ជនរងគ្រោះ២នាក់ដំបូងបានស្លាប់ដោយសារគ្រោះទឹកជំនន់ឆ្នាំ២០១៤នេះ
គិតត្រឹមរសៀលថ្ងៃសៅរ៍ទី២សីហានេះ យ៉ាងហោចណាស់មនុស្ស២នាក់ហើយ បានស្លាប់ បាត់បង់ជីវិត ដោយសារតែគ្រោះទឹកជំនន់។ ផលប៉ះពាល់បានកើតមានហើយដោយសារតែទឹកជំនន់ តែមិនទាន់មានការខូចខាតធ្ងន់ធ្ងរនៅឡើយទេ ខណៈដែលកំរិតកម្ពស់ទឹកនៅខេត្តស្ទឹងត្រែង បានកើនហួសពីកំរិតប្រកាសអាសន្ន។
ចុះផ្សាយនៅថ្ងៃ៖
ស្តាប់ - ០២:២១
ជនរងគ្រោះដែលស្លាប់ដោយទឹកជំនន់ដំបូងនៅឆ្នាំ២០១៤នេះ ម្នាក់គឺជាបុរសអាយុ៣៤ឆ្នាំរស់នៅក្នុងស្រុកព្រែកប្រសព្វ ខេត្តក្រចេះ និងម្នាក់ទៀតបុរសអាយុ៦៤ឆ្នាំ រស់នៅក្នុងស្រុកស្អាងខេត្តកណ្តាល។ នេះបើតាមការបញ្ជាក់អោយដឹងពីលោក ញឹម វណ្ណដា អនុប្រធានទី១អាជ្ញាធរជាតិគ្រប់គ្រងគ្រោះមហន្តរាយ។
លោក ញឹម វណ្ណដា ដែលកំពុងធ្វើដំណើរតាមរថយន្តឆ្ពោះទៅកាន់ខេត្តកំពង់ចាម ក្រចេះ និងខេត្តស្ទឹងត្រៀងដើម្បីពិនិត្យមើលពីស្ថានភាពទឹកជំនន់នៅថ្ងៃសៅរ៍នេះ បានអោយដឹងថា ផលប៉ះពាល់បានកើតមានហើយ ដូចជាលំនៅស្ថាននិងផលដំណាំរបស់ប្រជាពលរដ្ឋជាដើម ប៉ុន្តែវាមិនទាន់មានការខូចខាតធ្ងន់ធ្ងរនៅឡើយទេ ហើយអាជ្ញាធរកំពុងត្រៀមជំលៀសប្រជាពលរដ្ឋនៅតំបន់ដែលរងគ្រោះខ្លាំង។
គិតត្រឹមថ្ងៃទី២សីហានេះ ស្ថានភាពទឹកនៅតាមដងទន្លេមេគង្គលើ បានកើនឡើងខ្លាំងនៅក្នុងខេត្តចំនួន២ គឺខេត្តស្ទឹងត្រែង និងខេត្តក្រចេះ។ សំរាប់ខេត្តស្ទឹងត្រែង ទឹកបានហក់ឡើងដល់កំរិត១១ម៉ែត្រ លើសពីកំរិតប្រកាសអាសន្ន១០.៧។ រីឯនៅខេត្តក្រចេះ កម្ពស់ទឹកក៍បានហក់ឡើងដល់២១.៣៨ ខណៈកំរិតទឹកប្រកាសអាសន្ន២២ម៉ែត្រ។ ចំណែកឯនៅខេត្តកំពង់ចាមវិញ ទឹកអាចនឹងត្រូវប្រកាសអាសន្ននៅរយៈពេល២ថ្ងៃទៀត។
ក្រសួងធនធានទឹក និងឧត្តុនិយម កាលពីថ្ងៃទី១សីហា បានជូនដំណឹងស្តីពីស្ថានភាពអាកាសធាតុនៅកម្ពុជា ក្នុងនោះក្រសួងបានអោយដឹងថា ចាប់ពីថ្ងៃទី២សីហានេះតទៅ រហូតដល់ថ្ងៃទី៧សីហា ប្រទេសកម្ពុជានឹងរងសម្ពាធទាបមួយទៀតដែលបានកើតឡើងនៅលើប្រទេសឡាវ និងប្រទេសវៀតណាមភាគកណ្តាល ដែលមានឥទ្ធិពលលើតំបន់អាងទន្លេមេគង្គ និងកម្ពុជា។
បើតាមក្រសួងដដែល ការបន្តធ្លាក់ភ្លៀងនៅតាមបណ្តាខេត្តដូចនេះ គួបផ្សំជាមួយនឹងខ្យល់មូសុងនិរតីខ្លាំង នឹងអាចបង្កអោយមានទឹកជំនន់ទឹកភ្លៀងនៅតំបន់មួយចំនួន ពិសេសតំបន់ទំនាបនៅក្នុងខេត្តដែលនៅជាប់នឹងផ្លូវទឹក និងកំណាត់ផ្លូវជាតិលេខ៤ ដែលស្ថិតនៅក្នុងភូមិសាស្ត្រស្រុកកំពង់សិលា ខេត្តព្រះសីហនុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ