គ.ជ.ប៖ ការឃោសនាបោះឆ្នោតបន្ថយមកត្រឹម១៤ថ្ងៃ និងការហែក្បួនធ្វើបានតែពីរដង
គណៈកម្មាធិការជាតិរៀបចំការបោះឆ្នោតកំពុងរៀបចំកិច្ចពិគ្រោះយោបល់លើសេចក្ដីព្រាងបទបញ្ជា និងនីតិវិធីសម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ ដោយមានការចូលរួមពីតំណាងគណបក្សនយោបាយ និងម្ចាស់ជំនួយនៅភោជនីយដ្ឋានទន្លេបាសាក់២ នៅថ្ងៃទី ០៥ ខែមករានេះ។ កិច្ចប្រជុំនេះផ្ដោតទៅលើការឃោសនាបោះឆ្នោត និងឯករាជ្យភាពរបស់អ្នកអង្កេតការណ៍ជាដើម។ ប៉ុន្តែចំណុចរួមមួយ ដែលត្រូវលើមកបង្ហាញនោះ គឺការឃោសនាបោះឆ្នោតបន្ថយមកត្រឹម ១៤ថ្ងៃ និងការហែក្បួនធ្វើបានតែពីរដងទេ ។
ចុះផ្សាយនៅថ្ងៃ៖ កែប្រែថ្ងៃទី៖
ខ្លឹមសារនៃសេចក្ដីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ បានកំណត់ថា ប្រសិនបើអ្នកចូលរួមសង្កេតការណ៍ លើដំណើរការឃោសនាបោះឆ្នោត ឃុំ-សង្កាត់ មិនព្រមអនុវត្តតាមច្បាប់ ដែលបានកំណត់ទេ នឹងទទួលរងការផាកពិន័យ។ហើយសកម្មភាពដែលឈានទៅដល់ការផាកពិន័យនោះដូចជាការផ្ដល់មធ្យោបាយឬទឹកប្រាក់ជំរុញដល់សកម្មភាពឃោសនាបោះឆ្នោតរបស់គណបក្សនយោបាយណាមួយ។ តាមការសន្និដ្ឋានពី លោកសោម សូរីដា អគ្គលេខាធិការរងគជបភាគច្រើននៃអ្នកចូលរួមអង្កេតការណ៍គឺមន្ត្រីអង្គការសង្គមស៊ីវិល។ សម្រាប់លោកមន្រ្តីអង្គការសង្គមស៊ីវិលត្រូវបានរិះគន់ថាខ្វះអព្យាក្រឹត្យភាពនៅក្នុងការបោះឆ្នោតកាលពីឆ្នាំ២០១៣។
ដោយឡែកការឃោសនាបោះឆ្នោតពីមុនមកកំណត់ពេល២១ថ្ងៃប៉ុន្តែឥឡូវបន្ថយមកត្រឹម១៤ថ្ងៃប៉ុណ្ណោះ។ ហើយការហែក្បួនវិញមានតែពីរដងទេគឺពេលបើកយុទ្ធនាការនិងពេលបិទយុទ្ធនាការឃោសនាបោះឆ្នោត ។ ក្នុងន័យនេះលោកសោម សូរីដា អគ្គលេខាធិការរងគជបបានគូសបញ្ជាក់ថា ត្បិតតែការហែក្បួនធ្វើបានតែពីរដងក្នុងរយៈពេល១៤ថ្ងៃមែនពិតតែគណបក្សនយោបាយអាចធ្វើសកម្មភាពឃោសនាផ្សេងៗទៀតបាននៅតាមឃុំសង្កាត់របស់ពួកគេរៀងៗខ្លួន។
លោកសោម សូរីដា បន្ថែមថា ការតាក់តែសេចក្ដីព្រាងបទបញ្ជានិងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧នេះយកមូលដ្ឋានគ្រឹះពីច្បាប់ស្ដីពីការបោះឆ្នោតជ្រើសតាំងតំណាងរាស្ត្រដែលចូលរួមតាក់តែងឡើងដោយគណបក្សប្រជាជនកម្ពុជានិងគណបក្សសង្គ្រោះជាតិ។ ហើយលោកអះអាងទៀតថា បទបញ្ជាថ្មីនិងនីតិវិធីដែលកំពុងពិគ្រោះយោបល់នេះនិងបទបញ្ជាចាស់ដែលមានស្រាប់គឺមានលក្ខណៈប្រហាក់ប្រហែលគ្នា។
សូមបញ្ជាក់ថា កិច្ចពិភាក្សាដែលមានរយៈពីរថ្ងៃនេះ គ.ជ.ប នឹងសម្រេចបិទផ្សាយជាផ្លូវការលើសេចក្ដីព្រាងបទបញ្ជានិងនីតិវិធីសម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ នៅចុងខែមករានេះ។
ដោយឡែកចំពោះពាក្យបណ្ដឹងដែលគជបទទួលបាននៅអំឡុងពេលបិទផ្សាយបញ្ជីឈ្មោះដំបូងវិញត្រូវបានលោក ហង្ស ពុទ្ធា អ្នកនាំពាក្យគជបអះអាងថា ក្រុមប្រឹក្សាឃុំ-សង្កាត់ នៅតាមបណ្តាខេត្តមួយចំនួនបានទទួលពាក្យតវ៉ាពីប្រជាពលរដ្ឋហើយ ប៉ុន្តែចំពោះការដោះស្រាយបានប៉ុន្មានករណីហើយនោះលោកនៅមិនទាន់មានតួលេខនៅក្នុងដៃនៅឡើយទេ។ ប៉ុន្តែព័ត៌មានបឋម បានបង្ហាញថា មានអ្នកប្តឹងតវ៉ា ទៅលើការកែទិន្នន័យ អ្នកចុះឈ្មោះបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ