រដ្ឋាភិបាលដាក់បញ្ជាឱ្យក្រុមហ៊ុនវិនិយោគដីសម្បទាន គោរពផលប្រយោជន៍ពលរដ្ឋ
ក្រសួងបរិស្ថាន និងក្រសួងកសិកម្ម បានចេញសេចក្តីសម្រេចអន្តរក្រសួងមួយ ដែលមាន៨ប្រការ ដាក់បញ្ជាឱ្យក្រុមហ៊ុនវិនិយោគអភិវឌ្ឍន៍ ដែលទទួលបានដីសម្បទានទាំងអស់ អនុវត្តគោរព និងការពារផលប្រយោជន៍ប្រជាពលរដ្ឋ។ ក្នុងសេចក្តីសម្រេចទាំងនោះ ក្រសួងទាំងពីរ ក៏បានព្រមានដកដីសម្បទានទាំងអស់មកវិញ ប្រសិនណាក្រុមហ៊ុនមិនព្រមអនុវត្តតាមការណែនាំឱ្យមានប្រសិទ្ធភាពនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
«ក្រុមហ៊ុនទទួលគម្រោងដីសម្បទានទាំងអស់ ត្រូវធានាឱ្យបាននូវការអភិវឌ្ឍន៍ប្រកបដោយចីរភាព តម្លាភាព គណនេយ្យភាព និងប្រសិទ្ធភាព។ នេះគឺជាបទបញ្ជារបស់ក្រសួងបរិស្ថាន និងក្រសួងកសិកម្ម។ ក្នុងសេចក្តីសម្រេចរួមគ្នាមួយ ដែលអ្នកសារព័ត៌មានទើបតែទទួលបាន នៅថ្ងៃពុធនេះ ក្រសួងទាំងពីរបានណែនាំឱ្យក្រុមហ៊ុនវិនិយោគ ត្រូវប្រើប្រាស់រូបមន្តស្បែកខ្លា ដោយមិនត្រូវប៉ះពាល់ ដល់ដីធ្លីប្រើប្រាស់អាស្រ័យផលប្រជាពលរដ្ឋ ដីព្រៃសហគមន៍ និងដីអភិរក្សនោះឡើយ។ ក្រៅពីនោះ ក្រសួងទាំងពីរក៏បានដាក់បញ្ជាឱ្យក្រុមហ៊ុនទាំងអស់ មិនត្រូវឈូសឆាយតំបន់ព្រៃកប់ខ្មោច តំបន់ព្រៃអភិរក្ស តំបន់ព្រៃស្រោង និងមិនត្រូវប៉ះពាល់តំបន់ព្រៃតាមបណ្តោយអូរ ស្ទឹង បឹងបួរ ឬព្រែកយ៉ាងតិច ១០០ម៉ែត្រ។
អ្នកនាំពាក្យក្រសួងបរិស្ថាន លោក សៅ សុភាព បានបញ្ជាក់ថា ការណែនាំរបស់ក្រសួងនេះ គឺចង់ពង្រឹងការគ្រប់គ្រងដីសម្បទានសេដ្ឋកិច្ច។ ដីសម្បទានសេដ្ឋកិច្ច ដែលតាមរយៈកន្លងមកមិនត្រូវបានក្រុមហ៊ុនវិនិយោគមួយចំនួនអនុវត្តឱ្យបានពេញលេញនោះឡើយ។ ពោលការអនុវត្តន៍នៅមានកម្រិត និងមិនទានស្របតាមច្បាប់ និងជំហានរបស់រដ្ឋ។ នេះបើតាមការបញ្ជាក់របស់លោក សៅ សុភាព ដដែល។
ក្នុងសេចក្តីសម្រេចដែលមានហត្ថលេខារដ្ឋមន្ត្រីក្រសួងបរិស្ថាន លោក សាយ សំអាល់ និងរដ្ឋមន្ត្រីក្រសួងកសិកម្ម លោកអ៊ុក រ៉ាប៊ុន ក្រសួងបានដាក់បញ្ជាឱ្យក្រុមហ៊ុនទាំងអស់ត្រូវបញ្ឈប់សកម្មភាពឈូសឆាយជាបន្ទាន់ ក្នុងករណីមានការតវ៉ាពីប្រជាពលរដ្ឋ។ ហើយត្រូវដោះស្រាយឱ្យបានចប់សព្វគ្រប់ ដោយឈរលើគោលការណ៍យុត្តិធម៌ត្រឹមត្រូវ មុននឹងចាប់ផ្តើម ឬបន្តការឈូសឆាយ។ ចំណែកឯការកាប់បំផ្លាញព្រៃឈើ ក្នុងតំបន់អភិរក្ស និងក្រៅតំបន់ដីសម្បទានរបស់ក្រុមហ៊ុន រួមទាំងការហាមប្រាមមិនឱ្យប្រមូលទិញឈើ ដើម្បីធ្វើអាជីវកម្ម ក៏ត្រូវក្រសួងដាក់កំហិតឱ្យក្រុមហ៊ុនទាំងអស់ត្រូវធានាឱ្យបានផងដែរ។
ក្រៅពីការដាក់បទបញ្ជា ក្រសួងតាមរយៈសេចក្តីសម្រេច ក៏បានព្រមានលុបចោលគម្រោងវិនិយោគរបស់ក្រុមហ៊ុន ដែលទទួលដីសម្បទានក្នុងករណីណា ដែលក្រុមហ៊ុនមិនបានបំពេញតាមកិច្ចសន្យា ឬតាមច្បាប់នានារបស់រដ្ឋ។ ការចេញបទបញ្ជា និងការណែនាំពីក្រសួងបរិស្ថាន និងក្រសួងកសិកម្មនេះ ត្រូវបានគេមើលឃើញថា ធ្វើឡើងនៅស្របពេលដែលការតវ៉ារឿងបញ្ហាដីធ្លី និងការកាប់បំផ្លាញព្រៃឈើបានកក្រើកឡើងវិញ។
សូមបញ្ជាក់ជូនថា បញ្ហាព្រៃឈើ និងបញ្ហាដីធ្លី រួមទាំងការផ្តល់ដីសម្បទានសេដ្ឋកិច្ច បានក្លាយជាជំងឺមហារីក នៅកម្ពុជា ដែលបានទាញ់ទម្លាក់ប្រជាប្រិយភាពរបស់គណបក្សកាន់អំណាច ក្នុងការបោះឆ្នោតអាណត្តិទី៥កន្លងទៅនេះ។
យ៉ាងណាក៏ដោយ ការចេញបទបញ្ជាណែនាំរបស់រដ្ឋាភិបាលនៅពេលនេះ គឺជាការបង្ហាញការយកចិត្តទុកដាក់របស់រដ្ឋាភិបាល ប៉ុន្តែ ប្រជាពលរដ្ឋកម្ពុជាទាំងមូល កំពុងទន្ទឹងរង់ចាំមើលលទ្ធផលនៃការអនុវត្តន៍ប្រកបផ្លែផ្លា ចេញពីសេចក្តីសម្រេច របស់ក្រសួងទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ