អូស្ត្រាលីអរគុណកម្ពុជាដែលលើកលែងទោសឲ្យផលិតករភាពយន្ត James Ricketson
រដ្ឋមន្ដ្រីការបរទេសអូស្ត្រាលី លោកស្រី Marise Payne បានថ្លែងអំណរគុណចំពោះរដ្ឋាភិបាលកម្ពុជា ដែលបានលើកលែងទោសនិងសម្រេចដោះលែងពលរដ្ឋរបស់ខ្លួន គឺផលិតករភាពយន្ត James Ricketson ឲ្យមានសេរីភាពឡើងវិញ។ នេះបើតាមសេចក្ដីថ្លែងការណ៍ចេញផ្សាយនៅថ្ងៃសៅរ៍ ទី២២កញ្ញានេះ។ លោក James Ricketson ត្រូវបានសាលាដំបូងរាជធានីភ្នំពេញសម្រេចផ្ដន្ទាទោសឲ្យជាប់ពន្ធនាគារ៦ឆ្នាំ ពីបទចារកម្ម បន្ទាប់ពីលោកបានបង្ហោះដ្រូនថតសកម្មភាពឃោសនាបោះឆ្នោតឃុំសង្កាត់របស់អតីតគណបក្សសង្គ្រោះជាតិ។
ចុះផ្សាយនៅថ្ងៃ៖
ស្តាប់ - ០២:០៦
«ខ្ញុំសូមស្វាគមន៍ និងអរគុណចំពោះរដ្ឋាភិបាលកម្ពុជា ក៏ដូចជាសមភាគីរបស់ខ្ញុំ គឺលោករដ្ឋមន្ដ្រី ប្រាក់ សុខុន ដែលបានសម្រេចជាវិជ្ជមានចំពោះសំណើសុំលើកលែងទោសដល់លោក James Ricketson»។ នេះគឺ ជាការលើកឡើងរបស់លោកស្រី Marise Payne រដ្ឋមន្ដ្រីការបរទេសអូស្ត្រាលី នៅក្នុងសេចក្ដីថ្លែងការណ៍ ចេញផ្សាយនៅថ្ងៃសៅរ៍ ទី២២កញ្ញា។ នៅក្នុងសេចក្ដីថ្លែងការណ៍ដដែល លោកស្រីរដ្ឋមន្ដ្រីបន្តថា ការសម្រេចនេះ បានបិទបញ្ចប់នូវពេលវេលាដ៏សែនឈឺចាប់សម្រាប់លោក Ricketson និងគ្រួសាររបស់គាត់។
លោក James Ricketson វ័យ ៦៩ឆ្នាំ ជាផលិតករភាពយន្តជនជាតិអូស្ត្រាលី ត្រូវបានផ្ដន្ទាទោសឲ្យជាប់ពន្ធនាគាររយៈពេល៦ឆ្នាំ ពីបទចារកម្ម ក្រោយពីលោកបង្ហោះដ្រូនថតរូបភាពនិងវីដេអូសកម្មភាពឃោសនាបោះឆ្នោតឃុំសង្កាត់របស់អតីតគណបក្សសង្គ្រោះជាតិ កាលពីខែមិថុនា ឆ្នាំ២០១៧។ នៅថ្ងៃសុក្រ ទី២១ កញ្ញា ឆ្នាំ២០១៨ លោកត្រូវបានលើកលែងទោស និងត្រូវសម្រេចដោះលែងឲ្យមានសេរីភាពឡើងវិញ តាមព្រះរាជក្រឹត្យលើកលែងទោសពីសំណាក់លោក សាយ ឈុំ ប្រមុខរដ្ឋស្ដីទី និងដីកាបង្គាប់ឲ្យដោះលែងរបស់តុលាការ។
ក្រៅពីរដ្ឋមន្ដ្រីការបរទេសអូស្ត្រាលី ការដោះលែងលោក James Ricketson ឲ្យមានសេរីភាពឡើងវិញ ក៏ទទួលបានការស្វាគមន៍ពីក្រុមគ្រួសាររបស់លោកផងដែរ។ កូនប្រុសរបស់លោក James Ricketson ថ្លែងថា ការដោះលែងឪពុករបស់លោក គឺជាកាយវិការប្រកបដោយព្រហ្មវិហារធម៌ ហើយវាបានបិទបញ្ចប់នូវសុបិនដ៏អាក្រក់សម្រាប់គ្រួសាររបស់លោក។
លោក គង់ សំអុន មេធាវីការពារក្ដីឲ្យលោក James Ricketson បានថ្លែងប្រាប់សារព័ត៌មានថា កូនក្ដីរបស់លោកនឹងវិលត្រឡប់ទៅកាន់ប្រទេសអូស្ត្រាលី ដែនដីកំណើតរបស់ខ្លួនវិញក្នុងពេលដ៏ឆាប់ខាងមុខនេះ។ ប៉ុន្តែបច្ចុប្បន្ន ផលិតករភាពយន្តសញ្ជាតិអូស្ត្រាលីរូបនេះ កំពុងស្នាក់នៅផ្ទះកូនប្រុសរបស់ខ្លួនក្នុងទីក្រុងភ្នំពេញ ក្រោយពីត្រូវបានដោះលែងពីពន្ធនាគារ កាលពីល្ងាចថ្ងៃសុក្រ ទី២១កញ្ញា។ នេះបើតាមការឲ្យដឹងពីមេធាវី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ