អភិបាលខេត្តកោះកុង៖ប្រធានផ្សារដងទង់នឹងប្រឈមមុខច្បាប់ ប្រសិនបើប្រព្រឹត្តហិង្សាលើក្មេងស្រីមែន
ប្រធានផ្សារដងទង់ខេត្តកោះកុង លោកម៉ក់ ណុច ដែលរងការចោទប្រកាន់ថា បានប្រើអំពើហិង្សាទៅលើក្មេងស្រីអាជីវករពីរនាក់កាលពីម្សិលមិញ ត្រូវបាននគរបាលខេត្តកោះកុងឃាត់ខ្លួនទៅសួរនាំហើយ ប៉ុន្តែមកដល់ពេលនេះមិនទាន់សម្រេចយ៉ាងណានៅឡើយទេ។ ទោះជាបែបនេះក្តី អភិបាលខេត្តកោះកុង បានបញ្ជាក់ថា លោកប្រធានផ្សាររូបនោះនឹងប្រឈមមុខច្បាប់ ប្រសិនបើបានប្រព្រឹត្តហិង្សាលើក្មេងស្រី។
ចុះផ្សាយនៅថ្ងៃ៖
ស្តាប់ - ០១:៥៥
តាមរយៈខ្សែទូរស័ព្ទពីខេត្តកោះកុង លោកអភិបាលខេត្តប៊ុន លើត បានលើកឡើងថា ប្រសិនបើលោកប្រធានផ្សារដងទង់ម៉ក់ ណុច បានប្រើប្រាស់អំពើហិង្សាទៅលើក្មេងស្រីអាជីវករទាំងពីរនាក់នោះមែន វាគឺជារឿងផ្លូវច្បាប់។ លោកថា បើគាត់ខុសនឹងមាត្រាច្បាប់ណាមួយ នោះនឹងធ្វើតាមមាត្រាច្បាប់នោះតែម្តង។ បើតាមលោកអភិបាលខេត្តកោះកុង នគរបាលខេត្តបានឃាត់ខ្លួនលោកប្រធានផ្សាររូបនោះយកមកសួរនាំតាំងពីម្សិលមិញ ពោលគឺតាំងពីគាត់បានប្រព្រឹត្តហិង្សាលើក្មេងស្រីរួច។
ចំណែកស្នងការនគរខេត្តកោះកុងបានថ្លែងបញ្ជាក់ប្រាប់វិទ្យុបារាំងអន្តរជាតិតាមរយៈខ្សែទូរស័ព្ទថា អាជ្ញាធរកំពុងសួរនាំ និងដោះស្រាយបញ្ហារវាងលោកប្រធានផ្សារ និងជនរងគ្រោះនោះ ប៉ុន្តែមិនទាន់មានលទ្ធផល និងសម្រេចយ៉ាងណាមួយនៅឡើយទេគិតនៅត្រឹមព្រឹកថ្ងៃសៅរ៍នេះ។
សូមជំរាបជូនថា រឿងរ៉ាវរវាងលោកប្រធានផ្សារដងទង់ខេត្តកោះកុង និងក្មេងស្រីរងគ្រោះទាំងពីរនាក់នេះ បានកើតឡើងកាលពីព្រឹកថ្ងៃសុក្រម្សិលមិញ។ វីឌីអូខ្លីបមួយដែលគេបង្ហោះនៅលើបណ្តាញសង្គមហ្វេសប៊ុក បានបង្ហាញឲ្យឃើញថា លោកប្រធានផ្សារ និងសន្តិសុខផ្សារមួយចំនួនទៀតបានប្រតាយប្រតបគ្នាជាមួយក្រុមអាជីវករលក់ដូរក្នុងផ្សារ។ ក្នុងពេលនោះ លោកប្រធានផ្សារដងទង់ បានយកដៃទៅច្របាច់កក្មេងស្រីម្នាក់ រីឯបក្ខពួកគាត់ផ្សេងទៀតបានទះកំផ្លៀងក្មេងស្រីម្នាក់ទៀត។
បណ្តាញសារព័ត៌មានក្នុងស្រុកបានដកស្រង់សម្តីក្មេងស្រីរងគ្រោះម្នាក់ដែលត្រូវលោកប្រធានផ្សារច្របាច់កឥតប្រណីមកចុះផ្សាយថា ពេលនាងកំពុងអង្គុយជាមួយម្តាយលក់ឥវ៉ាន់ដូចសព្វមួយដង ពេលនោះស្រាប់តែប្រធានផ្សារដើរមកដល់តូបរបស់នាង ហើយក៏យកឥវ៉ាន់ទៅបោះចោលក្នុងធុងសំរាមតែម្តង។ ពេលនោះនាងក៏រត់យកមកវិញ ស្រាប់តែប្រធានផ្សារផ្ទុះកំហឹងមកច្របាច់កនាងចង់ដាច់ខ្យល់ស្លាប់ តែត្រូវបានបងស្រីនាង និងអ្នកលក់ដូរជិតខាងជួយទាន់ ទើបលោកប្រធានផ្សារលែងដៃពីកនាងវិញ។ ចំណែកបងស្រីនាងដែលមកជួបនោះក៏ត្រូវបក្ខពួកលោកប្រធានផ្សារទះមួយកំផ្លៀងផងដែរ។
យ៉ាងណាក៏ដោយ វិទ្យុបារាំងអន្តរជាតិនៅមិនទាន់អាចស្វែងរកការទាក់ទងសុំការបកស្រាយពីលោកប្រធានផ្សារដងទង់បាននៅឡើយទេនៅព្រឹកថ្ងៃសៅរ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ