សម្ព័ន្ធកំណែទម្រង់ការបោះឆ្នោតកម្រើកឡើងវិញ ពេលលោក ស៊ូប៊ែឌី ស្ថិតនៅកម្ពុជា
អ្នកនយោបាយខ្វែងគំនិតគ្នា កំណែទម្រង់ការបោះឆ្នោតជាប់គាំង។ សង្គមស៊ីវិលទ្រាំស្ងៀមមិនបាន។ វិភាគទានថ្មីផុសឡើងឯសណ្ឋាគារ ហ៊ីម៉ាវ៉ារិ នៅថ្ងៃអង្គារ។ សម្ព័ន្ធកំណែទម្រង់ការបោះឆ្នោតធ្វើសិក្ខាសាលានៅទីនោះ។ កាលៈទេសៈ «សមស្រប» សម្រាប់ស្នើវិសោធនកម្មក្របខណ្ឌច្បាប់ ក្រៅរដ្ឋសភា។ គឺ «សមស្រប» នឹងវត្តមានអ្នករាយការណ៍ពិសេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
អង្គការមិនមែនរដ្ឋាភិបាល ចំនួន២០អង្គភាព ដែលផ្តុំគ្នាបានជាសម្ព័ន្ធកំណែទម្រង់ការបោះឆ្នោត ហៅកាត់ជាភាសាអង់គ្លេសថា អ៊ីរ៉ា (ERA) ធ្វើសិក្ខាសាលាសាធារណៈ ឯសណ្ឋាគារ ហ៊ីម៉ាវ៉ារិ នៅថ្ងៃអង្គារ ទី២៤ ខែមិថុនា។ ថ្វីបើមិនមែននៅក្នុងរដ្ឋសភា កាលៈទេសៈហាក់ដូចជា «សមស្រប» សម្រាប់ឱ្យសង្គមស៊ីវិលធ្វើ «សេចក្តីស្នើវិសោធនកម្មក្របខណ្ឌច្បាប់» ទាក់ទងនឹងស្ថាប័នគ្រប់គ្រងការបោះឆ្នោត យន្តការដោះស្រាយវិវាទបោះឆ្នោត ការចុះឈ្មោះបោះឆ្នោត បញ្ជីឈ្មោះបោះឆ្នោត និងប្រព័ន្ធផ្សព្វផ្សាយក្នុងរដូវបោះឆ្នោត។
«សមស្រប» ម៉្យាងដោយសារគណបក្សនយោបាយជាប់ឆ្នោតទាំងពីរ ពោលគឺគណបក្សប្រជាជនកម្ពុជា និងគណបក្សសង្គ្រោះជាតិ ដែលមូលមាត់គ្នាលើចំណុចជាច្រើនទៅហើយនោះ បានដើរលើផ្លូវទ័លច្រកជាថ្មី បន្ទាប់ពីគណបក្សដឹកនាំរដ្ឋាភិបាល បានបដិសេធសំណើរបស់គណបក្សប្រឆាំង ក្នុងការជ្រើសរើសសមាសភាពគណៈកម្មាធិការជាតិរៀបចំការបោះឆ្នោត ដោយសំឡេង២ភាគ៣នៃសមាជិករដ្ឋសភា។ ម៉្យាងទៀត សិក្ខាសាលានេះកើតឡើងចំពេលអ្នករាយការណ៍ពិសេសអង្គការសហប្រជាជាតិស្តីពីស្ថានភាពសិទ្ធិមនុស្ស ស្ថិតក្នុង «បេសកកម្មស្វែងរកការពិតនៅកម្ពុជា»។ តាមសេចក្តីជូនដំណឹងរបស់សម្ព័ន្ធកំណែទម្រង់ការបោះឆ្នោត លោក សុរិយា ប្រាសាទ ស៊ូប៊ែឌី ត្រូវថ្លែងសុន្ទរកថា និងសម្ដែងមតិ បើកសិក្ខាសាលានោះផង។
លើសពីនេះទៀត លោក ធន់ សារ៉ាយ ប្រធានសមាគមអាដហុក ការពារសិទ្ធិមនុស្ស និងអភិវឌ្ឍន៍នៅកម្ពុជា ព្រមទាំងអ្នកស្រី ធីតា ឃឹះ នាយិកាអង្គការសីលការ និងប្រធានគណៈកម្មាធិការលើកស្ទួយស្ត្រី ក្នុងវិស័យនយោបាយ ចូលរួមថ្លែងសន្ទរកថាបើក និងបិទសិក្ខាសាលានោះផងដែរ។ ព្រឹត្តិការណ៍នោះជាឱកាសសម្រាប់ឱ្យអង្គការមិនមែនរដ្ឋាភិបាល ដែលជាសមាជិករបស់សម្ព័ន្ធកំណែទម្រង់ការបោះឆ្នោត បង្ហាញ «សេចក្តីស្នើវិសោធនកម្មក្របខ័ណ្ឌច្បាប់» របស់ខ្លួន ចំពោះមុខគណបក្សនយោបាយ ស្ថាប័នពាក់ព័ន្ធនឹងការបោះឆ្នោត ក៏ដូចជាសិក្ខាកាម នៅពេលព្រឹក។ នៅពេលរសៀល អ្នកចូលរួមទាំងឡាយ អាចពិភាក្សាអំពីសំណើរនោះ ជាមួយភាគីពាក់ព័ន្ធ។
កន្លងទៅ ជាពិសេសគឺមុននិងក្រោយការបោះឆ្នោតជ្រើសរើសតំណាងរាស្ត្រឆ្នាំ២០១៣ អ៊ីរ៉ា ធ្លាប់បានផ្តល់មតិជាច្រើន ដើម្បី «កែលម្អ» ដំណើររៀបចំការបោះឆ្នោតនៅកម្ពុជា ប៉ុន្តែអនុសាសន៍ទាំងអម្បាលម៉ាននោះ ត្រូវបានច្រានចោលដោយរដ្ឋាភិបាលរបស់គណបក្សប្រជាជនកម្ពុជា ដែលចោទសម្ព័ន្ធនេះថា «ស្និទ» នឹងគណបក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ