ប្រលងបាក់ឌុបឆ្នាំនេះតឹងតែង និងមានភាពមិនប្រក្រតីតិចតួច
ក្រសួងអប់រំថ្លែងឲ្យដឹងថា ការប្រលងសញ្ញាបត្របាក់ឌុបព្រឹកនេះ ប្រព្រឹត្តិដោយតឹងរ៉ឹងនិងដោយរលូន។ មានបាតុភាពតិចតួចណាស់ដែលបានកើតឡើង ក៏ប៉ុន្តែត្រូវដោះស្រាយភ្លាមៗ។ ជាមួយគ្នានេះ ក្រុមអ្នកសង្កេតការណ៍មកពីសង្គមស៊ីវិល ក៏មើលឃើញពីភាពប្រសើរឡើងក្នុងដំណើរការនៃការប្រលងដែរ ខុសពីឆ្នាំមុនៗ។
ចុះផ្សាយនៅថ្ងៃ៖
ស្តាប់ - ០២:៣៦
ការប្រលងសញ្ញាបត្រមធ្យមសិក្សាទុតិយភូមិ ឬប្រលងបាក់ឌុប ដែលមានរយៈពេលពីរថ្ងៃនោះ ចាប់ផ្តើមថ្ងៃទីមួយហើយ នៅថ្ងៃចន្ទទី០៤ខែសីហានេះ។ បេក្ខជនប្រុសស្រីមួយចំនួនក្នុងឯកសណ្ឋានអាវពណ៌ស បានក្រោកពីព្រលឹមម៉ោងមិនទាន់៦ផងនោះ ត្រៀមលក្ខណៈរៀងៗខ្លួនទាំងសម្ភារៈសិក្សាចាំបាច់ និងអាហារពេលព្រឹក។ ខ្លះទៀតទៅប្រមូលផ្តុំគ្នា និងដណ្តើមគ្នាទិញប៊្រុយយ៉ុង នៅឯផ្ទះថតចំលង ដែលមានទីតាំងមិនឆ្ងាយប៉ុន្មានពីមណ្ឌលប្រលង។
លោក សន ជ័យ មន្ត្រីសម្របសម្រួលបណ្តាញរួបរួម ដើម្បីគណនេយ្យភាពសង្គម ប្រចាំអាស៊ីបូព៌ានិងប៉ាស៊ីហ្វិក ដែលមានដាក់ភ្នាក់ងារសង្កេតការតាមមណ្ឌលប្រលងមួយចំនួនដែរនោះថ្លែងថា លោកមើលមិនឃើញថាមានភាពមិនប្រក្រតីអ្វីគួរកត់សម្គាល់ជាដុំកំភួននៅឡើយ។ លោកថា ការប្រលងមានការរឹតបណ្តឹង តែនៅតែមានករណីតិចតួចដូចជាការលួចយកទូរស័ព្ទស្មាតហ្វូនចូលក្នុងបន្ទប់ប្រលង មានការលួចមើលប៊្រុយយ៉ុងបន្តិចបន្តួច។
ជាមួយគ្នានេះ ក៏មានអនុរក្សមួយចំនួនពោលពាក្យសម្តីឌឺដងដាក់អ្នកសង្កេតការណ៍មកពីអង្គការមិនមែនរដ្ឋាភិបាល ទំនងជាពួកគេបានធ្វើជាឆ្អឹងទទឹងក ឬធ្វើឲ្យខូចប្រយោជន៍ដូចដែលក្រុមអនុរក្សមួយចំនួន ធ្លាប់ទទួលបានកន្លងមក។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ទទួលស្គាល់ថា ការប្រលងបាក់ឌុប ពេញមួយព្រឹកនេះមានលក្ខណៈល្អប្រសើរជាងឆ្នាំទៅ។
ជាមួយគ្នានេះ លោក រស់ សាលីន អ្នកនាំពាក្យក្រសួងអប់រំ បានថ្លែងដែរថា ការប្រលងពេញមួយព្រឹកថ្ងៃចន្ទនេះដែលមានវិញ្ញាសា ភូមិវិទ្យា ប្រវត្តិវិទ្យា គីមីវិទ្យា និងជីវវិទ្យានោះ មានភាពមិនប្រក្រតីតិចតួច។ លោកលើកឡើងថា អនុរក្សបានចាប់ភ្លាមៗនូវទូរស័ព្ទដៃស្មាតហ្វូនចំនួន៤គ្រឿង គឺ២គ្រឿងនៅមណ្ឌលប្រលងខេត្តកំពត និង២គ្រឿងទៀតនៅខេត្តបាត់ដំបង។ ករណីនេះត្រូវលោក រស់ សាលីន ពន្យល់ថា មិនមានទោសពៃរ៍អ្វីទេ ខណៈដែលការរឹបអូសទូរស័ព្ទដៃ ធ្វើឡើងមុនពេលការប្រលងប្រព្រឹត្តិទៅ។ ប្រធានមណ្ឌលក៏បានដកហូតទូរស័ព្ទដៃរបស់អនុរក្សម្នាក់ភ្លាមៗដែរនៅខេត្តកំពត។
ដោយឡែកបេក្ខជនពីររូបនៅខេត្តកណ្តាល និងស្វាយរៀងត្រូវបានដកហូតសិទ្ធិប្រលង ដោយសារបន្លំឲ្យបងប្អូនបង្កើតទៅប្រលងជំនួស។ រីឯអ្នកប្រលងជំនួសត្រូវសមត្ថកិច្ចឃាត់ខ្លួន។
ជាមួយគ្នានេះ ការបែកធ្លាយវិញ្ញាសាដែលគេនាំគ្នាបង្ហោះតាមហ្វេសប៊ុកនោះ ត្រូវបដិសេធដោយរដ្ឋមន្ត្រីក្រសួងអប់រំភ្លាមៗ ថាមិនត្រូវដូចវិញ្ញាសារបស់ក្រសួងឡើយ។
សូមបញ្ជាក់ថា បេក្ខជនដែលត្រូវប្រលងសញ្ញាបត្របាក់ឌុបនៅឆ្នាំនេះ មានចំនួនសរុបជាង ៩ ម៉ឺន ៣ពាន់នាក់ រួមមាន១៥១មណ្ឌលនិងចែកជាងបីពាន់បន្ទប់។ នៅព្រឹកនេះដែរ លោករដ្ឋមន្ត្រីក្រសួងអប់រំ ហង់ ជួន ណារ៉ុន បានចូលរួមបើកវិញ្ញាសាផ្ទាល់នៅវិទ្យាល័យព្រះស៊ីសុវត្ថិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ