ក្រសួងយុត្តិធម៌សម្រេចបញ្ឈប់ការស្នើលើកលែងទោសដល់ទណ្ឌិតក្នុងបទល្មើសប្លន់និងគ្រឿងញៀន
នៅទីបំផុតទៅ ក្រសួងយុត្តិធម៌និងភាគីពាក់ព័ន្ធ បានសម្រេចបញ្ឈប់ការស្នើសុំលើកលែងទោសដល់ទណ្ឌិតដែលប្រព្រឹត្តបទល្មើសក្នុងអំពើប្លន់ និងជួញគ្រឿងញៀនហើយ។ នេះគឺជាសេចក្តីសម្រេចចិត្តមួយ ដើម្បីឆ្លើយតបទៅនឹងការកក្រើកឡើងវិញ នៃអំពើប្លន់ប្រដាប់អាវុធនាពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០១:៥១
នេះគឺជាសេចក្តីសម្រេចចិត្តរបស់ក្រសួងយុត្តិធម៌ និងភាគីពាក់ព័ន្ធ បន្ទាប់ពីបានបើកកិច្ចប្រជុំនៅថ្ងៃពុធទី៦មករា ឆ្នាំ២០១៦នេះ ដើម្បីពិនិត្យទៅលើការពង្រឹងគោលការណ៍នៃការបន្ធូបន្ថយ និងលើកលែងទោសទៅដល់ទណ្ឌិត ដែលបានធ្វើឡើងនៅឯក្រសួងយុត្តិធម៌ ដោយមានការចូលរួមពី លោក អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌ផង។
វិធានការនេះ គឺជាការឆ្លើយតបទៅនឹងការកក្រើកឡើងវិញ នៃអំពើប្លន់ប្រដាប់អាវុធ ដែលបានកើតឡើងនៅទូទាំងប្រទេសកម្ពុជាក្នុងរយៈពេលថ្មីៗនេះ។ អំពើប្លន់ប្រដាប់អាវុធ ដែលប្រមុខរដ្ឋាភិបាលកម្ពុជាលោក ហ៊ុន សែន បានស្តីបន្ទោសទៅដល់ទណ្ឌិតដែលទើបនឹងទទួលបានការលើកលែងទោស តាមរយៈសំណើរសុំបន្ធូបន្ថយ ឬលើកលែងទោស ដែលធ្វើឡើងដោយមិនបានពិចារណាឲ្យបានម៉ត់ចត់ជាមុន ពិសេសទៅលើទណ្ឌិតដែលប្រព្រឹត្តិបទល្មើសឧក្រឹដ្ឋធំៗ។ ការបន្ធូបន្ថយ ឬលើកលែងទោសដល់ទណ្ឌិតកម្ពុជា តែងតែធ្វើឡើងរយៈពេល៣ដងក្នុងមួយឆ្នាំជាទៀងទាត់ គឺក្នុងពិធីបុណ្យចូលឆ្នាំខ្មែរ ពិធីបុណ្យមាឃបូជា និងព្រះរាជពិធីបុណ្យអ៊ុំទូកជាដើម។
លោក ជិន ម៉ាលីន អ្នកនំាពាក្យក្រសួងយុត្តិធម៌ បានថ្លែងនៅក្នុងសន្និសីទសារព័តមានក្រោយបិទបញ្ចប់កិច្ចប្រជុំ ជាមួយតំណាងមន្រ្តីពន្ធនាគារ ព្រះរាជអាជ្ញា និងអភិបាលខេត្តទូទំាង ប្រទេសនេះថា ក្រសួងនឹងមិនធ្វើការលើកលែងទោសចំពោះទណ្ឌិតណា ដែលប្រព្រឹត្តិបទល្មើស ក្នុងបទឧក្រិដ្ឋធំៗ និងបទល្មើសមិនរាងចាល ដូចជា អំពើប្លន់ ឬឧក្រិដ្ឋកម្មគ្រឿងញៀនធំៗនោះទេ។
ក្រៅពីនេះ ដើម្បីដោះស្រាយរាល់បញ្ហាដែលបានកើតឡើង ក្រសួងក៏ត្រូវពង្រឹងយន្តការចុះធ្វើអធិការកិច្ចពន្ធនាគារជាប្រចំា ហើយព្រះរាជអាជ្ញារាជធានី-ខេត្ត ក៏មានភារកិច្ចសំខាន់ ក្នុងការពិនិត្យពន្ធនាគារដើម្បីរកចំណុចខ្វះខាតទំាងនោះផង។
បើតាម លោក បេទា ឡេង ប្រធាននាយកដ្ឋានប្រតិបត្តិនៃអគ្គនាយកដ្ឋានពន្ធនាគារក្រសួងមហាផ្ទៃបានឲ្យដឹងថា បច្ចុប្បន្ននៅទូទាំងប្រទេសកម្ពុជា មានទណ្ឌិតប្រមាណជា ១៧ម៉ឺននាក់ (១៧៨,៩៦នាក់) ក្នុងនោះមានស្រីចំនួន១៤៦,២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ