សង្គមស៊ីវិលយល់ឃើញដូចគណបក្សសង្គ្រោះជាតិលើកំណែទម្រង់គជប
ក្រុមអង្គការសង្គមស៊ីវិល បានបង្ហាញសេចក្តីព្រាងកំណែទម្រង់ការបោះឆ្នោត រួមមាន៖ សេចក្តីស្នើវិសោធនកម្មក្របខ័ណ្ឌច្បាប់ ទាក់ទងស្ថាប័នគ្រប់គ្រងការបោះឆ្នោត យន្តការដោះស្រាយវិវាទការបោះឆ្នោត ការចុះឈ្មោះបោះឆ្នោត បញ្ជីឈ្មោះបោះឆ្នោត និងប្រព័ន្ធផ្សពផ្សាយក្នុងអំឡុងពេលបោះឆ្នោត។ សេចក្តីព្រាង ដែលលើកមកពិភាក្សា ក្នុងកិច្ចប្រជុំរយៈពេលពេញថ្ងៃ នៅថ្ងៃអង្គារនេះ ដូចនឹងសំណើគណបក្សសង្គ្រោះជាតិ នោះគឺការជ្រើសរើសសមាជិកគ.ជ.ប ត្រូវសម្រេចដោយមតិគាំទ្រ ២ ភាគ ៣ នៃសមាជិកសភាសរុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
សេចក្តីស្នើវិសោធនកម្មក្របខ័ណ្ឌច្បាប់ ទាក់ទងស្ថាប័នគ្រប់គ្រងការបោះឆ្នោត គជប យន្តការដោះស្រាយវិវាទការបោះឆ្នោត ការចុះឈ្មោះបោះឆ្នោត និងបញ្ជីឈ្មោះបោះឆ្នោត ព្រមទាំងកំណែទម្រង់ប្រព័ន្ធផ្សពផ្សាយ ក្នុងអំឡុងពេលបោះឆ្នោត ជាប្រធានបទ ដែលសម្ព័ន្ធកំណែទម្រង់ការបោះឆ្នោត មានអង្គការសង្គមស៊ីវិល ២០ ស្ថាប័ន ជាសមាជិក បានជួបប្រជុំ ពិភាក្សាដោយបើកចំហ រយៈពេលពេញមួយថ្ងៃ នៅថ្ងៃអង្គារ ទី២៤ ខែមិថុនា ឆ្នាំ២០១។
ប្រធានបទនិមួយៗ ត្រូវបានអង្គការស៊ីវិល លើកបង្ហាញ និងពិភាក្សាដេញដោលយ៉ាងលម្អិត។ ដំបូងនិយាយពីគ.ជ.ប ត្រូវបានលោក គល់ បញ្ញា នាយកប្រតិបត្តិអង្គការខុមហ្វ្រែល លើកឡើងថា សមាជិកគ.ជ.ប ត្រូវតែជ្រើសរើសដោយតម្លាភាពបំផុត។ សង្គមស៊ីវិលស្នើឲ្យបង្កើតគណៈកម្មការឯករាជ្យដែលមានសមាសភាព មកពីគណបក្សនយោបាយក្នុងរដ្ឋសភា តំណាងព្រះមហាក្សត្រ និងសង្គមស៊ីវិល ជ្រើសរើសបេក្ខភាព ហើយដាក់ឲ្យរដ្ឋសភា អនុម័តដោយសំឡេង ២ ភាគ ។
ការចុះឈ្មោះអ្នកបោះឆ្នោត ត្រូវធ្វើដោយគ.ជ.ប និងធ្វើក្នុងកុំព្យួទ័រ មានបញ្ចូលរូបថត ឬស្នាមមេដៃអ្នកបោះឆ្នោតជាដើម។ រីឯប្រព័ន្ធផ្សព្វផ្សាយវិញ សង្គមស៊ីវិល ចង់ឲ្យមានស្ថាប័នឯករាជ្យមួយ ដើម្បីគ្រប់គ្រងប្រព័ន្ធផ្សព្វផ្សាយ ពិសេសលើវិទ្យុ និងទូរទស្សន៍ គឺកុំឲ្យមានការជ្រៀតជ្រែកពីរដ្ឋាភិបាល នៅពេលបោះឆ្នោត ដូចពេលកន្លងមក។
សេចក្តីព្រាងកំណែទម្រង់ការបោះឆ្នោត ដែលសង្គមស៊ីវិល លើកបង្ហាញ និងពិភាក្សានៅថ្ងៃអង្គារនេះ ត្រូវបានលោក ធន សារាយ លើកឡើងថា សង្គមស៊ីវិល នឹងរៀបចំសំណើរួម បូកបញ្ចូលទាំងប្រតិកម្មរបស់វាគ្មិន ដាក់ទៅកាន់គណបក្សប្រជាជនកម្ពុជា និងគណបក្សសង្គ្រោះជាតិ។ សព្វថ្ងៃ គណបក្សទាំងពីរកំពុងជជែកដោះស្រាយនយោបាយ មិនត្រូវរ៉ូវគ្នា ពិសេសលើកំណែទម្រង់ការបោះឆ្នោត ផ្តើមដំបូងពីការជ្រើសរើសសមាជិក គ.ជ.ប។
ការជ្រើសរើសសមាជិកគ.ជ.ប តាមមតិ ២ ភាគ ៣ ដែលជាការស្នើឡើងដោយគណបក្សសង្គ្រោះជាតិ និងពេលនេះសង្គមស៊ីវិល ប្រកាសឡើងដូចគ្នាថែមទៀត ត្រូវបានតំណាងក្រុមចរចាគណបក្សប្រជាជនកម្ពុជា លោក ព្រុំ សុខា ចាត់ទុកថា ជាសំណើ ដើម្បីធ្វើឲ្យជាប់គាំង មិនអាចបោះឆ្នោត នៅរដ្ឋសភា ជ្រើសរើសគ.ជ.ប បានទេ។
ប៉ុន្តែលោក គល់ បញ្ញា អះអាងនៅថ្ងៃនេះថា ការបោះឆ្នោតអនុម័តនៅរដ្ឋសភា តាមមតិ ២ ភាគ ៣ ដែលជាប់គាំង ក្នុងការជ្រើសរើសរដ្ឋាភិបាល កន្លងមក នៅមុខឆ្នាំ២០០៦ ដោយសារតែការតថ្លៃអំណាចប៉ុណ្ណោះ។
ក្នុងពេលបើកកិច្ចប្រជុំ នៅព្រឹកថ្ងៃអង្គារនេះ លោក ស៊ូរិយា ស៊ូប៊ែរឌី អ្នករាយការណ៍ពិសេស អង្គការសហប្រជាជាតិ ស្តីពីស្ថានភាពសិទ្ធិមនុស្ស នៅកម្ពុជា បានយល់ស្របនឹងសង្គមស៊ីវិល លើសេចក្តីព្រាងកំណែទម្រង់ការបោះឆ្នោត។ កំណែទម្រង់ការបោះឆ្នោត ពិសេសលើស្ថាប័ន គ.ជ.ប ត្រូវបានលោក ស៊ូប៊ែឌី ប្រកាសថា ជាកិច្ចការត្រូវធ្វើ ដើម្បីឲ្យការបោះឆ្នោត សេរី យុត្តិធម៌ ត្រឹមត្រូវ និងគ្មានអំពើហិង្សា។ កំណែទម្រង់ការបោះឆ្នោត ត្រូវបានដាក់ចូលក្នុងអនុសាសន៍បញ្ជូនទៅកាន់រដ្ឋាភិបាលកម្ពុជា ក្នុងអាណត្តិរបស់លោក អស់ពេល ៥ ឆ្នាំ មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ