អាជ្ញាធរគ្រោងផ្ទេរលំនៅដ្ឋានពលរដ្ឋប្រមាណ៥ពាន់នាក់ចេញពីខ្នងភ្នំគូលែន
អាជ្ញាធរខេត្តសៀមរាប និងក្រសួងបរិស្ថាន កំពុងសិក្សារួមគ្នា ដើម្បីផ្ទេរលំនៅដ្ឋានពលរដ្ឋប្រមាណ៥ពាន់នាក់ ចេញខ្នងភ្នំគូលែន។ មូលហេតុនៃផ្ទេរកន្លែងរស់នៅរបស់ពលរដ្ឋទាំងនេះ ត្រូវបានអាជ្ញាធរពន្យល់ថា គឺដោយសារខ្នងភ្នំគូលែនជាតំបន់អភិរក្ស ខណៈការរស់នៅរបស់ពលរដ្ឋកន្លងមកបានធ្វើឲ្យប៉ះពាល់ដល់បរិស្ថាន និងធនធានធម្មជាតិ។
ចុះផ្សាយនៅថ្ងៃ៖
ក្រសួងបរិស្ថានបានអះអាងថា ទីតាំងកន្លែងថ្មីនឹងមានលក្ខណៈងាយស្រួលដល់ពលរដ្ឋប្រមាណជា៥ពាន់នាក់ ក្នុងការប្រកបមុខរបរចាស់ដដែល គឺការលក់វត្ថុអនុស្សាវរីយ៍ និងដំណើរការបើកភោជនីយដ្ឋានជាដើម។ បើតាម លោក នេត្រ ភក្ត្រា អ្នកនាំពាក្យក្រសួងបរិស្ថាន បញ្ហាទាំងនេះស្ថិតនៅក្នុងផែនការសិក្សារួមគ្នារវាងក្រសួងបរិស្ថាន និងអាជ្ញាធរខេត្តសៀមរាប ជាយូរមកហើយ ប៉ុន្តែទើបត្រូវបានលើកមកជជែកជាថ្មី នៅក្នុងជំនួបរវាងអភិបាលខេត្តសៀមរាប លោក ឃឹម ប៊ុនសុង និង លោក សៅ សុភាព រដ្ឋលេខាធិការក្រសួងបរិស្ថាន នៅថ្ងៃទី១១ខែតុលា។
នៅក្នុងជំនួបនោះ លោក សៅ សុភាព រដ្ឋលេខាធិការក្រសួងបរិស្ថាន លើកឡើងថា ការកាប់ទន្ទ្រានរានយកដីព្រៃ បានកើតមាននៅលើខ្នងភ្នំគូលែន ដែលធ្វើឲ្យបាត់បង់ធនធានធម្មជាតិ ព្រមទាំងប៉ះពាល់ដល់រមណីយដ្ឋានធម្មជាតិប្រវត្តិសាស្ត្រនៅទីនោះ។ តាមរយៈផលប៉ះពាល់នេះ លោក សៅ សុភាព ស្នើទៅអភិបាលខេត្តសៀមរាប ឲ្យរៀបចំទីតាំងសមរម្យដើម្បីផ្ទេរពលរដ្ឋទៅរស់នៅកន្លែងថ្មី។
ជាការឆ្លើយតប លោក ឃឹម ប៊ុនសុង ក៏បានគូសបញ្ជាក់ថា អាជ្ញាធរខេត្តបានរៀបចំគណៈកម្មការចម្រុះ ក្នុងការ គ្រប់គ្រងប្រជាពលរដ្ឋដែលរស់នៅ ខ្នងភ្នំគូលែន មុខព្រះអង្គធំ និង ទឹកធ្លាក់ជាដើម ដើម្បីញ្ជៀសនូវផលប៉ះពាល់ និង បំពុលបរិស្ថាននៅតំបន់រមណីយដ្ឋានធម្មជាតិមួយនេះ ដែលជាទីកន្លែងសក្ការៈបូជា។
លោក សួស ណារិន មន្ត្រីអង្គការអាដហុកប្រចាំការនៅខេត្តសៀមរាប បានសម្ដែងការគាំទ្រចំពោះវិធានការរបស់អាជ្ញាធរ ក្នុងការផ្ទេរកន្លែងរស់នៅរបស់ពលរដ្ឋរស់នៅលើខ្នងភ្នំគូលែននេះ។ លោក សួស ណារិន យល់ថា ការរស់នៅរបស់ពលរដ្ឋពិតជាបានផ្ដល់ផលប៉ះពាល់ដល់ធនធានធម្មជាតិនៅទីនោះ។ នេះក៏ព្រោះចំនួនអ្នកទៅរស់នៅទីនោះ ចេះតែកើនឡើងពីមួយឆ្នាំទៅមួយឆ្នាំ។ បន្ថែមពីលើការតាំងចិត្តរបស់អាជ្ញាធរ មន្ត្រីអាដហុករូបនេះជំរុញអាជ្ញាធរឲ្យស្វែងរកទីកន្លែងរស់នៅឲ្យបានសមរម្យ ដើម្បីបញ្ជៀសទំនាស់រវាងពលរដ្ឋ និងអាជ្ញាធរ។
សូមជម្រាបថា តំបន់ភូមិសាស្ត្រភ្នំគូលែន ជាទីតាំងសមរភូមិក្ដៅនៅពេលដែលប្រទេសកម្ពុជាមានសង្គ្រាម។ ក្រោយបញ្ចប់សង្គ្រាម កងទ័ពមួយចំនួនបានសម្រេចតាំងទីលំនៅ នៅទីនោះតែម្ដង រហូតដល់បច្ចុប្បន្ន។ រដ្ឋាភិបាលកម្ពុជាបានដាក់តំបន់ប្រវត្តិសាស្ត្រភ្នំគូលែន ជាតំបន់អភិរក្ស នៅឆ្នាំ១៩៩៣ ក្រោមឈ្មោះថា ឧទ្យានជាតិព្រះជ័យវរ្ម័ននរោត្តម ភ្នំគូលែន ដោយមានផ្ទៃដីសរុបជាង៣ម៉ឺន៧ពាន់ហិកតា។ តាមរយៈទិន្ន័យ LiDAR បុរាណវិទូបានសន្និដ្ឋានថា ភ្នំគូលែនជាទីក្រុងបុរាណមួយដែលមានបុរាណដ្ឋានរាប់រយកន្លែង។ នៅលើភ្នំគូលែន មានសេសសល់ប្រាសាទបុរាណជាង៥០ ផ្ទាំងថ្មចម្លាក់ កន្លែងសម្រាប់សក្ការៈបូជាព្រហ្មញ្ញសាសនា និងព្រៃឈើជាច្រើនដែលកំពុងរងការគំរាមកំហែងដោយការកាប់ទន្ទ្រានយកដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ