សម្ព័ន្ធអង្គការចំនួន ២១ ព្រួយបារម្មណ៍ ចំពោះការបញ្ជូនជនភៀសខ្លួនពីអូស្ត្រាលីមកកម្ពុជា
សម្ព័ន្ធអង្គការចំនួន ២១ ដែលមានឈ្មោះថា គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា ដែលបានចេញសេចក្តីថ្លែងការណ៍មួយ នៅថ្ងៃទី៤ មិថុនានេះ បានរិះគន់ខ្លាំង ដល់ការព្រមព្រៀង (ដែលមិនទាន់សម្រេច) បញ្ជូនជនភៀសខ្លួនពីអូស្ត្រាលីមកកាន់កម្ពុជា។ បញ្ហារំលោភសិទ្ធិមនុស្ស និងភាពក្រីក្រ នៅកម្ពុជា គឺជាការព្រួយបារម្មណ៍ជាងគេ។ ប៉ុន្តែមន្ត្រីរដ្ឋាភិបាលកម្ពុជាបានបញ្ជាក់ថា កម្ពុជាមិនមានផលប៉ះពាល់ពីការផ្តល់សិទ្ធិជ្រកកោននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ខណៈដែលរដ្ឋាភិបាលកម្ពុជា និងរដ្ឋាភិបាលអូស្ត្រាលី កំពុងតែធ្វើការឆ្ពោះទៅរកកិច្ចព្រមព្រៀងបញ្ជូនជនភៀសខ្លួនពីអូស្ត្រាលីមកកាន់កម្ពុជា ការិះគន់បានកើតឡើងជាហូរហែ បើទោះបីជាមិនទាន់មានកិច្ចព្រមព្រៀងផ្លូវការណាមួយនៅឡើយ។ នៅថ្ងៃពុធនេះ សម្ព័ន្ធអង្គការចំនួន២១ បានលើកឡើងថា កម្ពុជាដែលជាប្រទេសមានប្រវត្តិរំលោភសិទ្ធិមនុស្ស ហើយក្រីក្រទៀតនោះ គឺមិនមែនជាកន្លែងមានសុវត្ថិភាពសម្រាប់ជនភៀសខ្លួននោះទេ។
ក្នុងសេចក្តីថ្លែងការដែលមានចំនួនបីទំព័រ សម្ព័ន្ធអង្គការបានរិះគន់ខ្លាំងៗតែម្តងលើរដ្ឋាភិបាលអូស្ត្រាលីថា “កំពុងតែគេចចេញពីការទទួលខុសត្រូវ និងកាតព្វកិច្ចរបស់ខ្លួន នៅក្រោមអនុសញ្ញាជនភៀសខ្លួន ហើយទំលាក់ទៅឱ្យប្រទេសក្រីក្រ។
ក្រុមអង្គការដែលធ្វើការងារលើបញ្ហាសិទ្ធិមនុស្សទាំងនេះ បានគូសបញ្ជាក់ថា ប្រទេសកម្ពុជា មិនមានលទ្ធភាពគ្រប់គ្រាន់ក្នុងការផ្តល់កិច្ចការការពារផ្លូវច្បាប់ និងរាងកាយដែលរូមសិទ្ធិពលរដ្ឋក្នុងនយោបាយ សេដ្ឋកិច្ច សង្គម និងវប្បធម៌នោះឡើយ។ បើតាមឧត្តមស្នងការសហប្រជាជាតិ ទទួលបន្ទុកជនភៀសខ្លួន (UNHCR) ប្រទេសដែលផ្តល់ជម្រកដល់ជនភៀសខ្លួនបន្ទាប់ គួរមានល័ក្ខខ័ណ្ឌស្រដៀង ឬប្រហាក់ប្រហែលទៅនឹងប្រទេសដែលជនភៀសខ្លួនកំពុងស្នាក់នៅ។
ក្រុមអង្គការដដែលនេះ បានចោទប្រកាន់កម្ពុជាថា បានបង្ក្រាបលើការប្រមូលផ្តុំ និងការបញ្ចេញមតិ រួមទាំងអំពើពុករលួយ។ ដោយឡែក ការចាប់បញ្ជូនជនជាតិចិនអ៊ុយហ្គួទៅឱ្យចិន និងការបញ្ជូនសង្ឃកម្ពុជាក្រោម ទៅឱ្យវៀតណាមវិញនោះ ក៏ជាលឡ្ហីករណ៍ផងដែរ។ ក្រៅពីនេះ ការសន្យាផ្តល់ជំនួយប្រមាណពី៤០ទៅ៨០លានដុល្លារអាមេរិក ក៏ដើម្បីជាថ្នូរក្នុងការផ្តល់ជម្រកដល់ជនភៀសខ្លួនពីអូស្ត្រាលីផងដែរ។
បើតាមសម្ព័ន្ធអង្គការទាំង២១ អូស្ត្រាលីគ្រោងនឹងបញ្ជូនជនភៀសពីប្រទេសខ្លួនប្រមាណ១ពាន់នាក់មកកាន់កម្ពុជា។ ប៉ុន្តែអ្នកនាំពាក្យក្រសួងការបរទេស កម្ពុជា លោក កុយ គួង បានច្រានចោលពីចំនួនទាំងនេះ ហើយអះអាងថា ប្រទេសទាំងពីរនៅមិនទាន់ឈានដល់ល័ក្ខខ័ណ្ឌព្រមព្រៀងនៅឡើយនោះទេ។ កុំថាឡើយចំនួនជនភៀសខ្លួននោះ។ លោក កុយ គួង បានអះអាងថា ការទទូលយកជនភៀសខ្លួនពីអូស្ត្រាលី គឺមិនបានប៉ះពាល់ដល់ប្រយោជន៍កម្ពុជានោះទេ ទាំងសេដ្ឋកិច្ច និងសង្គម។
បើទោះបីជាបែបណាក៏ដោយ គណៈកម្មាធិការប្រព្រឹត្តិកម្ម បានអំពាវនាវឱ្យរដ្ឋាភិបាលអូស្ត្រាលីពិចារណាឡើងវិញ ពីព្រោះពួកគេយល់ថាអ្នកដែលទទួលបានផលប្រយោជន៍ពីកិច្ចព្រមព្រៀងបញ្ជូនមនុស្សនេះ គឺរដ្ឋាភិបាលអូស្ត្រាលី និងមន្ត្រីរដ្ឋាភិបាលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ