ទណ្ឌិត៦៨០នាក់ ត្រូវបានលើកលែងទោស និងបន្ធូបន្ថយទោស ក្នុងពិធីបុណ្យអុំទូក
ព្រះមហាក្សត្រនេះព្រះរាជាណាចក្រកម្ពុជា បានសម្រេចឡាយព្រះហស្តលេខាលើកលែងទោស និងបន្ធូបន្ថយទោសទណ្ឌិតចំនួន៦៨០ ក្នុងព្រះរាជពិធីបុណ្យអុំទូកនៅឆ្នាំ២០១៥នេះ។ ទណ្ឌិតទាំងអស់ត្រូវបានដោះលែងរួចហើយកាលពីថ្ងៃចន្ទ ទី២៣ ខែវិច្ឆកានេះ។ យ៉ាងណាក៏ដោយ ក្នុងចំណោមទណ្ឌិតដែលត្រូវបានលើកលែង និងបន្ធូបន្ថយទោសទាំងអស់មិនមានសកម្មជនគណបក្សសង្គ្រោះជាតិនោះទេ។
ចុះផ្សាយនៅថ្ងៃ៖
ស្តាប់ - ០១:៥៣
ទណ្ឌិតចំនួន៦៨០មកពីទូទាំងប្រទេស ត្រូវបានព្រះមហាក្សត្រលើកលែង និងបន្ធូបន្ថយក្នុងពីធីបុណ្យអុំទូក បណ្តែតប្រទីប និងសំពះព្រះខែក្នុងឆ្នាំ២០១៥នេះ។ ទណ្ឌិត១០២រូប ត្រូវបានលើកលែងទោស បន្ទាប់ពីបានអនុវត្តទោសចំនួន២ភាគ៣ ដោយឡែកទណ្ឌិតចំនួន៥៧៨នាក់ ត្រូវបានបន្ធូបន្ថយបន្ទាប់ពីបានអនុវត្តទោស១ភាគ៣ និងការអនុវត្តបានត្រឹមត្រូវក្នុងពន្ធនាគារ។
លោកជិន ម៉ាលីន អ្នកនាំពាក្យក្រសួងយុត្តិធម៌ បានឱ្យដឹងថា ទណ្ឌិត១០២រូប ត្រូវបានដោះលែងកាលពីថ្ងៃចន្ទ ទី២៣ វិច្ឆិកាដើមសប្តាហ៍នេះ បន្ទាប់ពីព្រះរាជក្រិត្យត្រូវបានឡាយព្រះហស្តលេខា ដោយព្រះមហាក្សត្រកាលពីថ្ងៃសុក្រទី២០ វិច្ឆិកា សប្តាហ៍មុន។ លោក អំ សំអាត ប្រធានផ្នែកស៊ើបអង្កេតរបស់អង្គកាលីកាដូ បានលើកឡើងថា ការលើកលែងទោសនិងបន្ធូបន្ថយទោសឱ្យទណ្ឌិតម្តងៗ តែងតែមានការលេចលឺព័ត៌មានពីភាពអយុត្តិធម៌។ ជាភាពអយុត្តិធ៌ម ព្រោះថាទណ្ឌិតដែលមានប្រាក់កាសអាចជាអាថិភាពច្រើនជាងទណ្ឌិតដែលក្រីក្របើទោះបីជាមានការខិតខំកែប្រែខ្លួនក្នុងពន្ធនាគារយ៉ាងណាក៏ដោយ។
អ្នកនាំពាក្យក្រសួងយុត្តិធម៌លោក ជិន ម៉ាលីន បានអះអាងថា ការសម្រេចលើកលែងទោសឬ បន្ធូបន្ថយទោសដល់ទណ្ឌិត គឺធ្វើឡើងដោយយុត្តិធម៌ព្រោះ ទណ្ឌិតទាំងអស់ត្រូវឆ្លងកាត់ការវាយតម្លៃពីថ្នាក់ក្រោមជាតិ រហូតដល់ថ្នាក់ក្រសួងយុត្តិធម៌ដែលមានរដ្ឋមន្ត្រីជាប្រធានគណៈកម្មការ។ ក្នុងឱកាសបុណ្យអុំទូកនេះ ទណ្ឌិតដែលត្រូវបានស្នើសុំលើកលែងទោស និងបន្ធូបន្ថយទោសមានប្រមាណជាង៧០០នាក់ ប៉ុន្តែក្រសួងសម្រេចយកតែ៦៨០នាក់នោះទេ។ នេះបើតាមលោកជិន ម៉ាលីនដដែល។
គួររំលឹកថា ទណ្ឌិតក្នុងប្រទេសកម្ពុជាត្រូវបានលើកលែងទោស និងបន្ធូបន្ថយទោសរយៈពេលបីដងក្នុងមួយឆ្នាំ គឺក្នុងពិធីបុណ្យចូលឆ្នាំខ្មែរ ពិធីបុណ្យមាឃបូជា និងព្រះរាជពិធីបុណ្យអុំទូក។ បើទោះបីជា សង្គមស៊ីវិលដែលធ្វើការលើពន្ធនាគារ និងក្រសួងយុត្តិធម៌មានមតិផ្ទុយគ្នាយ៉ាងណាក៏ដោយ ក៏សង្គមស៊ីវិល បានស្នើឱ្យក្រសួងយុត្តិធម៌ត្រូវធានាឱ្យបាននូវការលើកលែងទោសប្រកបដោយយុត្តិធម៌ ដោយអ្នកទោសទាំងអស់ទទួលបានសិទ្ធស្មើគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ