សង្គមស៊ីវិលទាមទារឲ្យមានស្ត្រីក្នុងជួរថ្នាក់ដឹកនាំកំពូលនៃរដ្ឋសភា
គណៈកម្មាធិការលើកស្ទួយស្ត្រីក្នុងវិស័យនយោបាយ និងក្រុមអង្គការសង្គមស៊ីវិលនៅកម្ពុជា បានចេញសេចក្តីអំពាវនាវមួយនៅថ្ងៃចន្ទនេះ ដោយជំរុញឲ្យគណបក្សប្រជាជនកម្ពុជាយកចិត្តទុកដាក់ចំពោះបេក្ខភាពស្ត្រីក្នុងជួរក្បាលម៉ាស៊ីនដឹកនាំរដ្ឋសភា។ សេចក្តីអំពាវនាវនេះបានធ្វើឡើង បន្ទាប់ពីក្រុមសង្គមស៊ីវិលទាំងនោះមើលឃើញថា ក្បាលម៉ាស៊ីនដឹកនាំរដ្ឋសភាក្នុងអាណត្តិទី៥នេះ មានសមាសភាពសុទ្ធតែបុរស។
ចុះផ្សាយនៅថ្ងៃ៖ កែប្រែថ្ងៃទី៖
មួយថ្ងៃមុននឹងរដ្ឋសភាបើកកិច្ចប្រជុំដើម្បីបោះឆ្នោតជ្រើសរើសសមាសភាពក្បាលម៉ាស៊ីនដឹកនាំរបស់ខ្លួន គណៈកម្មាធិការលើកស្ទួយស្ត្រីក្នុងវិស័យនយោបាយនិងក្រុមអង្គការសង្គមស៊ីវិលនៅកម្ពុជាសរុបចំនួន១២អង្គភាពបានស្នើរដ្ឋសភា ជាពិសេសគណបក្សប្រជាជនកម្ពុជាឲ្យជ្រើសរើសបេក្ខភាពស្ត្រី ក្នុងជួរថ្នាក់ដឹកនាំសភា។ នៅក្នុងសេចក្តីថ្លែងការណ៍រួមគ្នាដែលចេញផ្សាយនៅថ្ងៃចន្ទទី ២៥ សីហានេះ អង្គការសង្គមស៊ីវិលទាំងនោះ ទាមទារឲ្យរដ្ឋសភាបោះឆ្នោតជ្រើសរើសបេក្ខភាពស្ត្រី ឬការរក្សាបេក្ខភាពលោកស្រី ឃួន សុដារី ជាអនុប្រធានទី២ នៃរដ្ឋសភាដដែល។
ផ្អែកលើលទ្ធផលនៃកិច្ចព្រមព្រៀងថ្ងៃទី២២ខែកក្កដា ឆ្នាំ២០១៤ រវាងថ្នាក់ដឹកនាំកំពូលនៃគណបក្សជាប់ឆ្នោតទាំងពីរ តំណែងដឹកនាំកំពូលដែលរួមមានប្រធាននិងអនុប្រធានទី២អាណត្តិទី៥នេះនឹងត្រូវគ្រប់គ្រងដោយគណបក្សប្រជាជនកម្ពុជា ចំណែកឯអនុប្រធានទី១រដ្ឋសភាគ្រប់គ្រងដោយគណបក្សសង្គ្រោះជាតិ។ តាមការគ្រោងទុក ប្រធានរដ្ឋសភានៅតែជាលោក ហេង សំរិន ដដែល ចំណែកឯអនុប្រធានទី១គឺលោក កឹម សុខា និងអនុប្រធានទី២គឺលោក ងួន ញ៉ិល ។
បើគ្មានអ្វីប្រែប្រួលទេ សមាសភាពក្បាលម៉ាស៊ីនដឹកនាំរដ្ឋសភា និងសមាសភាពដឹកនាំគណៈកម្មការសភាទាំង១០នឹងត្រូវរដ្ឋសភាបោះឆ្នោតអនុម័តនៅថ្ងៃអង្គារទី ២៦ សីហានេះ។ មិនត្រឹមតែគ្មានបេក្ខភាពស្ត្រីក្នុងជួរថ្នាក់ដឹកនាំកំពូលប៉ុណ្ណោះទេ សូម្បីតែសមាសភាពដឹកនាំគណៈកម្មការទាំង ១០ របស់រដ្ឋសភាក៏មានវត្តមានបុរសយ៉ាងលើសលប់ដែរ។
គួរបញ្ជាក់ថា ចំនួនស្ត្រីក្នុងរដ្ឋសភាបានកើនឡើងជាលំដាប់ចាប់តាំងពីឆ្នាំ ១៩៩៣ រហូតដល់ឆ្នាំ ២០០៨ ប៉ុន្តែ ការបោះឆ្នោតសភាចុងក្រោយកាលពីខែកក្កដាឆ្នាំ ២០១៣ ចំនួនស្ត្រីជាប់ឆ្នោតជាតំណាងរាស្ត្របានធ្លាក់ចុះវិញពោលគឺនៅលស់តែ២៥នាក់ឬស្មើ ២០ ភាគរយប៉ុណ្ណោះនៃចំនួនសមាជិកសភា ១២៣ នាក់។
សង្គមស៊ីវិលបានហៅការថយចុះចំនួនស្ត្រីក្នុងនយោបាយនេះថាជាបរាជ័យនៃគោលនយោបាយលើកស្ទួយស្ត្រីរបស់រដ្ឋាភិបាលក៏ដូចជារបស់គណបក្សនយោបាយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ