រដ្ឋសភា កម្ពុជា-ឡាវ-វៀតណាម ប្រជុំនិយាយពីបទល្មើស នៅតំបន់ត្រីកោណ
នៅព្រឹកថ្ងៃពុធនេះ រដ្ឋសភា កម្ពុជា-ឡាវ-វៀតណាម បានបើកកិច្ចប្រជុំចង្អៀតមួយនៅសណ្ឋាគារ សូហ្វីតែល ពិភាក្សា ពីបញ្ហាប្រឈមមួយចំនួន ដែលត្រូវដោះស្រាយ។ បញ្ហាទាំង នោះរួមមាន ការជួញដូរគ្រឿងញៀន ការជួញដូរមនុស្ស និងបទល្មើសព្រៃឈើ ជាដើម។ ក្រៅពីនោះនៅមានបញ្ហាផ្សេងៗទៀតដូចជា វិស័យអប់រំ ការអភិវឌ្ឍន៍ហេដ្ឋារចនាសម្ព័ន្ធ និងបញ្ហាមួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ការជួញដូរគ្រឿងញៀន បទល្មើសព្រៃឈើ បញ្ហាអន្តោប្រវេសន៍ខុសច្បាប់ជាដើម បានក្លាយទៅជាក្តីកង្វល់រួមរបស់ប្រទេសជាសមាជិកនៃតំបន់ត្រីកោណអភិវឌ្ឍន៍។ ការលើកឡើងបែបនេះធ្វើឡើងក្នុងពេលថ្លែងបើកកិច្ចប្រជុំស្តីពី “តំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម” អំពីតួនាទី និងសកម្មភាពរបស់គណៈកម្មការ និងគណៈកម្មាធិការទទួលបន្ទុកការពារជាតិ និងសន្តិសុខ របស់រដ្ឋសភានៃប្រទេសទាំងបីដែលហៅកាត់ថា CLV។
អនុប្រធានទី២រដ្ឋសភា លោកស្រី ឃួន សុដារី បានជំរុញដល់ភាគីពាក់ព័ន្ធឲ្យយកចិត្តទុកដាក់អភិវឌ្ឍកំណើនសេដ្ឋកិច្ច លុបបំបាត់ភាពអត់ឃ្លាន កាត់បន្ថយភាពក្រក្រី និងលើកកម្ពស់ការវិនិយោគក្នុងស្រុក និងការវិនិយោគបរទេសជាដើម។ លោកស្រីបានលើកឡើងពីបញ្ហាប្រឈមមួយចំនួន ដែលត្រូវបន្តដោះស្រាយផងដែរ។ បញ្ហាទាំងនោះរួមមាន គម្លាតនៃការអភិវឌ្ឍរវាងប្រទេសទាំងបី ក្នុងវិស័យអប់រំ សុខាភិបាល ហេដ្ឋារចនាសម្ព័ន្ធសង្គម សេវាសាធារៈ ការជួញដូរគ្រឿងញៀន ការជួញដូរមនុស្ស បទល្មើសព្រៃឈើ និងបញ្ហាមួយចំនួនទៀត។ លោកស្រីក៏បានអះអាងដែរថា កង្វះអគ្គីសនីប្រើប្រាស់គ្រប់គ្រាន់នៅតែជាកង្វល់ខ្លាំងក្នុងខេត្តទាំងបួននៃប្រទេសកម្ពុជា។
ដោយឡែក លោក ង្វៀន គីមខ័រ ប្រធានគណៈកម្មាធិការសន្តិសុខ និងការពារប្រទេសនៃរដ្ឋសភាវៀតណាម បានលើកឡើងពីកិច្ចខិតខំប្រឹងប្រែងនៃប្រទេសជាសមាជិក ក្នុងការរួមចំណែកជម្រុញកំណើន ផលិតផលក្នុងស្រុកសរុប GDP ជាមធ្យម១០ភាគរយក្នុងមួយឆ្នាំ។ទោះបីជាយ៉ាងណាក៏ដោយ លោកបានសម្តែងនូវក្តីបារម្ភនានាជុំវិញបញ្ហារសើបមួយចំនួន ដែលលោកអះអាងថា បណ្តាលមកពីភាពទន់ខ្សោយនៃការយកចិត្តទុកដាក់ និងកង្វះប្រសិទ្ធភាព។ លោកបានសង្កត់ធ្ងន់ថា សណ្តាប់ធ្នាប់សង្គមនៅក្នុងតំបន់បានកំពុងប្រែប្រួយយ៉ាងខ្លាំង ដោយកើតមាននូវវិវាទដីធ្លីរបស់ប្រជាពលរដ្ឋ បទល្មើសរត់ពន្ធ ក្លែងបន្លំផ្នែកពាណិជ្ជកម្ម និងការរំលោភសន្ធិសញ្ញាស្តីពីលក្ខន្តិកៈអន្តោប្រវេសន៍ខុសច្បាប់ជាអាទិ៍។
សូមរំលឹកដែរថា តំបន់ត្រីកោណអភវឌ្ឍន៍ កម្ពុជា ឡាវ វៀតណាម ជាទីតាំងយុទ្ធសាស្ត្រដ៏សំខាន់សម្រាប់ប្រទេសទាំងបី ទាំងផ្នែកនយោបាយ សេដ្ឋកិច្ច សង្គមកិច្ច អេកូ-បរិស្ថាន និងការធានាសន្តិសុខនៃប្រទេសនីមួយ។ តំបន់ត្រីកោណអភិវឌ្ឍន៍នេះ ត្រូវបានបង្កើតឡើងរយៈពេល១៥ឆ្នាំមកហើយ។ នេះជាកិច្ចប្រជុំលើកទី១រវាងគណៈកម្មាធិការទទួលបន្ទុកកិច្ចការការពារជាតិនិងសន្តិសុខនៃតំបន់ត្រីកោណអភិវឌ្ឍន៍ដែលបើកធ្វើនៅទីក្រុងភ្នំពញដែលមានព្រតិភូមកពីបីប្រទេសចូលរួមគឺកម្ពុជា វៀតណាម និងឡាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ