយ។
►សូមអាន៖ភាពតានតឹងជុំវិញការបង្កើតតំបន់ការពារដែនអាកាសរបស់ចិន
សូមបញ្ជាក់ថា ចាប់តាំងពីចូលកាន់តំណែង នៅចុងឆ្នាំ ២០១២ លោកនាយករដ្ឋមន្រ្តីជប៉ុន ស៊ីនហ្សូ អាបេបានពង្រឹងសម្ព័ន្ធភាពជាមួយអាស៊ាន។ ក្នុងរយៈពេលតែមួយឆ្នាំប៉ុណ្ណោះ លោកបានទៅធ្វើទស្សនកិច្ចនៅក្នុងប្រទេសទាំង១០របស់អាស៊ាន។ ទស្សនកិច្ចចុងក្រោយរបស់លោកទើបធ្វើឡើងនៅកម្ពុជាកាលពីខែវិច្ឆិកាកន្លងទៅ។ ការខិតជិតរបស់ជប៉ុនទៅរកអាស៊ានមិនមែនជារឿងអ្វីប្លែក ដោយសារតែជប៉ុនបានសំឡឹងឃើញប្រទេសសមាជិកអាស៊ានមួយចំនួន ក៏មានចិន ជាសត្រូវរួមជាមួយជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ