សហគមន៍ខ្មែរកម្ពុជាក្រោមថ្កោលទោស ការអះអាងរបស់អ្នកនាំពាក្យស្ថានទូតវៀតណាម
សហគមន៍ខ្មែរកម្ពុជាក្រោម នៅថ្ងៃសៅរិ៍ទី៧មិថុនានេះ បានចេញសេចក្តីថ្លែងការណ៍មួយ ដោយបានថ្កោលទោសចំពោះការលើកឡើងរបស់លោក ត្រឹង វ៉ាន់ថុង អ្នកនាំពាក្យស្ថានទូតវៀតណាមប្រចាំនៅកម្ពុជាដែលបានអះអាងថា បារាំងមិនបានកាត់ទឹកដីខ្មែរកម្ពុជាក្រោមអោយវៀតណាមនោះទេ តែទឹកដីកម្ពុជាក្រោមជារបស់វៀតណាមតាំងពីយូរយារណាស់មកហើយ ។ ការអះអាងបែបនេះ ត្រូវបានសហគមន៍ខ្មែរកម្ពុជាក្រោមចាត់ទុកថា ជាការបំភ្លៃប្រវត្តិសាស្ត្រ។
ចុះផ្សាយនៅថ្ងៃ៖
ស្តាប់ - ០២:០៤
ប្រតិកម្មរបស់សហគមន៍ខ្មែរកម្ពុជាក្រោម បានកើតឡើងមួយថ្ងៃប៉ុណ្ណោះ ក្រោយពីអ្នកនាំពាក្យស្ថានទូតវៀតណាម លោក ត្រឹង វ៉ាន់ថុង បានអះអាងប្រាប់វិទ្យុបរទេសផ្សាយជាខេមរៈភាសាកាលពីថ្ងៃទី៦មិថុនាថា “បារាំងមិនបានកាត់ទឹកដីខ្មែរកម្ពុជាក្រោមអោយវៀតណាមនោះទេ តែទឹកដីកម្ពុជាក្រោមជារបស់វៀតណាមតាំងពីយូរយារណាស់មកហើយ និងថា ព័ត៌មានបាត់បង់ទឹកដីគ្មានអ្វីជាមូលដ្ឋានទេ គ្មានអ្វីជាភស្តុតាងទេ។
ក៏ប៉ុន្តែក្នុងសេចក្តីថ្លែងការណ៍របស់សហគមន៍ខ្មែរកម្ពុជាក្រោមនៅថ្ងៃទី៧ខែមិថុនានេះ បានលើកឡើងថា "ការថ្លែងក្នុងនាមរដ្ឋាភិបាលសាធារណរដ្ឋសង្គមនិយមវៀតណាមបែបនេះ គឺជាចេតនាបំភ្លៃការពិតនៃប្រវត្តិសាស្ត្រ និងជាការបញ្ឈឺឲ្យប្រជារាស្ត្រខ្មែរ ឈឺចាប់ដោយចេតនា។ គ្មានអ្នកប្រវត្តិសាស្ត្រណាម្នាក់បដិសេធថា ទឹកដីកម្ពុជាក្រោម មិនមែនជាទឹកដីរបស់ខ្មែរនោះទេ។ តាមរយៈសេចក្តីថ្លែងការណ៍ លោក ថាច់ សេដ្ឋា ដែលជាប្រធាន បានថ្កោលទោសដាច់អហ័ង្ការ រាល់ការថ្លែងណាមួយដោយបំភ្លៃការពិតនៃប្រវត្តិសាស្ត្រ ដែលមានចេតនា អុជអាលបង្កអោយមានអំពើហិង្សា ឬការរើសអើងពូជសាសន៍ ដោយសារតែប្រវត្តិសាស្ត្រអតីតកាល។
អ្វីជាការកត់សំគាល់ បញ្ហាទឹកដីកម្ពុជាក្រោម កំពុងក្លាយជាប្រធានបទក្តៅមួយ សំរាប់អ្នកនយោបាយខ្មែរបច្ចុប្បន្ន និងកំពុងទទួលបានការចាប់អារម្មណ៍យ៉ាងផុសផុលពីសំណាក់យុវជន។ ជាក់ស្តែងនៅក្នុងការប្រារព្ធខួបលើកទី៦៥នៃការបាត់បង់ទឹកដីកម្ពុជាកាលពីថ្ងៃទី៤មិថុនាកន្លងទៅ ប្រធានគណបក្សសង្គ្រោះជាតិលោក សម រង្ស៊ី និងលោក កឹម សុខា បានលើកឡើងពីការសន្យាកំណត់យកថ្ងៃទី៤មិថុនាជាថ្ងៃបុណ្យជាតិ និងអនុញ្ញាតអោយពលរដ្ឋខ្មែរកម្ពុជាក្រោមអាចឆ្លងដែនមកកាន់ប្រទេសកម្ពុជា ដោយសេរី និងមិនចាំបាច់មានលិខិតឆ្លងដែននោះទេ។ ប៉ុន្តែការថ្លែងបែបនេះ ត្រូវបានទទួលប្រតិកម្មពីមន្ត្រីរដ្ឋាភិបាលថា ជាការកេងចំណេញនយោបាយរបស់បក្សប្រឆាំង។
គួររំលឹកថា ប្រទេសបារាំងបានកាត់ទឹកដីខ្មែរកម្ពុជាក្រោម២១ខេត្ត ទៅអោយអាជ្ញាធរវៀតណាមត្រួតត្រា កាលពីថ្ងៃទី៤ខែមិថុនាឆ្នាំ១៩៤។ ជាថ្ងៃដែលសហគមន៍ខ្មែរកម្ពុជាក្រោម តែងតែប្រារព្ធខួបនៃការបាត់បង់ទឹកដីកម្ពុជាក្រោមជារៀងរាល់ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ