ក្រសួងមហាផ្ទៃ កំណត់ឲ្យមន្ត្រីរាជការស៊ីវិលទាំងអស់មានមុខតំណែងតែមួយ
ក្រសួងមហាផ្ទៃ បានកំណត់ឲ្យមន្ត្រីរាជការស៊ីវិលទាំងអស់ ត្រូវតែមានមុខតំណែងមិនលើសពីមួយឡើយ បើទោះបីនៅក្នុងក្រសួងស្ថាប័នតែមួយ ឫក្រសួងស្ថានប័នផ្សេងគ្នាក៏ដោយ។ ការកំណត់បែបនេះ ត្រូវបានក្រសួងមហាផ្ទៃពន្យល់ថា ដើម្បីទុកលទ្ធភាពដល់មន្ត្រីរាជការស៊ីវិលផ្សេងទៀត អាចកាន់មុខតំណែងដែលនៅទំនេរបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
គឺនៅក្នុងលិខិតមួយចុះថ្ងៃទី៥ កុម្ភៈ និងទើបផ្សព្វផ្សាយជាសាធារណៈកាលពីថ្ងៃសៅរ៍ក្រសួងមហាផ្ទៃបានលើកឡើងយ៉ាងដូច្នេះថា ការកំណត់ឲ្យមន្ត្រីរាជការស៊ីវិលនៃក្រសួងមហាផ្ទៃទាំងអស់ត្រូវតែមានមុខតំណែងតែមួយនោះ គឺអនុវត្តតាមព្រះរាជក្រឹត្យស្តីពីគោលការណ៍រួម នៃការរៀបចំមុខងារសាធារណៈរបស់រដ្ឋ។ ជាព្រះរាជក្រឹត្យ ដែលបានប្រកាសដាក់ឲ្យប្រើប្រាស់ជាផ្លូវការកាលពីថ្ងៃទី០២ តុលា ឆ្នាំ២០១៤កន្លងទៅ ក្នុងគោលបំណង ដើម្បីគាំទ្រដល់កំណែទម្រង់ស៊ីជម្រៅរបស់រដ្ឋាភិបាល និងជាពិសេសដើម្បីលើកទឹកចិត្តដល់មន្ត្រីរាជការស៊ីវិលទាំងអស់ដែលកំពុងបម្រើការងារទាំងនៅថ្នាក់ជាតិ និងថ្នាក់ក្រោមជាតិ។
សូមបញ្ជាក់ថា ត្រង់កថាខណ្ឌទី២ មាត្រា៨នៃព្រះរាជក្រឹត្យនេះ បានចែងថា “ មន្ត្រីរាជការស៊ីវិល មិនត្រូវអនុញ្ញាតឲ្យកាន់មុខតំណែងមានលក្ខណៈអចិន្ត្រៃយ៍លើសពីមួយមុខតំណែងឡើយ ទោះក្នុងក្រសួងស្ថាប័នតែមួយ ឫ ក្នុងក្រសួងស្ថាប័នផ្សេងគ្នា។ ដូច្នេះ ដើម្បីអនុវត្តឲ្យត្រឹមត្រូវតាមខ្លឹមសារនេះ ក្រសួងមហាផ្ទៃបានស្នើដល់ថ្នាក់ដឹកនាំអង្គភាពនានាដែលស្ថិតក្រោមចំណុះរបស់ខ្លួន ណែនាំដល់មន្ត្រីរាជការស៊ីវិលក្រោមឳវាទទាំងអស់ដែលកំពុងកាន់មុខតំណែងលើសពីមួយ ធ្វើការជ្រើសរើសមុខតំណែងមួយក្នុងចំណោមមុខតំណែងបច្ចុប្បន្នដែលខ្លួនកំពុងកាន់ ដើម្បីទុកលទ្ធភាពដល់មន្ត្រីរាជការស៊ីវិលផ្សេងទៀត អាចកាន់មុខតំណែងដែលនៅទំនេរទាំងនោះ។
គួររំលឹកជូនផងដែរថា នៅក្នុងសប្តាហ៍នេះ លោកស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ក៏បានធ្វើការព្រមានមន្ត្រីថ្នាក់ដឹកនាំនៅថ្នាក់ក្រោមជាតិ ត្រូវបញ្ឈប់ការជ្រើសរើសសាច់ញាតិរបស់ខ្លួនឲ្យចូលបម្រើការងារសំខាន់ៗនៅក្នុងអង្គភាពជំនាញនានាតទៅទៀត។ បម្រាមនេះ ត្រូវបានលោកស ខេង លើកហេតុផលថា ការជ្រើសរើសសាច់ញាតិដែលគ្មានលក្ខណសម្បត្តិគ្រប់គ្រាន់នោះ គឺអាចធ្វើឲ្យរាំងស្ទះដល់ដំណើរការអភិវឌ្ឍនានានៅថ្នាក់មូលដ្ឋាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ