យុវជន ម្នាក់ត្រូវបានចាប់ខ្លួនពីបទគំរាមសម្លាប់លោកហ៊ុន សែន តាមFacebook
យុវជនម្នាក់ត្រូវបានចាប់ខ្លួន និងបញ្ជូនទៅកាន់តុលាការក្រុងភ្នំពេញ នៅព្រឹកថ្ងៃទី៨ មករានេះ បន្ទាប់ពីបានបទគំរាមសម្លាប់លោកនាយករដ្ឋមន្រ្តី ហ៊ុន សែន តាមបណ្តាញសង្គម Facebook។ យុវជនមកពីខេត្តកំពង់ធំរូបនេះ កំពុងស្ថិតនៅក្រោមការសាកសួររបស់ព្រះរាជាអាជ្ញាធរ តុលាការក្រុងភ្នំពេញនៅឡើយ។
ចុះផ្សាយនៅថ្ងៃ៖
ស្តាប់ - ០១:១៥
យុវជនឈ្មោះ ម៉ាន់ សំអ៊ាន់ អាយុ២៨ឆ្នាំ ដែលប្រើគណនេយ្យហ្វេសបុកឈ្មោះ Som Orn Koko ត្រូវបានកងកម្លាំងស្នងការដ្ឋាននគរបាលខេត្តកំពង់ធំ ចាប់ខ្លួនកាលពីថ្ងៃទី៦មករា ឆ្នាំ២០១៦ និងបានបញ្ជូនខ្លួនមកកាន់តុលាការក្រុងភ្នំពេញនៅថ្ងៃទី៨មករានេះ ដើម្បីចោទសួរ ក្រោយពីរូបគេបានសរសេរសារគំរាមសម្លាប់ លោកនាយករដ្ឋមន្រ្តី ហ៊ុន សែន តាមបណ្តាញសង្គមហ្វេសបុក។
លោក សៀង សុខ ព្រះរាជអាជ្ញារងតុលាការក្រុងភ្នំពេញ បានថ្លែងប្រាប់វិទ្យុបារាំងអន្តរជាតិ RFI នៅរសៀលថ្ងៃទី៨មករានេះថា យុវជនរូបនេះ កំពុងស្ថិតនៅក្រោមការសាកសួររបស់លោកនៅឯតុលាការក្រុងភ្នំពេញ មិនទាន់ចប់នៅឡើយទេ។ ការសាកសួរបានធ្វើឡើងនៅប្រមាណជាម៉ោង១១និង៣០នាទីព្រឹក ហើយនិងបន្តនៅម៉ោង២រសៀលនេះទៀត។
គួរជំរាបជូនថា យុវជន ម៉ាន់ សំអ៊ាន់ អាយុ២៨ឆ្នាំ មានស្រុកកំណើតនៅភូមិម្នាវ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ត្រូវបានស្នងការដ្ឋាននគរបាលខេត្តកំពង់ធំចាប់ខ្លួន ក្រោយពីរូបគេបានសរសេរសារនៅលើបណ្តាញសង្គមហ្វេសបុក ដែលមានខ្លឹមសារគំរាមសម្លាប់លោកនាយករដ្ឋមន្រ្តី ហ៊ុន សែន និងបានរិះគន់ទៅលើអត្ថន័យនៃថ្ងៃ៧មករា ដែលគណបក្សប្រជាជនកម្ពុជាបានប្រារព្ធធ្វើឡើងកាលពីថ្ងៃទី៧មករាម្សិលមិញនេះ។ បើតាម គណនេយ្យហ្វេសបុក Som Orn Koko ដែលនៅដំណើរការនៅឡើយនេះ បានបង្ហាញរូបភាពជាច្រើនរបស់យុវជនរូបនេះជាមួយនឹងក្រុមគ្រួសារមុនពេលការចាប់ខ្លួនរបស់សមត្ថកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ