សំណូមពរ និងសំណួរ ៩១ ត្រូវបានលើកឡើងក្នុងកិច្ចពិគ្រោះយោបល់លើសេចក្តីព្រាងច្បាប់បោះឆ្នោត និងច្បាប់គជប
សិក្ខាសាលាពិគ្រោះយោបល់លើសេចក្តីព្រាងសេចក្តីស្នើច្បាប់បោះឆ្នោត និងច្បាប់គជប បានធ្វើ ឡើងប្រហែល ជា ៤ ម៉ោង ដោយចាប់ផ្តើម កាលពីម៉ោង ៨ និង ៣០ នាទី កាលពីព្រឹកថ្ងៃទី៩មីនា។ សិក្ខាសាលានៅរដ្ឋសភា ដែលមានអ្នកចូលរួម ៤៩៥ នាក់បានបើកឱកាសឲ្យអ្នកចូលរួមលើកសំណួរ និងសំណូមពរ សរុប ៩១ នាក់ ពាក់ព័ន្ធនឹងឯករាជ្យភាពរបស់គជប ការចុះឈ្មោះបោះឆ្នោត ការធ្វើបញ្ជីបោះឆ្នោតថ្មី ព្រមទាំងការរឹតបន្តឹងសិទ្ធិសេរីភាពរបស់អង្គការមិនមែនរដ្ឋាភិបាល ជាដើម។
ចុះផ្សាយនៅថ្ងៃ៖
ស្តាប់ - ០២:២១
សិក្ខាសាលាពិគ្រោះយោបល់លើច្បាប់គជប និងច្បាប់បោះឆ្នោត នៅព្រឹកថ្ងៃចន្ទនេះ គឺមិនមានវត្តមានរបស់តំណាងអង្គការសង្គមស៊ីវិលខាងការបោះឆ្នោត ដូចជា អង្គការខុមហ្វ្រែល នីកហ្វិក និងអង្គការតម្លាភាពកម្ពុជា ជាដើម។ ប៉ុន្តែគេឃើញមានអង្គការសង្គមស៊ីវិលជាច្រើនទៀត បានចូលរួម ដូចជា NDI IRI ឯកអគ្គរដ្ឋទូតសហភាពអឺរ៉ុប និងតំណាងស្ថានទូតបរទេសជាច្រើនផ្សេងទៀត។
បន្ទាប់ពីក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ លើកបង្ហាញពីសេចក្តីស្នើច្បាប់ គជប ដែលមាន ៧ ជំពូក និង ៦៦ មាត្រា ព្រមទាំងសេចក្តីស្នើច្បាប់ បោះឆ្នោត មាន ១២ ជំពូក និង ១៧១ មាត្រា រួចមក អង្គសិក្ខាសាលា បានបើកឱកាសឲ្យអ្នកចូលរួមសិក្ខាសាលា ដែលរួមមាន តំណាងរាស្ត្រ សមាជិកព្រឹទ្ធសភា សង្គមស៊ីវិល និងប្រជាពលរដ្ឋ ឡើងបញ្ចេញយោបល់ និងសួរសំណួរ។ សំណួរ និងសំណូមពរ សរុប ៩១ ត្រូវបានលើកឡើង។ អ្នកឡើងសួរ និងលើកសំណូមពរផ្ទាល់មាត់ ក្នុងសិក្ខាសាលា មាន ២១ នាក់។ ចំណែកអ្នកលើកឡើងជាលាយលក្ខណ៍អក្សរ មានចំនួន ៧០ នាក់។
សំណើរសំណួរ និងសំណូមពរទាំងនោះ ពាក់ព័ន្ធនឹងឯករាជ្យភាពរបស់គជប ការកំណត់សញ្ជាតិតែមួយសម្រាប់សមាជិកគជប ការធ្វើបញ្ជីឈ្មោះបោះឆ្នោតថ្មី ការចូលរួមរបស់មន្ត្រីរាជការ កងកម្លាំងប្រដាប់អាវុធ មន្ត្រីតុលាការក្នុងការគាំទ្រគណបក្សនយោបាយ ប្រព័ន្ធផ្សព្វផ្សាយ រួមទាំងការរឹតបន្តឹងសិទ្ធិសេរីភាព និងការកំណត់ដាក់ទោសលើអង្គការមិនមែនរដ្ឋាភិបាល ជាដើម។
តំណាងក្រុមការងារគណបក្សទាំងពីរ បានផ្តល់ចម្លើយជាចង្កោម ឆ្លើយជារួមលើសំណួរទាំងនោះ។ គណបក្សទាំងពីរ ក៏បានការពារ ហើយអះអាងថា ច្បាប់គជប និងច្បាប់បោះឆ្នោតថ្មីនេះ ល្អប្រសើរជាងច្បាប់ចាស់។ ក្នុងនោះ ច្បាប់ថ្មី ក៏បានកំណត់ឲ្យគជប ជាស្ថាប័នឯករាជ្យ ដែលពុំធ្លាប់មានពីមុន។
លោក ប៊ិន ឈិន ប្រធានក្រុមការងារគណបក្សប្រជាជនកម្ពុជា និងជាអ្នកដឹកនាំអង្គសិក្ខាសាលា អះអាងថា រាល់សំណើរ និងសំណូមពរ ដែលអ្នកចូលរួមសិក្ខាសាលា បានលើកឡើង ក្រុមការងារនៃគណបក្សប្រជាជនកម្ពុជា និងគណបក្សសង្គ្រោះជាតិ នឹងយកទៅពិចារណាថែមទៀត ដើម្បីធានាឲ្យសេចក្តីព្រាងច្បាប់ទាំងពីរ មានលក្ខណៈកាន់តែល្អ។
ចំណែកលោក អេង ឆៃអ៊ាង តំណាងក្រុមការងារមកពីគណបក្សសង្គ្រោះជាតិ លើកឡើងថា សិក្ខាសាលារយៈពេល ១ ព្រឹកនេះ គឺសមរម្យហើយ។ លោកអេងឆៃអ៊ាង ក៏បានប្រកាសក្នុងសិក្ខាសាលាថា ទុកឲ្យថ្នាក់ដឹកនាំ ជាអ្នកសំរេច ថាតើគណបក្សទាំងពីរ នឹងត្រូវរៀបចំសិក្ខាសាលាពិគ្រោះយោបល់លើសេចក្តីព្រាងសេចក្តីស្នើច្បាប់ទាំងពីរនេះ នៅលើកក្រោយទៀត ឬទេ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ