ពលករខ្មែរដែលសំរុកចាកចេញពីប្រទេសថៃនៅថ្ងៃសៅរិ៍នេះ កើនឡើងទ្វេដង
នៅថ្ងៃសៅរិ៍នេះ ចំនួនពលករខ្មែរដែលអាជ្ញាធរថៃបានចាប់បញ្ជូនមកកាន់ប្រទេសកម្ពុជាវិញបានកើនឡើងទ្វេដង បើប្រៀបធៀបទៅនឹងថ្ងៃម្សិលមិញ។ បើតាមអភិបាលខេត្តបន្ទាយមានជ័យ គិតតាំងពីថ្ងៃទី៦មិថុនាមក ពលករខ្មែរចំនួនជាង៨ម៉ឺននាក់ហើយ ដែលត្រូវបានរដ្ឋាភិបាលយោធាថៃចាប់បញ្ជូនមកកាន់ប្រទេសកម្ពុជា។ ហើយការចាប់បញ្ជូននៅតែមានជាបន្តបន្ទាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
មានពលករខ្មែរជិត៨ម៉ឺននាក់ហើយ ដែលត្រូវបានអាជ្ញាធរថៃ ចាប់បញ្ជូនមកកាន់ប្រទេសកម្ពុជាវិញ តាមច្រកទ្វារអន្តរជាតិប៉ោយប៉ែតតាំងពីថ្ងៃទី៦មិថុនាមក ហើយចំនួននៃការចាប់បញ្ជូននេះ បានកើនឡើងទ្វេដងនៅថ្ងៃសៅរិ៍នេះ។ នេះបើតាមការបញ្ជាក់ពីលោក គោ ស៊ុំសារឿត អភិបាលខេត្តបន្ទាយមានជ័យ។
លោកអភិបាលបានបញ្ជាក់ថា គិតត្រឹមរសៀលថ្ងៃទី១៤មិថុនានេះ ពលករខ្មែរនៅតែត្រូវបានអាជ្ញាធរថៃចាប់បញ្ជូនមកជាបន្តបន្ទាប់។ ហើយឆ្លើយតបទៅនឹងបញ្ហានេះ អាជ្ញាធរខេត្តបានប្រើប្រាស់កំលាំងប៉ូលិស កងរាជអាវុធហត្ថ និងសមត្ថកិច្ចការពារព្រំដែនជាង៣០០នាក់ដើម្បីសម្របសម្រួល និងចាំទទួលយកពួកគេនៅឯព្រំដែនប៉ោយប៉ែត រួមទាំងកំលាំងមនុស្សធម៌មកពីស្ថាប័នផ្សេងទៀត ហើយជាមួយគ្នានេះដែរ រថយន្តយោធាចំនួនជាង៣០០គ្រឿងក៏ត្រូវបានប្រើប្រាស់សំរាប់ដឹកជញ្ជូនពលករខ្មែរទាំងនោះ ទៅកាន់ស្រុកកំណើតរបស់ពួកគេផងដែរ។
សូមបញ្ជាក់ថា កាលពីរសៀលថ្ងៃទី១៣មិថុនាម្សិលមិញ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានកត់ត្រាថា ថៃបានបញ្ជូនពលករកម្ពុជាភាគច្រើនជាពលករខុសច្បាប់ វិលត្រលប់មកវិញចំនួន៤៣.៦០០នាក់ ក្នុងនោះ នៅប៉ោយប៉ែត មានច្រើនជាងគេ រហូតដល់ ៣៣.៥០០ នាក់។ក្រៅពីនោះ មាននៅខេត្តបាត់ដំបង ៧៥០០ នាក់ ឧត្តរមានជ័យ ១១២៥ នាក់ ប៉ៃលិនជាង ១០០ នាក់ និងនៅខេត្តកោះកុងមួយចំនួនទៀត។
ដោយឡែក អភិបាលខេត្តបន្ទាយមានជ័យ លោក គោ ស៊ុំសារឿត បានអះអាងនៅថ្ងៃសៅរ៍នេះថា ចំនួនពលករខ្មែរដែលថៃបានចាប់បញ្ជូនមកកាន់ប្រទេសកម្ពុជាវិញ តាំងពីថ្ងៃទី៦មិថុនាមក បានកើនឡើងដល់៨ម៉ឺននាក់ហើយ។ បើតាមតួលេខរបស់រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ពលករកម្ពុជាដែលចូលធ្វើការក្នុងប្រទេសថៃ សព្វថ្ងៃ មានចំនួនសរុបប្រមាណជិត ២០ ម៉ឺននាក់ ហើយភាគច្រើនជាពលករខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ