ជំនួបចៃដន្យរវាងសម្តេចក្រុមព្រះ និងលោក ញឹក ប៊ុនឆៃ និយាយពីការបង្រួបបង្រួមបក្សទាំងពីរឡើងវិញ
សម្តេចក្រុមព្រះ នរោត្តម រណឫទ្ធិ និង លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានជួបគ្នាដោយចៃដន្យកាលពី១០ថ្ងៃមុននេះ នៅព្រះរាជដំណាក់វាលស្បូវ បន្ទាប់ពីមេដឹកនាំគណបក្សបងប្អូនគូសត្រូវទាំងពីរចែកផ្លូវគ្នាដើរអស់រយៈពេលជិត១០ឆ្នាំ។ ជំនួបចៃដន្យនេះ ភាគីទាំងពីរបាននិយាយដល់ការបង្រួបបង្រួមគណបក្សរាជានិយមនេះឡើងវិញនៅពេលខាងមុខ ពោលនៅពេលព្រះរាជបុត្រសម្តេចក្រុមព្រះយាងពីក្រៅប្រទេសមកវិញ។
ចុះផ្សាយនៅថ្ងៃ៖
តាមរយៈបទសម្ភាសជាមួយវិទ្យុបារាំងអន្តរជាតិ RFI នៅថ្ងៃអាទិត្យនេះ លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានគូសបញ្ជាក់ថា ជំនួបចៃដន្យរវាងលោក និងសម្តេចក្រុមព្រះ កាលពី១០ថ្ងៃមុន គឺតាមរយៈម្ចាស់ក្សត្រីយ៍ ម៉ារី រណឫទ្ធិ។
បើតាមលោក ញឹក ប៊ុនឆៃ ព្រះរាជសុខភាពរបស់សម្តេចក្រុមព្រះនៅពេលនេះបានល្អឡើងវិញហើយ ដោយទ្រង់អាចមានបន្ទួលមកកាន់លោកបានគ្រប់ម៉ាត់ និងច្បាស់ៗ ប៉ុន្តែតាំងជួបគ្រោះថ្នាក់ចរាចរណ៍យ៉ាងធ្ងន់ធ្ងរប្រហែលមួយឆ្នាំមកនេះ ទ្រង់មិនអាចមានបន្ទួលបានច្រើនឡើយ។
និយាយដល់ការចង់បង្រួបបង្រួមគណបក្សអតីតគូសត្រូវទាំងពីរឡើងវិញ លោក ញឹក ប៊ុនឆៃ អះអាងថា នេះជាបន្ទួលចេញពីមាត់ផ្ទាល់របស់សម្តេចក្រុមព្រះមកកាន់លោក ហើយលោកក៏បានយល់ព្រមចំពោះព្រះរាជបំណងមួយនេះ ដែលលោកចាត់ទុកថា ជាការបង្រួបបង្រួមជាលើកចុងក្រោយបង្អស់ហើយ។
គួរឲ្យដឹងថា សម្តេចក្រុមព្រះត្រូវបានបណ្តេញចេញពីប្រធានគណបក្សហ្វ៊ុនស៊ិនប៉ិច កាលពីខែតុលា ឆ្នាំ២០០៦ ហើយបន្ទាប់មកព្រះអង្គបានភៀសព្រះកាយទៅក្រៅប្រទេសដោយបង្កើតគណបក្សថ្មីដាក់ឈ្មោះថា គណបក្សនរោត្តម រណឫទ្ធិ ខណៈគណបក្សហ្វ៊ុនស៊ិនប៉ិចធ្លាក់ទៅលើ លោក ញឹក ប៊ុនឆៃ។
ប៉ុន្តែក្រោយមក លោក ញឹក ប៊ុនឆៃ បានយល់ព្រះយាងសម្តេចក្រុមព្រះមកដឹកនាំគណបក្សហ្វ៊ុនស៊ិនប៉ិចវិញ តែដោយសារនៅតែមិនចុះសម្រុងគ្នា លោក ញឹក ប៊ុនឆៃ ក៏រត់ទៅបង្កើតគណបក្សថ្មីមួយទៀតដែលមានឈ្មោះដល់សព្វថ្ងៃ គឺគណបក្សខ្មែររួបរួមជាតិ។ ជាលទ្ធផលនៃការបែកបាក់គណបក្សដែលជាកេរ្តិ៍ដំណែលរាជានិយមទាំងពីរនេះ មិនទទួលបានអាសនៈសោះឡើយនៅក្នុងការបោះឆ្នោត២អាណត្តិជាប់ៗមកគ្នាមកនេះ។
យ៉ាងណាក៏ដោយ ចំពោះការបង្រួបបង្រួមជាលើកចុងក្រោយនេះ ត្រូវបានលោក ញឹក ប៊ុនឆៃ បញ្ជាក់ថា នឹងធ្វើឡើងជាផ្លូវការ ក្រោយពេលព្រះរាជបុត្រសម្តេចក្រុមព្រះ គឺ ព្រះអង្គម្ចាស់ នរោត្តម ចក្រាវុធយាងពីប្រទេសបារាំង វិញ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ