ប្រជាពលរដ្ឋជិត៥ម៉ឺន នាក់ ចូលរួមដង្ហែរូបសំណាកលោកបណ្ឌិតកែម ឡី ទៅស្រុកកំណើត
ដូចការគ្រោងទុក រូបសំណាកលោកបណ្ឌិត កែម ឡី ត្រូវបានដង្ហែទៅដល់ស្រុកកំណើតរបស់លោក នៅក្នុងខេត្តតាកែវ នៅវេលាម៉ោងប្រមាណជា ២ និង ៣០ នាទី រសៀល ដោយមានការចូលរួមពីប្រជាពលរដ្ឋប្រមាណជិត ៥ ម៉ឺន នាក់។ បើតាមគណៈកម្មាការរៀបចំបុណ្យសព លោក បណ្ឌិត កែម ឡី ចំនួនអ្នកចូលរួមដង្ហែរូបសំណាក់លោក នៅថ្ងៃនេះ តិចជាងថ្ងៃដង្ហែសព ប៉ុន្តែជាចំនួនដែលលើសពីការរំពឹងទុក។
ចុះផ្សាយនៅថ្ងៃ៖ កែប្រែថ្ងៃទី៖
ក្បួនដង្ហែរូបសំណាក លោកបណ្ឌិត កែម ឡី បានចាកចេញពីវត្តចាស់ ខណ្ឌជ្រោយចង្វារ រាជធានីភ្នំពេញ តាំងពីវេលាម៉ោង ៧ ព្រឹក ថ្ងៃទី ១៦ ខែតុលា នេះដោយមានវត្តមាន ក្រុមគ្រួសារ ព្រះសង្ឃ សង្គមស៊ីវិល និង ប្រជាពលរដ្ឋជាច្រើននាក់ចូលរួម។ រូបសំណាក់របស់អ្នកស្រាវជ្រាវការអភិវឌ្ឍន៍សង្គម រូបនេះ ត្រូវបានហែរឆ្លងកាត់វិថីសំខាន់ៗ ដោយមាន ប្រជា ពលរដ្ឋ មួយចំនួន ឈរអមសងខាងផ្លូវ ដោយទឹកមុខ ស្រគត់ស្រគំ និង អាឡោះអាល័យចំពោះរូបលោក។
បន្ទាប់មក ក្បួនដង្ហែ បានប្រមូលផ្តុំ ជួបជុំប្រជាពលរដ្ឋ នៅរង្វង់មូលចោមចៅ រួចបន្តដំណើរឆ្ពោះទៅខេត្តតាកែវ ដែលជាស្រុកកំណើតរបស់លោក បណ្ឌិតកែមឡី។
មិនខុសគ្នាទៅនឹងការដង្ហែសព លោកបណ្ឌិត កែម ឡី កាលពីថ្ងៃខែ កក្កដា កន្លងទៅនេះ ក៏មានផងដែរ ប្រជាពលរដ្ឋមួយចំនួន បានចំណាយថវិការផ្ទាល់ខ្លួន ដើម្បីចែកទឹក និង អាហារដល់អ្នកចូលរួមនៅក្នុងក្បួនដង្ហែនេះដោយឥតគិតថ្លៃផងដែរ។
លោក សៅ កុសល អ្នកនាំពាក្យគណៈកម្មាការរៀបចំបុណ្យសព លោកបណ្ឌិត កែម ឡី បានប្រាប់ឲ្យវិទ្យុបារាំង ដឹងថា ការដង្ហែរូបសំណាក នៅព្រឹកថ្ងៃទី ១៦ ខែ តុលា នេះមានភាពរលូន ដោយមិនមានបញ្ហាណាមួយកើតឡើងនោះទេ បើទោះបីជាមានការកកស្ទះចរាចរណ៍បន្តិចបន្តួចក៏ដោយ។ ក្រៅពីការចូលរួមរបស់ប្រជាពលរដ្ឋ អាជ្ញាធរមានសមត្ថកិច្ច ជាពិសេសនគរបាលចរាចរណ៍ ត្រូវបានដាក់ពង្រាយនៅតាមផ្លូវ តាំងពីវត្តចាស់ទៅដល់រង្វង់មូលចោមចៅ ដើម្បីជួយសម្រួលចរាចរណ៍។
បើទោះបីជាចំនួនអ្នកចូលរួមដង្ហែរូបសំណាក លោក បណ្ឌិត កែម ឡី នៅព្រឹកថ្ងៃអាទិត្យនេះ មានចំនួនតិចជាងពេលហែរសព លោក យ៉ាងណាក៏ដោយ ប៉ុន្តែ គណៈកម្មាការរៀបចំបុណ្យសពលោក បណ្ឌិត កែម ឡី បញ្ជាក់ថា ជាចំនួនលើសពីការរំពឹងទុករបស់ខ្លួន។
លោក បញ្ជាក់ថា អ្នកចូលរួមដង្ហែនៅថ្ងៃនេះ មានចំនួនជិត ៥ ម៉ឺន នាក់ ដោយនេះ មិនរាប់បញ្ចូលចំនួនប្រជាពលរដ្ឋ ដែលឈរអមសងខាងផ្លូវ ពីរាជធានីភ្នំពេញ ឆ្ពោះទៅលំនៅដ្ឋានរបស់ លោក កែម ឡី ក្នុងខេត្តតាកែវផង។
សូមបញ្ជាក់ថា រូបសំណាកលោក បណ្ឌិត កែម ឡី មានកម្ពស់ជាង ១.៧ ម៉ែត្រ ត្រូវបានគណៈកម្មាការរៀបចំបុណ្យសពលោកបណ្ឌិត កែម ឡី យកទៅតម្កល់នៅស្រុកកំណើតរបស់ លោក នៅក្នុងខេត្តតាកែវ ដែលកាលដើមឡើយ គណៈកម្មាការបុណ្យសព គ្រោងដាក់តាំងរូបសំណាក់នេះ នៅទីលានប្រជាធិបតេយ្យ ប៉ុន្តែសំណើរនេះ មិនត្រូវបាន សាលារាជធានីភ្នំពេញ អនុញ្ញាតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ