ពលររដ្ឋនៅភូមិស្រែគរថា មិនទាន់ឃើញអាជ្ញាធរមកសួរសុខទុក្ខ ក្រោយលិចភូមិដ្ឋាន
រហូតមកទល់ពេលនេះ ស្ថានភាពទឹកលិចភូមិស្រែគរចាស់ ដែលរងផលប៉ះពាល់ពីការអភិវឌ្ឍន៍ទំនប់វារីអគ្គិសនីសេសានក្រោម២ នៅតែរងការលិចលង់ខ្លាំង គិតត្រឹមថ្ងៃអាទិត្យនេះ។ ប្រឈមនឹងទឹកលិចនេះ ប្រជាពលរដ្ឋជាង ៧០គ្រួសារនៃភូមិស្រែគរ ដែលមិនព្រមទទួលយកសំណងពីការអភិវឌ្ឍន៍ទំនប់វារីអគ្គិសនីសេសានក្រោម២ នៅតែបន្តជម្លៀសខ្លួនមកទីទួលសុវត្ថិភាព និង ថា មកទល់ពេលនេះ មិនទាន់ឃើញអាជ្ញាធរមកសួរសុខទុក្ខឡើយ ចាប់តាំងពីភូមិដ្ឋានរបស់ពួកគាត់រងការលិចលង់។
ចុះផ្សាយនៅថ្ងៃ៖
ស្តាប់ - ០២:០៦
ចាប់តាំងពីពេលដែលក្រុមហ៊ុនទំបន់វារីអគ្គិសនីសេសានក្រោម២ ចាប់ផ្ដើមបិទទ្វារទឹកបន្ថែមនៅថ្ងៃទី១៥តុលា ភូមិចំនួន៣ នៅក្នុងតំបន់បាតអាងនៃទំនប់វារីអគ្គិសនីបានរងការលិចលង់។ ភូមិទាំង៣នោះ គឺភូមិក្បាលរមាសចាស់ ភូមិស្រែគរ១ និងភូមិស្រែគរ២។ ក៏ប៉ុន្តែក្នុងចំណោមភូមទាំងបី ស្ថានភាពទឹកលិចនៅភូមស្រែគរ មិនទាន់ថមថយនៅឡើយទេ។
ប្រឈមនឹងការលិចលង់នេះ លោកស្រី វណ្ណនី ប៉ាត តំណាងសហគមន៍ស្រែគរ បានថ្លែងប្រាប់វិទ្យុបារាំងអន្ដរជាតិនៅថ្ងៃទី ០៥ វិច្ឆិកា នេះថា ប្រជាពលរដ្ឋជាង៧០ គ្រួសារ កំពុងប្រឈមនឹងការលំបាក បន្ទាប់ពីចាកចេញពីភូមិដ្ឋាន ហើយមករស់នៅបណ្តោះអាសន្ននៅទីទួលសុវត្ថិភាព។ បញ្ហាប្រឈមទាំងនោះរួមមាន កូនៗមិនបានទៅសិក្សារៀនសូត្រ ការប្រើប្រាស់ទឹកគ្មានអនាម័យ គ្មានបង្គន់ និងបញ្ហាឈឺថ្កាត់យប់ព្រលប់។ ប្រឈមនឹងបញ្ហានេះ លោកស្រី តំណាងឲ្យប្រជាពលរដ្ឋភូមិស្រែគរចាស់ បានអំពាវនាវឲ្យអាជ្ញាធរស្រុក ខេត្ត និងម្ចាស់ក្រុមហ៊ុនវារីអគ្គិសនីសេសានក្រោមពីរ បើកទឹកឡើងវិញជាបណ្ដោះអាសន្នសិន។
ជាការកត់សម្គាល់ មុននឹងឈានដល់ការលិចលង់នេះ អាជ្ញាធរខេត្តស្ទឹងត្រែង កាលពីថ្ងៃទី១១តុលា បានជូនដំណឹងឲ្យប្រជាពលរដ្ឋ៣ភូមិ ដែលកំពុងរស់ក្នុងតំបន់បាតនៃទំនប់វារីអគ្គិសនីសេសានក្រោម២ ឲ្យចាកចេញពីភូមិជាបន្ទាន់។ អាជ្ញាធរបានប្រកាសពីការបិទទ្វារទឹកបន្ថែមនៅថ្ងៃទី១៥តុលា និងព្រមានពីការលិចលង់បន្ថែមទៀតផងដែរ។
ទោះរងការលិចលង់យ៉ាងណាក៏ដោយ លោកស្រី វណ្ណនី ប៉ាត បន្តលើកឡើងថា ពលរដ្ឋមកពីបីភូមិ គឺភូមិក្បាលរមាស និងភូមិស្រែគរ១ ភូមិស្រែគរ២ គឺនៅតែរក្សាជំហរមិនចាកចេញឡើយ ដោយនឹងត្រឡប់ទៅរស់នៅកន្លែងនោះវិញនៅពេលទឹកស្រក។
ទោះបីជាពលរដ្ឋទាំងនេះនៅតែរក្សាមិនព្រមចាកចេញ ក៏ដោយ តែនៅមានប្រជាពលរដ្ឋរាប់រយគ្រួសារទៀត បានយល់ព្រមចាកចេញ ដោយទទួលយកសំណងនិងការតាំងទីលំនៅថ្មី។ ទំនប់វារីអគ្គិសនីសេសានក្រោម២ គឺជាទំនប់វារីអគ្គិសនីធំជាងគេនៅកម្ពុជា ដែលអាចផលិតថាមពលអគ្គិសនីបាន៤០០ម៉េហ្គាវ៉ាត់ ត្រូវបានធ្វើពិធីបិទទ្វារទឹកកាលពីថ្ងៃទី ២៥ កញ្ញា ក្រោមអធិបតីភាពរបស់លោកនាយករដ្ឋមន្រ្តី ហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ