ខេត្តចំនួន៥ រងផលប៉ះពាល់ដោយសារជំនន់ទឹកភ្លៀង តែមិនទាន់ធ្ងន់ធ្ងរនៅឡើយ
តំបន់មួយចំនួននៃខេត្តចំនួន៥ គឺខេត្តព្រះសីហនុ ខេត្តកំពង់ស្ពឺ ខេត្តកំពត ខេត្តកោះកុង និងខេត្តបាត់ដំបង ត្រូវបានគម្រាមកំហែងដោយជំនន់ទឹកភ្លៀង។ ផលប៉ះពាល់ដោយសារជំនន់ទឹកភ្លៀងនេះ បានកើតឡើងបន្ទាប់ពីបណ្តាខេត្តទាំងនោះ ទទួលរងនូវការធ្លាក់ភ្លៀងជាប់ៗគ្នា ដោយកំរិតមធ្យម ទៅកំរិតខ្ពស់ រយៈពេលមួយសប្តាហ៍ចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:៣៥
ខេត្តដែលរងនូវការលិចលង់ខ្លាំងជាងគេមកទល់ពេលនេះ គឺខេត្តកោះកុង។ ស្រុកចំនួន៤ នៃខេត្តជាប់មាត់សមុទ្រមួយនេះ រួមមាន ស្រុកថ្មបាំង ស្រុកកោះកុង ស្រុកស្រែអំបិល និងស្រុកមណ្ឌលសីមា ត្រូវជំនន់ទឹកភ្លៀងជន់លិច ខ្លាំងអស់រយៈពេលជាង៣ថ្ងៃមកហើយ។ ប្រជាពលរដ្ឋាជាង៣០០គ្រួសារ នៅក្នុងស្រុកទាំងនេះ ត្រូវបានជន្លៀស ទៅកាន់ទីទួលសុវត្ថិភាព។ នេះបើតាមលោក កែវ វី នាយកខុទ្ទកាល័យ និងជាអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
នៅឯខេត្តព្រះសីហនុវិញ ក្រសួងធនធានទឹកបានប្រកាសនៅព្រឹកថ្ងៃពុធនេះថា ស្ថានភាពទឹកជំនន់ហូរកាត់ផ្លូវជាតិលេខ៤ ត្រង់ចំណុចស្ពានសំរោង ស្រុកកំពង់សីលា ខេត្តព្រះសីហនុ បានបន្តកើនឡើងដល់កំពស់ ៧,១០ម៉ែត្រ និងហូរកាត់លើកំណាត់ផ្លូវជាតិលេខ៤ ប្រវែង១គីឡូម៉ែត្រ ដោយទឹកមានកម្ពស់លើផ្លូវជាតិពី ១,៥០ម៉ែត្រ ទៅ១,៦០ម៉ែត្រ។ ចរាចរណ៍ពីភ្នំពេញទៅខេត្តព្រះសីហនុ នៅតែត្រូវបានកាត់ផ្តាច់នៅឡើយ ដោយទឹកជំនន់។
ដោយឡែកនៅខេត្តកំពតវិញ ដោយសារការបើកទឹកបង្ហៀរចោលពីទំនប់វារីអគ្គិសនីកំចាយ ពេលនេះ បណ្តាលឲ្យមានការជន់លិចផងដែរ មួយផ្នែកនៃក្រុងកំពត និងនៅឃុំចំនួនពីរ នៃស្រុកទឹកឈូរ។ ក៏ប៉ុន្តែស្ថានភាពលិចលង់ មិនមានសភាពធ្ងន់ធ្ងរនោះទេ ដោយនៅព្រឹកនេះទឹកស្រកចុះបន្តិច នៅតាមដងព្រែកកំពត។
ជាមួយគ្នានេះ ជំនន់ទឹកភ្លៀងក៏បង្កឲ្យប៉ះពាល់ដល់ខេត្តបាត់ដំបងផងដែរ បើទោះណាជាក្រុងបាត់ដំបងត្រូវបានបញ្ចៀសការលិចលង់ ដោយជំនាញបច្ចេកទេសរបស់ក្រសួងធនធានទឹកក៏ដោយ។ ឃុំចំនួនបី របស់ស្រុកឯកភ្នំ រងផលប៉ះពាល់ជាពិសេសដល់ស្រូវកំពុងចេញផ្កា ដំណាំបន្លែ រួមទាំងវាលស្រែជាង១ពាន់ហិចតា កំពុងគ្របដណ្តប់ដោយទឹក។
ដូចគ្នាដែរ នៅខេត្តកំពង់ស្ពឺ នៅមិនទាន់មានផលប៉ះពាល់ខ្លាំងនៅឡើយ ខណៈខេត្តមួយនេះ មានទំនប់ និងទ្វារទឹកជាច្រើន ដើម្បីដោះស្រាយបញ្ហាទឹក ហើយពេលនេះទើបតែបើកទ្វារទឹកចំនួន២ប៉ុណ្ណោះ។
ទោះយ៉ាងណា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បញ្ជាក់ថា មកទល់ពេលនេះ នៅមិនទាន់មានរបាយការណ៍រួមជាក់លាក់នៅឡើយ ស្តីពីទំហំនៃការខូចខាត ដែលបណ្តាលមកពីជំនន់ទឹកភ្លៀង។
សូមបញ្ជាក់ថា ភ្លៀងដែលបានធ្លាក់ពីតិចទៅច្រើន រយៈពេលជាច្រើនថ្ងៃកន្លងទៅនេះ នៅមិនទាន់ដាច់នៅឡើយទេ។ ដំណាលគ្នានេះ ព្យុះទី៩ឈ្មោះសុនទីញ បានបង្ហាញខ្លួននៅភាគខាងកើតនៃកោះហៃណាំ ហើយព្យុះនេះនឹងមានឥទ្ធិពលមកលើប្រទេសកម្ពុជា ចាប់ពីថ្ងៃទី១៩ដល់ថ្ងៃទី២១ខែកក្កដា នឹងនាំមកនូវទឹកភ្លៀងធ្លាក់រាយប៉ាយនៅទូទាំងប្រទេសផងដែរ។ នេះបើតាមក្រសួងធនធានទឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ