សហព័ន្ធនិស្សិតបញ្ញវន្តកម្ពុជាបានជូនដំណឹងសាលាក្រុងភ្នំពេញអំពីគម្រោងបាតុកម្មហើយ
នៅព្រឹកថ្ងៃចន្ទ ទី១៤ ខែកក្កដា សហព័ន្ធនិស្សិតបញ្ញវន្តកម្ពុជាបានជូនដំណឹងសាលាក្រុងភ្នំពេញ អំពី បាតុកម្មដាក់ញត្តិនៅស្ថានទូតបរទេសចំនួន៧ ដែលគ្រោងធ្វើនៅថ្ងៃទី២១ ខែកក្កដា នោះហើយ។ បាតុកម្ម ដែលនឹងប្រមូលផ្តុំសមាជិកនៃសម្ព័ន្ធយុវជន និងអង្គការសមាគមខ្មែរកម្ពុជាក្រោមជាច្រើនផ្សេងទៀតនោះ មានគោលបំណងជម្រុញឱ្យប្រទេសមហាអំណាច «ដាក់សម្ពាធដល់ប្រទេសវៀតណាម»។ សាលារាជធានីភ្នំពេញបញ្ជាក់អំពីការទទួលលិខិតនោះ ហើយថាកំពុងពិនិត្យ។ រឿងរ៉ាវនេះកាន់តែផុសផុលឡើង។
ចុះផ្សាយនៅថ្ងៃ៖
ស្តាប់ - ០២:៤០
រឿងរ៉ាវទាក់ទងនឹងសម្តីរបស់លោក ត្រឹង វ៉ាន់ ថុង តាំងពីថ្ងៃទី០៦ ខែមិថុនា ឆ្នាំ២០១៤ ដែលថា«ទឹកដីខ្មែរកម្ពុជាក្រោមគឺជាទឹកដីពីដូនតារបស់វៀតណាម ហើយបារាំងមិនបានកាត់ដីខ្មែរឱ្យទៅវៀតណាមទេ»នោះមិនទាន់ចប់ឡើយ ហើយកាន់តែផុលផុសឡើង។ លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា បានប្រាប់នៅព្រឹកថ្ងៃចន្ទ ទី១៤ ខែកក្កដា ថា អង្គការរបស់លោក ចូលរួមដោយសម្ព័ន្ធយុវជនចំនួន៦ក្រុមផ្សេងទៀត បានដាក់លិខិតទៅសាលារាជធានីភ្នំពេញរួចហើយ ដើម្បីជូនដំណឹងអំពីបាតុកម្មដាក់ញត្តិនៅតាមស្ថានទូតរបស់ប្រទេសមហាអំណាចចំនួន៧ ដែលគ្រោងធ្វើនៅថ្ងៃទី២១ ខែកក្កដា ឆ្នាំ២០១។ លោក ឡុងឌីម៉ង់ អ្នកនាំពាក្យឱ្យសាលារាជធានីភ្នំពេញ បានបញ្ជាក់អំពីការទទួលលិខតនោះ និងបានបន្ថែមថាគណៈអភិបាលត្រូវការពេលពិនិត្យ និងប្រជុំជាមួយអ្នកដឹកនាំបាតុកម្ម។
នេះជាគម្រោងធ្វើបាតុកម្មជាលើកទី២ បន្ទាប់ពីបាតុកម្មលើកទី១ ពោលគឺនៅថ្ងៃទី០៨ ខែកក្កដាដដែល បានកើតឡើង និងត្រូវបានបង្ក្រាបដោយអាជ្ញាធរ។ ពេលនោះ គោលបំណងរបស់បាតុករគឺដើម្បីឱ្យអ្នកនាំពាក្យស្ថានទូតវៀតណាមនៅកម្ពុជា ធ្វើការសុំទោស និងកែតម្រូវពាក្យសម្ដីរបស់ខ្លួន ដែលបានថ្លែងតាមវិទ្យុអាស៊ីសេរី។ ពេលនេះ ក្រៅពីដើម្បីឱ្យលោក ត្រឹង វ៉ាន់ ថុង សុំទោស និងកែតម្រូវពាក្យសំដីរបស់ខ្លួន គោលបំណងនៃបាតុកម្មដាក់ញត្តិនៅតាមស្ថានទូត គឺដើម្បី«ជម្រុញឱ្យ»ស្ថានទូតសហរដ្ឋអាមេរិក ស្ថានទូតបារាំង ស្ថានទូតអង់គ្លេស ស្ថានទូតរុស្សី ស្ថានទូតចិន ស្ថានទូសហភាពអឺរ៉ុប«ដាក់សម្ពាធដល់ប្រទេសវៀតណាម ដើម្បីគោរពសិទ្ធិ និងសេរីភាព របស់ប្រជាពលរដ្ឋខ្មែរក្រោម»ផងដែរ។
អង្គការ សមាគមខ្មែរកម្ពុជាក្រោមជាច្រើនទៀតនឹងចូលរួមក្នុងព្រឹត្តិការណ៍នោះ។
សេចក្តីថ្លែងការណ៍របស់សហគមន៍ខ្មែរកម្ពុជាក្រោម ចុះថ្ងៃទី១៣ ខែកក្កដា បានទាំងចាត់ទុកសម្ដីរបស់អ្នកនាំពាក្យក្រសួងការបរទេសវៀតណាម ឈ្មោះ ឡេ ហាយ ប៊ិញ ដែលស្នើឱ្យរដ្ឋាភិបាលកម្ពុជាចាត់វិធានការទប់ស្កាត់បាតុករនៅមុខស្ថានទូតវៀតណាម ថា«ជាការជ្រៀតជ្រែកកិច្ចការផ្ទៃក្នុងកម្ពុជា និងខុសគោលការណ៍របស់ប្រទេសអាស៊ានមិនអាចប្រកែកបាន»។ ទន្ទឹមនឹងនេះដែរ សហគមន៍ខ្មែរកម្ពុជាក្រោម បានទាមទារឱ្យរដ្ឋាភិបាលវៀតណាម«ត្រូវតែបញ្ឈប់ជាបន្ទាន់នូវការជ្រៀតជ្រែកចូលកិច្ចការផ្ទៃក្នុងកម្ពុជា ហើយត្រូវបញ្ឈប់រាល់ការអុជអាលបញ្ឆេះកំហឹងប្រជារាស្ត្រខ្មែរ»។
ប៉ុន្តែ លោក ខៀវ សុភ័គ អ្នកនាំពាក្យក្រសួងមហាផ្ទៃកម្ពុជា បានថ្លែងថា ការលើកឡើងរបស់អ្នកនាំពាក្យក្រសួងការបរទេសវៀតណាមខាងលើ ជា«សិទ្ធិរបស់គាត់»។ ក្នុងនាមលោកផ្ទាល់ លោក ខៀវ សុភ័គ មើលឃើញថា «នោះជាការស្នើសុំជំនួយពីកម្ពុជា» ហើយ«យើងរីករាយនឹងជួយសម្របសម្រួល ព្រោះយើងដឹងប្រវត្តិសាស្ត្រទាំងអស់គ្នា»។ ទោះបីជាយ៉ាងណា អ្នកនាំពាក្យក្រសួងមហាផ្ទៃបញ្ជាក់ថា ប្រជាពលរដ្ឋកម្ពុជាមានសិទ្ធិធ្វើបាតុកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ