គណៈកម្មការទី១របស់សភា កំពុងពិនិត្យបណ្តឹងរបស់ពលរដ្ឋ៤៣គ្រួសារថ្មីនៅឡពាង
គណៈកម្មការសិទ្ធិមនុស្សនិងទទួលពាក្យបណ្តឹងរបស់រដ្ឋសភា កាលពីថ្ងៃម្សិលមិញ បានចុះទៅប្រមូលទិន្នន័យចំពោះបណ្តឹងរបស់ពលរដ្ឋចំនួន៤៣គ្រួសារថ្មីទៀតក្នុងសហគមន៍ឡពាង ឃុំតាជេស ខេត្តកំពង់ឆ្នាំងដែលអះអាងថា រងផលប៉ះពាល់ពីការអភិវឌ្ឍនៃក្រុមហ៊ុន ខេឌីស៊ី (KDC)។ ប៉ុន្តែអាជ្ញាធរនៅមិនទាន់អាចបញ្ជាក់អត្តសញ្ញាណដីធ្លីដែលអះអាងនោះថា ក្នុងតំបន់ជម្លោះនៅឡើយទេ។
ចុះផ្សាយនៅថ្ងៃ៖
ស្តាប់ - ០២:០១
គណៈកម្មការទី១របស់រដ្ឋសភាបានបញ្ចប់ការប្រមូលព័ត៌មានស្តីពីបណ្តឹងរបស់ពលរដ្ឋចំនួន៤៣គ្រួសារថ្មីដែលអះអាងថាបានប៉ះពាល់ដោយការអភិវឌ្ឍន៍ហើយ។ ប៉ុន្តែគណៈកម្មការនៅមានភាពស្រពេចស្រពិលពីអត្តសញ្ញាណដីក្នុងតំបន់ជម្លោះ។ នេះបើតាមការបញ្ជាក់ពីលោកជា ប៉ូច សមាជិកគណៈកម្មការទី១ ដែលបានចុះទៅកាន់តំបន់ជម្លោះ។ សមាជិករដ្ឋសភាបក្សប្រឆាំងរូបនេះ បានបញ្ជាក់ថា ប្រជាពលរដ្ឋចំនួន៤៣គ្រួសារថ្មីបន្ថែមនេះ គឺជាអ្នកមកតវ៉ា និងដាក់ពាក្យបណ្តឹងថ្មីមកកាន់គណៈកម្មការ កាលពីឆ្នាំ២០១៤កន្លងទៅ។ ប៉ុន្តែគណៈកម្មការនិងអាជ្ញាធរនៅមិនទាន់អាចកំណត់អត្តសញ្ញាណនៃដីដែលពលរដ្ឋទាំង៤៣គ្រួសារនោះបានអះអាងនៅឡើយទេ។ លោកជា ប៉ូច បានបន្ថែមថា គណៈកម្មការ និងអង្គការអាដហុកប្រចាំខេត្តកំពង់ឆ្នាំងគឺកំពុងធ្វើការកំណត់ឱ្យជាក់លាក់ដើម្បីងាយស្រួលដល់ការដោះស្រាយ។
ដោយឡែកលោកឡាត់ គី មន្ត្រីអង្គការអាដហុកកាន់ករណីនៅតំបន់ឡងពាងនេះ បានបញ្ជាក់ថា ប្រជាពលរដ្ឋទាំង៤៣គ្រួសារនោះ គឺជាអ្នកដែលធ្លាប់អាស្រ័យផលចំនួន៩០ហិកតាលើផ្ទៃដីដែលមានជម្លោះជាមួយក្រុមហ៊ុន ខេឌីស៊ី របស់លោកស្រីជា ខេង។
ប៉ុន្តែទាំងលោកជា ប៉ូច និងលោកឡាត់ គី បានលើកឡើងពីចំងល់ថា ហេតុអ្វីបានជាប្រជាពលរដ្ឋទាំង៤៣គ្រួសារថ្មីនេះទើបចេញតវ៉ា ខណៈដែលប្រជាពលរដ្ឋក្នុងភូមិឡពាងផ្សេងៗទៀតបានចេញតវ៉ានោះ។ ក្នុងជម្លោះនៅតំបន់ឡពាង ខេត្តកំពង់ឆ្នាំងដែលធ្លាប់មានដល់ការចាប់ដាក់ពន្ធនាគារ និងការបណ្តេញពលរដ្ឋចេញពីផ្ទះសម្បែងនោះ អាជ្ញាធរនិងក្រុមហ៊ុននាពេលនេះ បានទទួលស្គាល់ពលរដ្ឋតែចំនួន៥២គ្រួសារលើផ្ទៃដីជាង១០០ហិកតាតែប៉ុណ្ណោះ។
សូមរម្លឹកបន្តិចថា ក្រុមហ៊ុនខេឌីស៊ីដែលទទួលសិទ្ធិក្នុងការអភិវឌ្ឍន៍ក្នុងភូមិឡពាង ឃុំតាជេសនេះ មានទំនាស់ដីប្រមាណជាង ១៨២ហិកតា។ ក្នុងនោះមានពលរដ្ឋដែលអះអាងថា បានប៉ះពាល់ចំនួន៨២ ឬ៨៣គ្រួសារ។ យ៉ាងណាក៏ដោយ លោកឡាត់ គី មន្ត្រីអង្គការសិទ្ធិមនុស្សអាដហុក បានស្នើឱ្យមានដំណោះស្រាយដោយឈរលើជំហររបស់ប្រជាពលរដ្ឋ និងស្នើឱ្យក្រុមហ៊ុនអាចសម្បទានដល់ប្រជាពលរដ្ឋ។ ដោយឡែកលោកជា ប៉ូច អះអាងថា ពលរដ្ឋទាំងអស់នឹងទទួលបានដំណោះស្រាយក្រោយពេលដែលអត្តសញ្ញាណដីរបស់ពលរដ្ឋទាំង៤៣គ្រួសារត្រូវបានទទួលស្គាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ