ចំនួនកុមារនៅក្នុងពន្ធនាគារមានការថយចុះជាង ៥០% ចាប់តាំងពីឆ្នាំ ២០១១ មក
នៅចុងខែមេសា ឆ្នាំ២០១៤ កុមារជាប់ពន្ធនាគារ មានចំនួន ២៨០ នាក់ ក្នុងពន្ធនាគារចំនួន ១៨ កន្លែង។ អង្គការលីកាដូ បានបញ្ជាក់ថាចំនួននេះ គឺមានការថយចុះច្រើនជាង ៥០% នៃចំនួនកុមារនៅក្នុងពន្ធនាគារ គិតចាប់ពីឆ្នាំ២០១១៕ នេះបើយោងតាមសេចក្តីថ្លែងការណ៍របស់អង្គការលីកាដូ ដែលបានចុះផ្សាយនៅថ្ងៃទី ៣០ ឧសភា ក្នុងឱកាសប្រារព្ធទិវាសិទ្ធិកុមារអន្តរជាតិ ខួបលើកទី ៦៥ នៅថ្ងៃទី ១ មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
អង្គការលីកាដូ នឹងប្រារព្ធទិវាសិទ្ធិកុមារអន្តរជាតិ ថ្ងៃ១មិថុនា ឆ្នាំ២០១៤ ដោយធ្វើការចែកជូននូវអាហារ និងសម្ភារៈដល់កុមារជាប់ពន្ធនាគារ និងកុមារតូចៗ ដែលរស់នៅជាមួយម្តាយក្នុងពន្ធនាគារ និងម្តាយដែលមានផ្ទៃពោះ នៅក្នុងពន្ធនាគារចំនួន ៨ កន្លែងក្នុងប្រទេសកម្ពុជា។ ហើយក៏មានការៀបចំកម្មវិធី លេងល្បែង រាំ ច្រៀង ក៏ដូចជាមានវាគ្មិនមួយចំនួនដែលនឹងមកនិយាយអំពីបញ្ហា ដែលប៉ះពាល់ដល់កុមារផងដែរ។
នៅក្នុងសេចក្តីថ្លែងការរបស់អង្គការលីកាដូបង្ហាញថា បញ្ហាជាច្រើន គឺនៅតែមានមកលើអ្នកជាប់ពន្ធនាគារជាកុមារ និងស្ត្រីមានផ្ទៃពោះ ហើយនិងកុមារដែលកំពុងរស់នៅជាមួយម្តាយ ដែលជាប់ពន្ធនាគារនៅក្នុងប្រទេសកម្ពុជា។ ហើយបញ្ហាទាំងនោះរួមមានការការអភិវឌ្ឍន៍ផ្នែករាងកាយ ផ្លូវចិត្ត និងសង្គម ការអប់រំ និងវគ្គបណ្តុះបណ្តាល ដែលជាកត្តាចំបង នៅក្នុងការស្តារសម្បទាឲ្យបានជោគជ័យ និងកាត់បន្ថយអត្រា នៃការប្រព្រឹត្តបទល្មើសម្តងទៀត ដែលកន្លងមក អនីតិជននៅក្នុងពន្ធនាគារកម្ពុជា មិនដែលទទួលបាននោះទេ។
អ្នកគ្រប់គ្រងគម្រោងពន្ធនាគារ នៃអង្គការលីកាដូ កញ្ញា ង៉ែត សុគន្ធ បានបញ្ជាក់ថា កុមារដែលជាប់ពន្ធនាគារ ជាទូទៅគឺមកពីគ្រួសារក្រីក្រ ដែលធ្វើឲ្យពួកគេរឹតតែងាយរងគ្រោះ នឹងមានគ្រោះថ្នាក់បន្ថែមទៀតពីការកេងប្រវ័ញ្ច និងនៅក្រោមបង្គាប់អ្នកដទៃ ហើយពួកគេតែងតែទទួលការប្រមាថមើលងាយ និងបន្ទាបបន្ថោក ដូចជាអ្នកជាប់ពន្ធនាគារវ័យជំទង់ផងដែរ។
នៅក្នុងឱកាសនៃទិវាកុមារអន្តរជាតិ អង្គការលីកាដូ សូមអំពាវនាវឲ្យមានការធ្វើឲ្យកាន់តែប្រសើរឡើង នូវការការពារកុមារនៅក្នុងពន្ធនាគារ និងអំពាវនាវដល់អាជ្ញាធរទាំងឡាយ ឲ្យជួយដោះស្រាយនូវបញ្ហាមួយចំនួននៃបញ្ហាទាំងនេះឲ្យបានឆាប់រហ័ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ